O le mafutaga a mātua ma fanau pe a faafuasei ona faatetea e le maliu ma le oti e lē faigofie ona faamatala, aemaise pe afai ua maliliu uma mātua ae tuua na o fanau. E ui i le oona ma le matuitui o le oti i le mafutaga a le atalii e toatasi o loo soifua pea ma faasaoina e lei aafia i le gasegase faigata o le HIVAIDS, ae sa lototele le afioga Seuamuli Natal i lana molimau na tomua ai sauniga faaiu o lona tina le faletua o Peati Malaki Iupeli, sa faia i le Malumalu o le Ekalesia Aso Fitu o le Toe Afio Mai i Lalovaea.
O se molimau na faalologo uma ai le toatele na auai, a o talatala e le atalii le faigata o le mafutaga i lo latou aiga ina ua faamaonia o ona mātua ma se tasi o ona uso laititi ua maliliu uma nei, ua aafia i le gasegase. “E lei faigofie le matou aiga ona o le maasiasi ma le faalumaina i le vaai mai a tagata”. Peitai na faaalia e Seuamuli o lo latou aiga tagata na pito sili ona maua ai le filemu i le lagolago malosi atu i soo se mea sa manaomia.
Na faamatala le atalii ina ua maliu si ona tamā ma lona uso laititi o Fiti ae tuua na o laua ma lona tina i le tele o faigata ma faafitauli sa latou fetaiai. “Ou te manatua si o‘u tina i lana tala e fai mai soo lava, ia e alofa i ou aiga ma alofa i le Atua, o lana tala foi lea na fai mai ina ua matou o i le falemai”.
Na molimau foi Seuamuli ma ia faailoa i le potopotoga, o lona tamā na ia ave le ma‘i i lona tina. “Ou te lē natia ia te outou peitai o le tala a si o‘u tina, Natal ia faagalo na mea ma aveese ma lou mafaufau, o le mea sili ua ou vaai atu ua e ola ma e malosi ma ua fai foi lou aiga ma ua iai si ou atalii”.
E tau lē mafai ona faamatala i le molimau nisi o mafatiaga o lenei atalii ona o le toe mafaufau i le mafutaga ma lona tina e leai se mea e masepu i totonu o lo latou aiga. “O le manaoga lava o si o‘u tina na ia faailoa mai na te fia aulia le atoaga o le tausaga o si o‘u atalii i le aso 22 o Aukuso o le tausaga nei (2015), peitai o lea ua sola, ae faafetai i le Atua ua na aumai se tina sili ona alofa faamaoni ia te au”.
Na molimau foi Seuamuli Natal ua 18 tausaga o feagai lona tina ma le ma‘i ae e lei malolo e alu e faigaluega auā le tausiga o le latou aiga.
O le uso o lona tina sa latou mafuta seia oo ina maliu, o le tala foi lea a Peati ia alofa i ai.
O le molimau a se tasi o tuagane matua o le tina e aumau i Niu Sila ma lona aiga, e faapea o ia lava e tapatapa atu i ai lona tuafafine i soo se mea ma la te lē tuua lava ona ua malamalama lelei si ona toalua o se papalagi i le olaga faasamoa.
O le taimi ina ua faamaonia le aafia o Peati i le gasegase e lei aveesea ai le la lagolago i ai ma faamalosiau i ai. Na faaiu toe sauniga o le tina i lona oliolisaga tumau i lona aiga i Tulaele.
O Peati o se tina o le a manatua e le toatele i lona sao i le aoaoina o tagata i le faigata o le gasegaseo le HIVAIDS, ma o lona lē matamuli e faailoa lona aafia ua fai ma feau ua faigofie ona ofi i loto o soo se tagata Samoa e faatatau i le gasegase.
Ia manuia lau malaga Peati, ia maua sou nofoaga mau i le nuu ua saunia mo i tatou uma. O le nuu e galo ai mea faigata uma ae na o le olioli ma le fiafia e faavavau.