Sa ou sauni e nofo ifo loa i lalo Fehi, fai loa ma lau faamasinoga. Peitai, na ona savali atu lava, tu i ou autafa, tuu atu ia te au le api o loo tusi ai lana tala, ma toe savali ese i fafo. Na ou taumafai e valaau atu e taofi mai, ae ua savali lava lau uo i fafo.
Ua ou le mautonu lava i iuga o Fehi, peitai ua ou toe nofo ifo ma susue loa le api e saili le itulau o iai lana tala.
Oka se mea e lei talitonuina e lou loto a o ou faitau i lagona loloto o si au uo ua sasaa nei. Ma o ina tonu lava foi na ou faatoa malamalama ai i le mea moni o loo tupu i totonu o le aiga o Fehi, ma lagona pologa ia o loo saisaitia ai lenei teine talavou, ona o lona lava tama le alofa.
Na ou fafao lana api i lau ato ma ou faatope mai loa i fafo e tuliloa mai si au uo. Ou te savali lava i le auala ma ou loimata i lou alofa i lenei teineititi ma le mea o loo tupu ai. Na toeitiiti lava ou misia, ae o le masusu o le tagi a le tagata na ou tepa ai i le isi itu o le auala, ma ou iloa atu si au uo pele, o loo saofai i lalo o se laau tele, o loo tagi lotulotu ai.
Na ou saofai i ona talaane, ona ou fusi mau lea ia te ia, ma faamalie i ai ona o lou lei malamalama i le mea o mafatia ai. Sa ou faamafanafana i ai ma tauanau malosi ma te o i lou aiga, ae na ou iloa lava lona musu. Na ea mai Fehi ua tau le mafai se tala i le tagi, ma faapea mai, “sa fai lau faaiuga, o le aso e iloa ai e se tasi le mea o loo fai e lou tama ia te au, o le aso lava lea ou te oti ai.”
Na ou galue malosi e tuu ese ona lagona mafatia, seia oo ina malie ma te o i lou fale. Na malie foi Fehi ou te faamatalaina i lou tina le mea o loo tupu ia te ia, ma na lei toe fatali lou tina ae vili loa le ofisa o leoleo. Ma o le aso lava lena, na saoloto mai ai lenei teineitiiti mai sauaga le alofa a lona tama, e ui sa umi sina taimi o taumafai e fesoasoani i faalogona o si au uo.
