I lalo o le tulafono a Niu Sila, i le vaega section 14 New Zealand Bill of Rights Act:
“ Everyone has the right of expression, including the freedom to seek, receive, and impart information and opinions of any kind in any form…”.
I lalo o le tulafono a Samoa –
The Constitution of the Independent State of Samoa – section 13: Rights regarding freedom of speech, assembly, association, movement and residence
• (a) All citizens of Samoa shall have the right to freedom of speech and expression
I lalo o tulafono a Niu Sila ma Samoa ia e ta‘ua i luga e iai lau aia tatau, ma lau faitalia e faaalia i sou manatu i ni mea e tāua ia te oe, e tatau ona faaali mai mo le silafia lautele.
E faagaeetia lo‘u loto, i lo‘u tulaga o le tina Samoa, ma o la‘u galuega faaloia i tausaga e tele, ina ua ou faalogo, faitau i finagalo faaalia o Eliota Fuiamono Sapolu, i lana faaseā ma le toa i le faaalia o ona manatu, e faasino ia i latou e faaulu i ai lakapi i le lalolagi. Malo faafetai i lenei alo o Samoa i le toa ma le tulai mai ma fofoga mea lē fea e fai pea e tagata mo tatou Samoa.
Ona o le toa ma le lē fefe o lenei alo o Samoa, atonu o le amataga lea ona sui o le soonafai o tatou Samoa e tagata lautele.
Atonu o le tele o Samoa, e lagona mea tiga, ae fefefe e tautatala i luma ma faaali mea lē fea e fai mai ia i tatou. Faamalo Eliota.
O Eliota o loo ona silafia foi ma malamalama lelei, afai e liliu i le itu o le tulafono, a Niu Sila ma Samoa, o loo oponi i totonu o le tulafono lona aia tatau e faaali ai sona manatu i se mea na tupu, e tetee i ai.
Pei ona ta‘ua i luga e lē gata i Niu Sila nei a o Samoa, o loo manino le aia tatau i le tulafono.
E faapea foi le faagaeetia o lo‘u loto i se isi alo o Samoa, Mahonri Schwalger, i le lotonuu ma le toa, i le tulai e tautala ma faaali i le susuga a le Palemia o Samoa i lona tiute o ia o le Chairman o le Samoa Rugby Union, mea tiga ma le lē sa‘o, i le finagalo o le captain o le Manu Samoa.
Faamalo faafetai Mahonri Schwalger, i lou lotonuu ma le faaaogāina o lou tulaga e te faaali ai ni mea e lē fea ma lē talafeagai i lau vaai e lē gata ia te oe ae faapea nisi alo o Samoa i le tou aulakapi.
E pei ona ta‘ua i luga, e oponi i le tulafono a Samoa faapea ma le tulafono a Niu Sila finagalo faaalia a lenei alo o Samoa.
E tatau ona faaali mai manatu i mea e sa‘o, na tutupu, ma ni manatu e moni ma faamaoni, e lē gata i lē e ona le manatu, ae maua ai foi se manuia lautele o tatou Samoa.
A tatou vaai i manatu faaalia e Eliota, e matuā lē fea lava le lē amanaia o le Sunami i Samoa, ae amanaia na o puapuagatia o atunuu e tele tupe ma le tamaoaiga e pei o Amerika. O le isi tulaga sa faaseā ai Eliota, ma ou te lagolagoina atoa, o le faaseā lea i le lē lava o le taimi e mālōlō ai aulakapi e iai le Manu Samoa, ma le lē fea o le eseesega o taimi mālōlō o ‘au ia e faapea o ‘au e maualuluga tulaga. O tagata lakapi uma, e tatau ona tutusa lelei taimi e mālōlō ma sauni ai mo le isi taaloga.
Ana lē toa lea alo o Samoa ma tulai mai, atonu e faaauau ai lava mea e lē tatau ona fai, ae afai na iai le soifua maloloina o tatou alo ma fanau o taaalo, e afaina ai foi a latou tapenaga.
Pagā le tāua o le faaali o le lagona o Mahonri Schwalger i le Palemia. Ou te tatalo, ia faatāuaina le faaseā a le tatou aulakapi ia i latou na taitaiina mai le aulakapi a Samoa.
I lo‘u manatu, e tatau ona fai se suesuega aloaia i le complaint a Mahonri Schwalger ma le team. E tatau ona fai se “Commissioner of Enquiry”, ae aua le ufiufia le faaseā lea, ona e tāua tele le aumaia o finagalo o alo ma fanau a Samoa o tauaveina le fu‘a a Samoa i le lalolagi e ala i le taaloga lakapi.
Ia fai nei alo o Samoa ma taiala. Aua le fefe e faaali manatu i mea e tatau ma tāua mo i tatou uma. Aua foi le lafi i tua o le aganuu faasamoa e faapea e tatau ona faaaloalo. A tele foi le faaaloalo, o le tele foi lena o le lē amanaia o o tatou aia tatau i lalo o le tulafono.
