E maua taitaia oe e le Selecta DNA
O le faatuputupulaia pea o soligatulafono i totonu o le atunuu nei, aemaise lava foi i le aai o Manukau, ua ae ai se tofā i le Pulega a le Aai o Manukau, le faalapotopotoga a le Victim Support faatasi ai ma le galulue soosoo tauau mai a le vaega o leoleo i Counties Manukau ina ia faalauiloa ni auala e mafai ona fesoasoani i leoleo e vave ona pue i latou o loo faaauau pea ona faia solitulafono, aemaise lava soligatulafono o le gaoia o meatotino aogā a le mamalu o le atunuu, e le gata i fale o aiga, a o totonu foi o nofoaga o pisinisi poo falefaigaluega ma ofisa.
O le Aso Lua talu ai, Setema 1, na tālo ai se fonotaga na faia i le nofoaga o le Kolisi a Alfriston i Manurewa, ma e toatele nisi o le mamalu o le itumalo Manukau na auai atu aemaise le au faasalalalu. Sa avea ma fofoga faapitoa i lena faatasiga le alii pulenuu o Manukau, le susuga Len Brown, o le alii taitai leoleo sinia (Superintendent) mai le ofisa a le Counties Manukau Police, le susuga Mike Bush, le sooupu a le faalapotopotoga a le Victim Support, e susuga Sam Tuaoi, faapea le alii lea o David Morrissey, o le alii o loo faaulu i ai se taumafaiga fou lea na faalauiloa i lea aso, o se polokalame ua tuufaatasia i ai metotia ma le poto faaonaponei, lea ua taua o le SelectaDNA.
O le SelectaDNA, e ui o se mea fou i Niu Sila nei, ae ua faamaonia le aoga tele e pei ona uluai faalauiloa ma faaaoga i le 2004 i Peretania ma Holani. Ua faamaonia mai i na atunuu le faaitiitia o le aofai o soligatulafono o tagata talepefale ma le gaoi, talu mai ona faaaoga lenei metotia.
O le SelectaDNA o se vailaau e le ilogagofie i o tatou mata, ae mafai ona faaaoga e maka ai ni a tatou meatotino poo ni vaega foi i totonu o o tatou fale ina ia faigofie i leoleo ona saili i ai tagata e ono gaoia na meatotino.
E mafai ona faaaoga e tai pei o se kelū lea e nini pe vali ai ni mea, ae mo fale tetele pei o pisinisi e ono faaaoga ai hydra spray lea e otomeki ona pasī atu i le au gaoi i le taimi lava e taumafai ai e toe sola ese i fafo mai le fale.
Foliga ua iloga le aoga o lenei vailaau, aua e pei ona taua o le SelectaDNA e mafai ona pipii mau i le tino o se tagata e oo atu lava i le tasi i le lua vaiaso, ae a pipii i lavalava e oo atu lava i le ono masina o loo mau ai.
E iai foi numera (code) o le a faaaoga i le faatauina atu o nei vailaau, e faigofie ai ona saili e leoleo le tagata tonu e ana le vailaau lea (SelectaDNA) ua pipii pe pisipisia ai le tino o se tagata o loo masalomia i se soligatulafono.
Ua iai ni fale ua muai faataitai ai lenei metotia fou, ma e iai le faamoemoe o se taimi e le o toe mamao, ona amata faasolo mai lea o ni faasilasilaga faalauaitele e faalauiloa ma faamasani atili ai le mamalu o le atunuu i le faaaogaina o lenei vailaau, aua lava le vave ona saili ma maua e leoleo i latou o loo sasao faaafi ai soligatulafono o le gaoi.
