O Novema o le tausaga ua mavae na faaulu ai le tagi poo se su a le Minisita Lagolago o le Matagaluega o Fefaatauaiga, Pisinisi, Alamanuia ma Leipa, le susuga Hans Joachim Keil, faasaga i le Malo o Amerika ona o le pueina ma le taofia ai i le vaaiga a leoleo o lea malo o le alii minisita lagolago.
Ua faaailoa mai nei i ni faamaumauga a le faamasinoga i Springfield i le setete o Missouri, se faamatalaga tauto a se tasi o sui o le Malo o le Iunaite Setete o Amerika o loo faasaga i ai le tagi, na mafua ona pueina ma taofia le alii minisita lagolago o le Malo o Samoa, ona o ni tuuaiga i le lē lelei ona vaaia o le ausiva o alii ma tamaitai talavou mai Samoa sa ave e le alii minisita lagolago e faafiafia i nofoaga eseese i lea atunuu.
O se lipoti a le nusipepa o le Samoa News i Pago Pago o loo faasalalau ai le tautinoga tauto a se tamaitai e suafa ia Laura Foster, o ia lea na faia se suesuega e tusa o ni molimau na faaalia ai le faafaigaluega o sui o le ausiva i le faletalimalo e iai ma se fale mo faafiafiaga e ta‘ua o le Dutton Family Theatre, i le aai e ta‘ua o Branson, ae sa lē faatagaina e tusa ma aiaiga o visa na malaga ai le ausiva.
Sa suesueina foi le tulaga i le laititi o nofoaga sa faamautu ai alii o le ausiva ae toatele i latou, ma e lē talafeagai ma tulafono a lea setete.
O suesuega na faia na iloa ai o le ausiva mai Samoa na auala atu i le alii minisita lagolago, o le mafuaaga lea na pueina ai o ia ma taofia mo suesuega. Na mafua mai nei suesuega ona o se telefoni a se tagata e suafa ia Carwin Brice na logoina ai le tulaga faaletonu o loo iai le vaaiga o le ausiva e le aiga e ana le faletalimalo sa faamautu ai le aufaafiafia.
O loo ta‘ua foi i ia faamaumauga, o le taimi na taunuu ai le ausiva sa taofia uma e le aiga pepa malaga uma e aunoa ma le tuuina atu i le aufaafiafia, ma o se isi lea tuua‘iga o loo faamatala e Laura Foster i lana faamatalaga tauto e tali atu ai i le tagi ua faaulu e le minisita lagolago, o se sui faipule o le Palemene o Samoa.
E toalima i latou o loo tuua‘ia i le tagi e aofia ai Glenn Triveline, Michael Spinella, Laura Foster, Todd Hamilton, ma Jack Barnhart.
O le vaiaso na tea nei na faila ai e le latou loia a latou faamatalaga tauto poo affidavitts e tali ai i le su ua faaulu e Hans Joachim Keil ma lana loia.
Sa tapa se finagalo o le minisita lagolago e tusa ai ma tuua‘iga ua faailoa e se tasi o i latou o loo faasaga i ai lana tagi.
O le tali tusitusia na tuuina mai e Joe Keil na ia ta‘ua ai, o faamatalaga tauto ua faailoa ai ia tulaga o se taumafaiga e mimilo ese ai le mea tonu na tupu, ma e lei faia ni moliaga faasolitulafono faasaga ia te ia.
O le a iloa le mea tonu na tupu pe a oo ina faataunuu le faamasinoga e pei ona faaalia e le minisita lagolago.
