O le a taofi fesoasoani faifaipea o le sunami pe a maea Novema

O se faaaliga lea a le Komiti e Tali atu i Faalavelave Faafuasei i le maea ai o le lua masina talu ona amata le fesoasoani ua tuu atu e ala i taumafa mo tausiga o aiga ua aafia ona o le sunami poo le galu na aafia ai le soifua o le faitau afe i afioaga o Samoa na lavevea i le galulolo.
Taua e le Taitaifono o le Komiti o Tali o Faalavelave Faafuasei, le afioga Taulealeausumai Laavasa Malua, o lea ua amata faagaioi le isi fesoasoani tele a le Malo mo le faaleleia o nofoaga poo maota na faatamaia uma i le mafuie ma le galulolo, lea ua faatautaia nei e le Malo o Samoa ma le lagolago malosi a le Faalapotopotoga o Apitaga mo tagata Soifua mai i Niu Sila (Habitat for Humanity).
Talu le uluai aso na aafia ai afioaga i Upolu, Savaii ma Manono i le galulolo o le faaiuga o Setema, na vaaia ai le faagasolo o fesoasoani muamua aemaise lava i taumafa ma le suavai i aiga e tusa ma le 806 na aafia.
“O le taulai muamua lava na ave i aiga na matua leai lava se fesoasoani na maua ona o le ogaoga o aafiaga o le galulolo, peitai e le mafai ona le vaavaai foi le Komiti i isi aiga, e ui ina manua mitimiti ma e 806 lava aiga na tautuaina i aso uma o le masina muamua e ala i le suavai ma taumafa faapea lavalava”, o se faaaliga lea a Taulealeausumai Laavasa.
Na maea le uluai masina sui loa lea fesoasoani, ua le ave i aso uma ae ua tai vaiaso ma tufa taumafa i aiga nei na aafia. Faaalia e Taulealeausumai o lea ua manino i asiasiga, ua toe foi lava le tele o aiga i le tulaga manuia ma ua le o toe malosi le manaoga sa iai mo taumafa e pei ona sa iai i le faatoa tulai mai o lenei faalavelave faalenatura.
O le suavai o loo faaauau le oo atu i aso uma ona o le toatele ua see i nuu a uta e lei mautu ai ni fesootaiga tau i le suavai ma o loo faaauau lava ona faagasolo le tautua a le Pulega o le Suavai ina ia mafai ai ona faafoi le suavai maua sa masani ai aiga uma i se tulaga lelei atoatoa aemaise i nofoaga fou ua faamautu ai le toatele.
Talu mai le faaiuga o Setema ua oo atu i le $5 miliona tala le tau atoa o taumafa ma le suavai maua aemaise o isi meaalofa aua le tausiga fai pea o aiga ua aafia.
O le fesoasoani lava lea a le Malo e ala i le Komiti lenei o Tali i Faalavelave Faafuasei, ae ua ese mai ai le fesoasoani na ofo atu lava e aiga, uo ma faalapotopotoga eseese mai i Samoa nei faapea atunuu mamao ua maua e nei aiga.
O le isi la galuega fesoasoani lea ua amata fausia ai nei maota i nofoaga ua faamautu ai aiga i lenei vaitau.
O le tele o afioaga e pei ona tapa o loo ua iai nei le faamalosi e nonofo ai i nofoaga maualuluga sei vagana ai pisinisi poo atinae tau tagata tafafao mai ua faapea ona iai le manaoga e toe foi i luga o matafaga aua lava le faatinoga o ia atinae ae o le nonofo mautu ai e le o toe iai se isi o toe manatu e toe foi i nofoaga maualalalo nei mo le faamautu ai o aiga.
O le suiga la lea ua iai nei le faagasologa o fesoasoani muamua e pei o taumafa na taua e le afioga Tauleleausumai Laavasa e manatu ua talafeauga lelei le faatautaia i le maea ai o Novema.
“E le gata i taumafa, suavai, o lavalava ma le tele o meafaigaluega aua le toe
faaleleia o maota ma meatotino a i latou na afaina i le galulolo, ae o lea ua toeititi lava tofu le aiga ma meafaigaluega aua le toe atiae ai o faatoaga a aiga ina ia mautinoa e leai se oge e tulai mai poo se manaoga i le lumanai mo taumafa maua a aiga.
O le mafuaaga lena o le tufa i ai o seti meafaigaluega nei aua atinae o fua o faaeleeleaga mo nei aiga”.
O loo faaauau lava ona vaaia fesoasoani ua taunuu mai i vaiaso taitasi aua i latou ua mafatia ona o le mafuie ma galulolo.
O le vaiaso na sei mavae atu nei na taunuu mai ai le vaa o le fuavaatau a Ausetalia, le HMAS Tobruk ma se isi foi uta, ua le gata i meafaigaluega mo le toe faaleleia o maota ma meatotino ua faaleagaina, na aumai ai ma se taavale tineimu mo le ofisa o Tineimu i Apia, lea ua manatua ai ma le alii o Peter Letiu lea na maliu i le aso o le sunami a o taumafai lea auaunaga e logo tagata nofo tu matafaga i le afioaga o Safaato‘a i Lefaga e o ese ona o le oo mai o le galulolo.
Na foai mai ai foi ma meafaigaluega a le tautua faa tineimu. Na auamai ai foi ma le tele o isi lavalava, faguvai, fualaau ma vailaau faafomai aemaise o taumafa aua lava le tali atu ai i manaoga o le tele o ia aiga e pei ona vaaia le faasoasoa atu i ai o le Komiti o Tali o Faalavelave Faafuasei i le tau faasoasoa atu o lenei alofa o tagata mai i fafo ma Samoa foi mo i latou ua aafia.