Atonu e lē o toe po se lilo o loo iai se tulafono o loo taufaaofi e se tasi o ou uso a faipule ua lugā lalo ai Niu Sila. O lea tulafono taufaaofi o loo taumafai e toe teuteu ai le tulafono o faaipoipoga ina ia faataga ai le faaipoipo o le tama i le tama ma le teine i le teine, ma ua taumafai e faatutusa ia faigaulugalii ma le ulugalii o le tane i le fafine.
O le Aso Lulu ua tea na faitauina ai lea tulafono taufaaofi i le Palemene mo le taimi muamua. Na mae‘a lea faitauina ma palota loa i ai faipule. E 80 faipule na palotaina i le ioe, ae 40 faipule na palotaina i le tetee, ae tasi le faipule ua lē palota i ai. Ua pasia ai loa lea tulafono taufaaofi i lona faitauga muamua ma o le a see loa lea tulafono e iloilo e se tasi o Komiti a le Palemene.
E uma le vaiaso o le a sau, ae o le vaiaso o i luma atu e feiloai ai lea Komiti ma fai loa le latou faaiuga i le faagasologa o le latou galuega e iloilo ai lea tulafono taufaaofi. O le a maua foi le avanoa a le Atunuu lautele e faaalia ai o latou finagalo i lea tulafono taufaaofi.
Ua uma ona ma talanoa ma le taitaifono o lea Komiti ma ua ioe le taitaifono e tatala le avanoa poo le 6 vaiaso i le Atunuu e faailoa ai o latou finagalo i le Komiti e faatatau i lea tulafono taufaaofi.
O lona uiga e maua le avanoa e le Atunuu lautele e faailoa ai i le Komiti o le Palemene pe lagolagoina lea tulafono taufaaofi ma mafuaaga e lagolagoina ai. Poo le faailoa foi o le tetee i lea tulafono taufaaofi ma mafuaaga ua teena ai. O lea avanoa e amata atu mai le faaiuga o Setema seia oo i le faaiuga o Oketopa 2012, ma e faailoa atu i nusipepa.
O le ala o tulafono e tatau ona fai muamua sau talosaga tusitusia, ma faailoa i ai lou suafa, telefoni ma lou tuatusi, ma e ao foi ona faailoa i lau talosaga tusitusia o loo e manao e feiloai ma le Komiti a le Palemene ina ia e talanoa sa‘o i ai e faatatau i lau talosaga tusitusia.
E mae‘a loa lea galuega ona tapuni loa lea o le avanoa mo talosaga tusitusia, masalo o le faaiuga o Oketopa, poo le amataga o Novema. Ona faafesootai mai loa lea o oe e le Palemene mo le faatulagaina o le taimi e te susū atu ai e talanoa i le Komiti a le Palemene e faatatau i lau talosaga tusitusia – poo ua e tetee i lea tulafono taufaaofi ma mafuaaga, poo lou ioe i lea tulafono taufaaofi ma mafuaaga.
O latou o loo finau mai i le ioe i lenei mataupu o loo finau mai o le latou aiā tatau (human rights) ma e tatau ona maua uma e tagata le saolotoga e ola tutusa ai (equality) ia aua ne‘i faailoga tagata i isi tagata (discrimination).
O le lagona o loo iai i le toatele o le tatou Atunuu o loo tetee i lea tulafono taufaaofi, o loo naunau e puipuia le aiā tatau faalenatura o loo avea ma faavae – o le faaipoipoga o le tuufaatasia lea o le tane ma le fafine. O le taumafai e faatutusa faaletulafono isi faiga ulugalii ma ta‘u o le faaipoipoga foi ia faigaulugalii, o se faiga ua sui ai le faavae na tatou ola ma soifua mai ai. O le isi e eseese faigaulugalii e lē tutusa foi.
E pule lava oe poo fea o iai lou finagalo e faatatau i lea tulafono taufaaofi. Ia te au lava ia, e tāua pe afai e mafai ona faailoa i le Komiti o le Palemene mo le latou silafia.
E mae‘a loa le faafofoga o lea Komiti i talosaga a le Atunuu ona galue loa lea o le Komiti e tusi sa latou lipoti ma fofola loa i luma o le maota fono o le Palemene a Niu Sila.
E taunuu loa le lipoti lea a le Komiti sa iloiloina lea tulafono taufaaofi, ona amata loa lea o le faitauga lona 2 o le tulafono taufaaofi. E mae‘a finauga i lona faitauga lona 2 ma toe palotaina e faipule pe pasia le faitauga lona 2 pe leai.
E faatapulaa le fuainumera o faipule e mafai ona lauga i le faitauga lona lua o lea tulafono taufaaofi, e lē mafai ona lauga uma faipule. Afai e pasia le faitauga lona lua o lea tulafono taufaaofi, ona sosoo loa lea ma le toe iloiloina o aiaiga taitasi o lea tulafono taufaaofi e le maota fono atoa.
E mafai loa e soo se faipule ona taumafai e faaofi i totonu teuteuga o soo se aiaiga o lea tulafono, ma talosagaina le maota fono ina ia latou taliaina. Afai e taliaina ia teuteuga fou, ua avea loa ia teuteuga ma aano o le tulafono taufaaofi.
Ona sosoo loa lea o le faitauga lona tolu o le tulafono taufaaofi. O le toe finauga lea mo faipule ma o le palota mulimuli lea o le tulafono taufaaofi. Afai e mae‘a le palota mulimuli lea ua sili atu le fuainumera o faipule e ioe i lea tulafono taufaaofi i lo le fuainumera o faipule e tetee i le tulafono taufaaofi – o lona uiga ua pasia loa le tulafono taufaaofi ma avea loa ma tulafono aloaia a Niu Sila.
E moni lava o lenei mataupu e ma‘ale‘ale i le tele o finagalo o le tatou Atunuu. Peitai ane ia matou talanoaga ma le toatele o susuga i faafeagaiga Samoa e le gata i Aukilani, Ueligitone faapea foi Kalaisetete, o le aotelega lava e lagona le tetee i lea tulafono.
Ua faaalia foi se finagalo o le Asosi o Faafafine i Samoa ma ua latou tetee foi i lea tulafono. E faapena foi finagalo o le toatele o Faafafine i Niu Sila, e ui o loo iai nisi o loo lagolagoina lea tulafono – aemaise tupulaga talavou.
O loo maua pea le avanoa e faafesootai ai le faipule o lou lava itumalo ma faailoa i ai lou finagalo e faatatau i lea mataupu. Peitai ane e pito i sili ona tāua pe afai e te saili avanoa e faailoa ai sou finagalo i luma o le Komiti a le Palemene.
