O galuega faatusitala ma galuega faasalalau a alo ma fanau a le Pasefika ua amata nei ona agai atu mo le faalauteleina o a latou polokalame mo le lumanai.
O le faatauaina o le galuega a le au tusitala ma le au faasalalau i leitio, televise ma nusipepa, sa fai ma manatu autu o le fono tele sa faia i le faaiuga o le vaiaso talu ai. O le PIMA poo le Pacific Island Media Association, o se faamalu ua leva ona faatauina ma faavaeina.
O le agaga ma le faamoemoe, o le tuufaatasia lea o tagata Pasefika o loo galulue i lea foi ituaiga galuega, e le gata i lea a ia faatauaina pea o latou tiute e pei ona tofia ma galulue ai.
O le taumafai e fesootai pea ma nisi o auaunaga tumaoti aemaise o auaunaga a le malo i mataupu e aafia ai tagata Pasefika.
Peitai o se fesili ua taoto nei i le laulau fono a le PIMA, o le fia silafia lea poo le a le isi laasaga o le a agai i ai mo le lumanai. E pei ona silafia ua latalata i le sefulu tausasga talu ona faavaeina, peitai o loo tau tolotolo pea ma e lei mautu foi sona lumanai.
O le fono tele sa faataunuuina i le Aso Faraile o le vaiaso talu ai, sa maua ai le avanoa e faasoa mai ai nisi o alo ma fanau a Samoa ma le Pasefika o loo galulue i auaunaga tetele e pei o leitio a Niu Sila, (Radio NZ), o le Radio ZB, Televise Tasi, ma le Televise a Maori.
O le nusipepa a Niu Sila, le Herald sa faatasi mai foi lona sui le tamaitai o Vaimoana Tapaleao. O Vaimoana sa ia maua le faailoga faapitoa a le Qantas o le tausaga nei. (2010 Qantas Junior Reporter of the Year) O le leitio a le Newstalk ZB sa faatasi mai le tamaitai Samoa numera tasi i Niu Sila i le faitauina o tala fou (News Reader) Niva Retimanu. O le alii Tonga o Richard Pamatatau o le sui mai le Radio NZ.
O se avanoa sa matua faafetaia tele ona o le sao o tamafanau a le Pasefika sa sasaa mai e fesoasoani ai i le galuega a le au faasalalau, ma le au tuistala o loo taumafaia le galuega e patino lava i o latou atunuu ma a latou gagana. Sa tatala foi le avanoa e fesiligia ai i latou, pe faapefea ona fai le galuega pe afai e lipotia faafitauli ma aafiaga o tagata Pasefika.
O le tomai ma le faasoa mai o i latou sa fai ma luitau tele, aemaise ai o le fesoasoani atili ma le faaleleia pea o le galuega mo tagata Pasefika, a o galulue ai i totonu o Niu Sila.
E tele isi aoaoga ma polokalame sa faatatau lava i le galuega, sa vaevaeina i ai le mamalu o le aufaigaluega mai kamupani eseese sa auai.
O sui mai nusipepa a Fiti ma Initia, o leitio a Maori ma televise a Tonga, faapea ai le Samoa Multimedia Group, le Radio Samoa ma le Samoa Times sa auai uma ona sui i le fonotaga sa faataunuuina.
Sa maua se faatasiga manaia ma le manuia e ala i mataupu ma polokalame sa faatinoina.
Ua agai nei le PIMA, mo le fuafuaina o se isi laasaga mo le lumanai e ala i nisi o faamoemoe mo se televise faasalalau faapitoa lava mo tagata Pasefika. Sa auai foi sui mai le matagaluega o tagata atumotu o le Pasefika (Ministry of Pacific Island Affairs), ma sa faaalia se agaga lagolago tele o le matagaluega i fuafuaga a le PIMA mo le lumanai. Ua fuafuaina o le isi fonotaga o muamua i le tausaga fou e tatau ona oo atu i ai ua maua se isi faafouina o mataupu tuupoina a le PIMA mo lenei tausaga.
O le Aso Faraile atoa mai le iva i le taeao e oo atu i le afa o le fa i le afiafi sa faataunuuina ai le mafutaga. Sa lagolagoina malosi lea faamoemoe e le AUT, faapea le PIMC i Aukilani, faapea le Pacific Island Affairs. O le sauniga sa tatalaina aloaia ai le fonotaga sa saunoa ai le susuga ia Pastor Lui Ponifasio mo le tatalo. Sa maua foi le avanoa e ofoina ane ai e le AUT ni avanoa faasikolasipi mo soo se tasi lava o fia faalauteleina aoaoga mo le galuega faatusitala ma le faasalalau. Sa molimauina e sui o le komiti faafoe a le PIMA, e faapea o se fonotaga muamua lenei ua faatoateleina ai sui na auai ma o le faamoemoe maualuga lava lea o le asosi mo le lumanai.
Ua ofi atu nei le sui o le Samoa Multimedia Group i totonu o se komiti faafoe mo le PIMA i le lumanai. O le susuga ia Titi Tuigamala ua fai ma sui o le SMG mo le komiti galulue i lalo lava o le PIMA mo galuega faatino.
