O loo fuafua o le vaiaso nei e faailoa mai ai e le faigamalo a le National so latou taofi e faatatau i le Lipoti a le Komisi Suesue lea sa iloiloa le faavae o pulega faaleitumalo laiti i Aukilani aoao.
O ia fuafuaga o le a aveese ai faigamalo laiti e pei ona iai nei Manukau City, Waitakere City, North Shore City, Papakura District, Rodney District, Auckland Regional Council ma le Auckland City.
Ae, o le a tasi se pulega fou ua fuafua mo Aukilani aoao i lalo o le pulega e taua o le ‘Auckland Council’. O lea faigamalo fou o le a pulea e se Pulenuu toatasi ma sui usufono e 23 e palotaina e tagata o Aukilani aoao e aofia ai ma sui Maori e toatolu.
E leai ni nofoa faapitoa mo tagata Pasefika ma Asia, sei vagana ni komiti faufautua a le Pasefika ma tagata Asia. A o ia komiti e leai se malosiaga ma e filifilia e le pulenuu sui o ia komiti, e le o ni sui e palotaina e le lautele. O le a se taofi o loo iai tatou i lea fuafuaga?
O loo fuafua le Malo a le National ina ia vave ona faaofi le tulafono fou mo le faamausaliina o le faigamalo fou mo Aukilani. Peitai ane ou te taofi e le talafeagai lea fuafuaga e ao ona iai avanoa mo tagata lautele e faaalia ai finagalo poo talafeagai suiga fou o loo fuafuaina pe leai.
O le a so outou taofi i nei fuafuaga?
E iai foi o‘u popolega i le faigapalota o sui o le pulega o le ‘Auckland Council’. Le fuafuaga e palotaina sui e 10 mai i Aukilani aoao, ae o isi sui e 10 e palotaina mai itumalo e 4 e tai 2 sui mai itu e fa o Aukilani aoao, 2 sui mo pitonuu o faatoaga poo le ‘rural area’ ma le 2 sui e palotaina e latou o loo faamau o latou suafa i le lola a tagata Maori, ma le tasi sui o Maori e filifilia mai e ‘mana whenua’. O lona uiga e filifilia mai e nuu o Maori e faasino tonu le latou tupuaga mai fanua o Aukilani aoao. O le a sou lagona i lea itu?
Ou te manatu e tatau ona faasafua le fuainumera o sui tauva i itumalo taitasi, aua e le talafeagai le faatapulaia o le 2 sui mo Manukau ae sili atu ona toatele le aofai o tagata, pe a faatusatusa i le North Shore ma isi. Ia te au lava ia, ia faasafua uma sui e 20 e fua i itu e fa o Aukilani aoao e faatatau i le toatele o tagata.
Ua le talafeagai foi le malosiaga ua ave i le pulenuu e toatasi mo le pulega fou o Aukilani aoao. O ia o le a pulea le tala o tupe, pulea le faatulagaina o faiga faavae aua galuega faatino, pulea le tofiina o le sui pulenuu, ma le tofiina o taitaifono o komiti taitasi a le pulega fou. O le a ia te ia foi se malosiaga faaletulafono e faafaigaluegaina ai nisi e avea ma faufautua o lana Ofisa faapitoa. O ia malosiaga, e fou uma ma e le o maua e pulenuu o faigamalo laiti o loo iai nei. E te ioeina lea suiga fou? Faapefea pe a umia e se tagata e le alofa?
O le isi itu e pito i sili ona faapopoleina ai nisi, o le faamalosia lea ona aveesea o aseta taua o loo umia saoloto i le taimi lenei. O le fautuaga a le Lipoti a le Komisi Suesue ia pulea uma aseta e le pulega fou. O lona uiga o sea o le malae vaalele a Manukau lava ia, e silia atu ma le $300 miliona, o le a pulea nei e le pulega fou o Aukilnai aoao. E faapena foi le kamupani o le suavai o le ‘Manukau Water’. O le kamupani lea e pulea e Manukau ma e pito i sili atu ona maualalo le tau o le suavai i lo se isi lava itumalo. O lea ua iai le fuafuaga e pulea e le pulega fou o Aukilani aoao, ae e le toe pulea e Manukau.
O le a sou finagalo i ia mataupu taua? E tatau ona faailoa faalauaitele sou finagalo i ai, ma faailoa i lou faipule. O fesili nei ou te fia fesiligia ai nei le lautele o tatou tagata:
E te ioe i le tasi o le pulega o loo fuafua mo Aukilani pe leai?
E te talitonu e lelei ai auaunaga mo tagata lautele i lea pulega fou pe leai?
Ua soalaupuleina sou finagalo e le Malo i lenei fuafuaga fou pe leai?
E te faatuatuaina le pulega fou poo le pulega o loo iai nei lou itumalo?
E te talitonu e pau ai lafoga totogi (rates) i le pulega fou, poo le a atili ai ona siitia lafoga totogi (rates)?
