Ua amata nei ona oso ou masalosaloga, pe mata e iai se mea lilo o tupu i le olaga o Fehi, poo lona aiga foi, e mafua ai ona pei o se tagata o loo saisaitia ona lagona, ae foliga e tusi loa sana tala, o ina e tau atagia mai ai lona lagona lilo.
Pau le mea ua ou mautinoa, e ese le tele o tupe a Fehi, aua o le tele o taimi, o ia lava e ofo na te faatauina ma meaai poo nisi mea ma te moomia pe a ma savali i le faleoloa o loo lata ane i le aoga.
Sa ou au ma faamatala i lou tina i le isi aso ou lagona masalosalo i si au uo, ae na fautua mai lou tina, ia ou faaeteete ina nei ou soona faamamafa naua se mea e le moni, ona avea lea ma itu e ono tiga ai lagona o si au uo. Sa ou talia le fautuaga a lou tina, ae i le taimi e tasi, o loo musumusu mai pea lou loto, atonu o iai se mea e uiga ia Fehi, ou te le o iloaina.
O nisi taimi pe a fai ma meaaoga ma fesuiai ma api e faitau, ou te taumafai lava e suesue uma itulau o api a Fehi e saili pe leai se isi mea o tusi ai nisi ona lagona ou te le o iloa, ae leai lava se mea ou te mauaina.
Ona oo lea i le tasi aso, sa fai le matou mataupu tau tusigatala i le gagana Peretania, ma o le mataupu sa manao le matou faiaoga, Ms Simpson e agai i ai a matou tala, o aafiaga faanoanoa o faiga saua i fanau. Sa taua foi e Simpson, e pule lava le tamaitiiti poo le a tonu le ituaiga o faiga saua e agai i ai lana tala, poo faiga saua o le soona sasa o fanau, poo faiga saua i amioga mataga, poo sauaga i upu malolosi ma upu masoa e lafo i fanau.
E atoa le vaiaso na tuu mai e Ms Simpson e fai ai le matou tusigatala, ae o le itu lena na pei e faateia ai au, aua o taimi uma e fai ai a matou tusigatala, e toetoe lava o Fehi e muamua ao lana pepa ua uma. Ae o le tusigatala lea, ua ou fiu e tulituli Fehi ou te fia matamata i lana tala, ae lei mafai le teine ona faaali mai ia te au lana pepa.
O le aso lea sa fai ai le ma tonu e tuua le aoga ona ma o lea i le library e faauma ona tusi ai ma tala ma fai nisi ma meaaoga. Na muamua ou taunuu i le library ma toetoe atoa le afa itula o ou faatali, ae faatoa laalaa atu Fehi, ma i lau vaai mai, e foliga o se tagata faanoanoa, ma e le o naunau e alu atu.
