O le isi itu ua amata ona ou matauina, o le tele o taimi ou te valaaulia lava Fehi e sau i le matou fale ma te fai meaaoga ai, ae ou te fiu e faatali se taimi e fai mai ai lau uo ma te o i lona fale, e le taitai lava maua sea avanoa.
O Fehi, ou te matauina lava e moni ua mafana le ma mafutaga, ae foliga o se teine e taofiofi i ona lagona lilo. O taimi uma ou te faamatala i ai ou lagona, ou te faamoemoe lava o le a faapena foi ona sasaa mai ni ona ia mafaufauga o iai, peitai e tele lava ina uma ane se ma talanoaga, e na o le ataata lava ma maofa i ou lagona, ae seasea ou maua mai ni mea se tele mai ia te ia. Aemaise lava pe a ou taumafai e faatalanoa Fehi e uiga i tama, e iai lava ona uiga peiseai e le fiafia.
Sa faaauau pea a ma aoga, ma e taufai tutusa lava maua i le ma naunau ia lelei o ma tulaga i totonu o la matou vasega. O le tele o tamai ma teine e fiafia tele e tafafao solo ma taaalo i taimi o malologa, a o maua ma Fehi, o taimi tonu na ma te o ai i le faletusi a le aoga, e faitau ni ma tusi, pe amata fai a ma meaaoga mo le isi mataupu.
Ua ou matauina nei, e fiafia tele Fehi i le tomai tau tusitala, aua e ese le mananaia o ana tala e masani ona tusi ma aumai ou faitau ai. O se tamaitai e oa i ona mafaufauga, ma o taimi uma ou te faitauina ai se tala a Fehi, e tatau lava ona maligi ou loimata, ona e foliga o i lea e sasaa uma i ai e Fehi ona faalogona.
O le isi itu ua ou matauina it ala a Fehi, e tele ina faamatala ai lagona o se tagata mafatia, ma ni moomooga o se tagata o loo fia saoloto.
