O le Aso Gafua na maua ai le avanoa ou te feiloai atu i nisi o le tatou Atunuu sa oo atu i le Ofisa mo se avanoa matou te faatalatalanoa ai i mataupu sa manaomia ai se fesoasoani. O le tele o taimi e pau lava le fesoasoani o loo manaomia o latou sa afifio atu o le faamanino atili lea o ala e ao ona uia i le sailiga o se fesoasoani mai matagaluega a le Malo. O le ofisa a faipule e maua ai le avanoa e toe faafesootai ai matagaluega a le Malo pe afai ua tulai mai ni faafitauli i le va o oe lea e manaomia le fesoasoani ma le matagaluega a le Malo.
Aso Lua (aso 3 o Iulai)
O le taeaopo o le Aso Lua na pue ai la‘u vaalele ou te malaga ai i Timaru. Na valaaulia a‘u ou te asiasi i se aoga o loo aoaoina ai mataupu tau faifaiva. Ou te taunuu atu o faatali mai a‘u e le ulugalii o Ray ma Colleen Brokenshire, o laua ia e pule i le aoga ua ta‘ua o ‘Timaru Fishing School’. E talia e lenei aoga soo se tagata ua silia ma le 18 tausaga le matutua.
Sa ou asiasi foi i se vaa fagota o loo taula i le uafu i Timaru i lea lava aso. O lenei vaa fagota e atoa le 5 i le 6 vaiaso o loo fagota i le sami. E toso e lenei vaa ni upega tetele i le ogasami o Niu Sila. O loo iai uma masini i luga o le vaa e pei lava o se falefaigaluega mo le gaosiga o pusa i‘a mo le maketi. E toso mai loa upega, la‘u mai le i‘a, ma e faamamā ai lava ma faapusa lelei uma e toe foi le vaa i le uafu pe a a‘e le faiva, na o le la‘u lava o le uta ma momoli loa e faatau i maketi i Atunuu mamao.
Fai mai se tasi o tamaitai Rarotoga mai Tokoroa o loo supavaisa i le aufaigaluega o loo gafa ma le faamamāina o le i‘a i luga o le vaa, ua atoa nei lona 6 tausaga o faigaluega i lea lava vaa fagota, ma o le tele lava o tausaga e 6 i le 7 masina e faigaluega ai, ona malolo lea mo le isi 5 i le 6 masina, ae e maua lana $160,000 i le tausaga.
O le faatulagaina o galuega i luga o le vaa e fai sifi auā e lē malolo lava le gaioi o le falefaigaluega i luga o le vaa, e galulue lava mo le 24 itula i le aso mo le 6 agai i le 7 vaiaso.
E taitoafā le auvaa i le potu e tasi, ma e 35 i le 45 le auvaa e faigaluega i le faamamāina ma le faapusaina o le i‘a. O le faiga o sifi, e 6 itula e faigaluega ai, 6 itula e malolo ai. O lona uiga, e taitoalua tagata faigaluega mai le potu e tasi, ae malolo le isi toalua. Ma e faapena lava ona faagasolo ai le sifi seia uma le 6 poo le 7 vaiaso o i le sami.
Fai mai le kapeteni e moni e lelei tupe maua a le aufaigaleuga, ae na o tagata e malolosi le faigaluega e manaomia i luga o vaa fagota.
Aso Lulu (aso 4 o Iulai)
E malama le taeao o le Aso Lulu ua pue la‘u vaalele mo Samoa auā le saofai a Len Brown. Na ou taunuu loa ma feiloai ma le afioga ia Vaimasenuu Zita Martel ma tapena loa teuga auā le faafotutupu a le susuga Taua‘aletoa Len Brown.
E mae‘a fonotaga a le alii Pulenuu o Aukilani ma le Malo Samoa faapea ma fonotaga ma le Univesite Aoao a Samoa i Apia, ua tea le 5 i le afiafi, matou malaga loa i Lepa mo le saofai.
Matou te taunuu atu o loo faatalitali mai le itumalo o Lepa. O tulaga maualuluga masani lava na uia. Na aliitaeao Faolotoi, Maoputaulagi ma Alaalamalae. Na aliitaeao foi Tupuola ma Salevalasi. Ae usu faaaloalo foi laua o Punefu, Malielegaoi ma le Faleatua, upu ia Sa Lefao. O le afioga i le Konesula Samoa i Aukilani, le afioga ia Faolotoi Reupena Pogi na faapogai i le nofo.
O le tofa i le Punefu, le fetalaiga ia Fatialofa, le afioga lava lea i le Palemia o Samoa, le susuga Tuilaepa, le alo o Malietoa, na tasi i ai le sivaloa ma le faatau paia o ia e faapaiaina le nofo a Taua‘aletoa Len Brown.
Ina ua mae‘a faaaloaloga i lea afiafi, matou toe taliu mai i Apia, ma tapega ai la‘u malaga ou te toe foi mai i Niu Sila.
Aso Tofi (aso 5 o Iulai)
E malama le taeao o le Aso Tofi ua ou toe taunuu mai i Niu Sila ma ou sauni loa ou te malaga i Dunedin peitai ane talu ai le puaoa i le malaevaalele i Aukilani, na toe tolopoina ai le vaalele mo Dunedin.
Aso Faraile (aso 6 o Iulai)
E lei susulu le la ae ua pue la‘u vaalele mo Dunedin. Ua lē mafai ai ona faataunuu le ma talanoaga masani ma Tavai i luga o le letio ona e alu ese le vaalele ua ta le 7 i le taeao, faatoa taunuu le vaalele i Dunedin ua tea le 9 i le taeao.
Matou feiloai ma le Komiti Faafoe o le Sosaiete a le Aufaigaluega i Aoga Maualuga i Niu Sila ma fai ai loa sa‘u faamatalaga e faaiu ai le latou fonotaga faaletausaga. O la‘u lui mo lenei faalapotopotoga – ia tulai ma finau malosi mo le lelei o tagata Pasefika i le lumanai.
Aso Toonai (aso 7 o Iulai)
Ou toe usu e pue la‘u vaalele mo le laugatogi a le tauvaga i matata eseese a le WorldSkills NZ sa faia i le aoga maualuga o le CPIT i Kalaisetete. E tasi lava le Samoa na maua lona faailoga, o le alii o Alex Filemoni mai Aukilani.
Matou feiloai ma le faapotopotoga i susuga i faafeagaiga i Kalaisetete i le Ofisa o le faipule o Ruth Dyson. Sa faaalia mai ai le tele o mataupu o loo fia maua ai se faamanino atili ma se fesoasoani, aemaise faatatau lava i fale ua faaleagaina e le mafuie ma e faapefea ona maua le fesoasoani mai le Malo. Ona o le tele o mataupu ae ua utiuti le taimi, ua toe tapena ai le isi fonotaga mo le lumanai.
Ou te taunuu mai i Aukilani ua leva le afiafi. Ona o le valaaulia mai le afioga Tagaloa Fiafia Manase na mafua ai ona ou savalivali e lagolago le faafiafia a le tamaitai o Faalagilagi Chan Farani, o loo tauva i le tauvaga Tausala Samoa Niu Sila 2012.
