Mavaega a Taufetee Tapuala Pio Savelino ina ia faia se nofo a lona aalii o Suluape Alaivaa Su‘a e tauala i lana tautua
O le Aso Lua aso muamua o Oketopa 2013 sa faataunuuina ai le saofai a Suluape Alaivaa Su‘a i le suafa Taufetee o Satapuala. Sa amataina i le sauniga lotu i le itula e 8 i le taeao o lea lava aso.
Sa faapaiaina le nofo e le susuga i le Faafeagaiga a le Ekalesia Metotisi Samoa Satapuala (Rev. Afa Tyrell) ma le susuga i le Faafeagaiga AOG Samoa Satapuala (Rev. Fale).
Ua faapaleina ai nei le susuga ia Suluape Alaivaa Su‘a i le suafa Taufetee, ona e lē mafai na galo le tautua matavela i le aiga, ma o le mavaega lava lea a le tamā ia Taufetee Tapuala Pio Savelino.
O ia saofai sa faia i le afioaga o Satapuala lea sa faapaleina ai foi nisi o sui se toatolu i le Suafa Taufetee, faatasi ai ma nisi o vai matai. Sa matuā faatumulia lea aso i le afioaga, aemaise o malo usu mai le itumalo.
Sa faataunuuina tulaga masani e pei ona masani ai le atunuu. Na tofu le gogo ma si ana i‘a, ta‘ape fiafia tagata uma faapea le afioaga ma le itumalo ma le agaga faafetai ma le fiafia e tusa ai ma tulaga masani o faaaloaloga.
O le Tofa ia Taufetee Ga Fealofa‘i faapea Taufetee Mulifai Savelino, Taufetee Sio sa feagai ma fuafuaga uma o le aso.
