(f.10 “O ona po ia e tausuai ai tagata e toatele, e faalata le tasi i le tasi, ma feitagai i latou.”)
O le soifuaga ua faatusaina i se malafoni. Iai mea e alofia ina ia taunuu i le tini. Tele faailoilo ua valoia ai toeaso, e pei o taua. Ae taatele le tausuai, faalata ma le feitagai, o mea nei ua vaivai ai le toatele. Fetalai Iesu, “…e le mafai lava ona le oo mai o mea e tausuai ai …” (Luka 17:1) A lē mataala, e afe i magāala o le faavaivai poo le fiu. Tele mea tutupu ia Iesu e tatau ai ona lē fiafia. Faalata e le isi soo. Tau tulemomoe isi a o lumanai ona puapuaga. Faafiti le isi. Sa puipuia lona loto ne’i aafia i le oona o faafitauli ma uiga faaletagata.
O nisi mailei a le fili e lepetia tatou.
Lē Fiafia
Tatou te lē fiafia i uiga ma amioga a isi. E lē mafai na taofia ia uiga, e lē pule tatou i tagata ma o latou lagona. Ae mafai ona puipuia o tatou loto mai le lē fiafia, pe a manatu, e iai o tatou lape. E lē fiafia foi isi ia tatou. Tatou te lē faufau ia faaita nisi. Ae tutupu pea vevesi, e lē fiafia nisi. E lē fiafia foi pe a lē tali le Atua ia tatou tatalo. O le Mafia, a lē fiafia mai, fasioti. A po mai, tu vaelua ai, oti le toatasi o tatou, fasioti le toatele o latou. O tamalii e nonofo i lalo, mafaufau, afai ua sala uta, ia tonu tai.
Feeseeseaiga
O ou manatu e eseese ma isi. Eseese talitonuga, taiala ma faavae o aiga. Faataitaiga, afai e te tausami puaa, e lē faapea o le a fafaga fasipuaa ai isi. Tausami au fasipuaa, o isi e lē ‘ai puaa. Ae fealofani pea. Faapefea ona fealofani se ulugalii ae eseese natura, eseese loto? E saili mea e manuia ai, tausi faapelepele i ai. O lapisi e malepe ai ulugalii, ia lafoai. Sa feeseeseai Paulo ma Peteru ona o tagata o nuuese. Ae lei afaina le fealofaniga, auā sa faamanino le finagalo o le Atua, ae lei saili poo ai e sa’o. Iloa lelei e Aperaamo teu le va ma Lota ina ua tulai feeseeseaiga. Fai le tonu, afai e alu Lota i Sasa’e, alu ia i Sisifo. E lei musu foi e laveai Lota ina ua pagatia, pei o le mau tuufaasolo a tamalii, O Samoa e lē se Malo, o uso ma aiga.
E le taofia e feeseeseaiga mea e tatau ona fai. O feeseeseaiga, e lagaina le soifua fetāla’i ma le tofa saili. Ae a lē iloa tali feeseeseaiga, e maua le fefulitua’i ma le feuta’i.
Lē Faamalieina
Iai taimi e lē faamalieina loto ma mafua ai le faatausuai. O manaoga, a lē faamalieina ua faamisa. A lē faia le manao, ua faamavae. O Lusifelo na faapea, ou te alu a’e i le lagi, ou te siitia lou nofoalii (Isa 14:13-15). Sa manao i le mea e lē mafai e le Atua ona avane. Sa lē faamalieina lona taualoa, taumafai loa e fōua le Atua.
O le lē malie, pei o le eleele e lē malie i vai. E fiu e fai i ai uiga lelei. E lē malie pe a lē faafetaia mea lelei sa fai. E sailiili faamālo, a lē maua, ua teva i se isi aulotu e viia ai. O le saunoaga a le Ao Mamalu o le Malo, O le gasese o le faiva o tamalii. O lona uiga, e lē o le faiva o tamalii le faamafulifuli ma le faamaneenee, ae o le gaioi ma le gasese. Ua malie e tautua i le loto lelei, ae lē o se gafa ma se suafa maualuga.
Ia faamalieina loto i le silafia, o le olaga lenei e leai se atoatoa. E lē tutusa taimi, e lē tutusa tagata. Ia faamalieina i timuga ma le laofie. O taimi atia’e, ma taimi faata’ape’ape. E afa ae tua i le oo. E soifua, ae maliliu. Mativa, ia masani foi i le mau. Na o ē ua malilie loto i le Atua, e lē tausuai.
Mala
O Ioane le Papatiso na vavae ese lona ulu. Toatele le auaposetolo na maturo. E lē uma mala ma faigata, ae filifili tatou, pe lotolelei, pe loto’oona. Filemu, poo le masesei. O maota gasegase, e faataotolia ai tagata leaga ma tagata lelei. O fanuamaliu, lagomau ai tagata leaga, taooto ai tagata lelei. Masalo ana pule Iopu i le faatulagaga o lona soifua, e muamua ave lona toalua, e faavalevalea. Ae na ia iloa, e pule le Atua, mai ia te ia lelei ma faigata. E tofotofoina lo tatou faatuatua e mala.
O la Tavita, “Ua sosola i tatou e pei o le manu nai le matāsele a e fai manu…” (Salamo 124:7). O lona uiga e lamatia pea tatou, e iai lo tatou fili. Samoa, e lē mafai na alofia le manu e lele i luga o lou ulu (tulou), ae mafai ona alofia le faia o sona ofaga i luga o lou ulu. E lē mafai ona lalafi mai faigata, le lē fiafia o tagata, faalata ma le feitagai, ae mafai na puipuia o tatou loto mai le leaga.
O la le Poto, ia sili ona leoleoina le loto nai lo se isi lava mea. Leoleoina ia sili atu i lau atotupe, poo tusi faalupega. Auā o le loto, e tupu ai amio. O le poto, e a’oa’oina mai ona sese. A toilalo, e malolo faatamalii, auā e toe oso mālama. O fautuaga, aua le faavaivai ina ua lē fiafia nisi ia te oe. Aua le solomuli ina ua faalataina oe. Aua le tausuai ina ua faatonuina oe. O aoaiga ma upu alofa e tiga, e manuia ai.
O Iesu na puapuaga, fai ma faataitaiga mo tatou. Manatua, o lape ma faafitauli o le soifuaga lenei, o mea a tamalii. O le tagata, e savali i totonu o le malae e fai ai taua. Taua o filifiliga, ae faatuatua i le Atua, na te silafia mea uma. Soifua.