Ina ua ou ae atu i lau aoga fou i se kolisi maualuga i Aukilani, o le teineititi lava na muamua faamasani mai ia te au, o se teineitiiti Tonga, le tamaitai o Fehi. E eseese aoga tulaga lua na ma aooga ai, ae ona ua sifi mai le latou aiga i le pito nuu lea ou te nofo ai, ua faatonu ai loa ma Fehi i le kolisi e latalata i ai, lea foi ua ou amata aoga ai.
Na ma fiafia ina ua faalau mai vasega, e tutusa foi o ma potu aoga, ma ua atili mausali ai lava le ma mafutaga ma lau uo fou lea ua iai nei. O Fehi o se teineitiiti e tino lelei, e le faapea e puta tele, ae e faasasao lona fuaitino, o tino nei ou te faalogo lava e sili ona taua i tagata Tonga, e pei foi o Samoa a o lei oo mai i lenei talutalu fou ua tele ina faataitai tamaitai i fuaitino o teine palagi, a o aso anamua i Samoa, o le fuaitino e sili ona mataina ia i latou, o se tamaitai ae putaputa manaia lona tino.
E le tutusa la ma fuaitino ma Fehi, ona o au e fai sina ou paee, ai ona o lou taumafai malosi e tipi lau ai ona ou te fia tauva lava i se tausala Samoa mai Niu Sila pe afai e oo i ai lou matua. O au tala ia e masani ona fai i si au uo fou o Fehi, e faamatala uma i ai ou moomooga ma au miti i lou olaga.
Ua uma foi ona faamatala ia Fehi se ituaiga o tama ou te fia fai uo i ai pe a oo i ai lou matua. O le mafana lena o le ma faigauo ma Fehi, ua toetoe leai se vaipanoa o lou lagona e lei fofolaina i si au uo.
