E lē lilo ia Samoa lo‘u tu malosi i Niu Sila nei ina ua maliu faafuasei Folole Muliaga i le o atu o le kamupani eletise, tipi lana eletise a o la e iloa o loo faaaogā e Folole le okesene e mānava ai.
O loo lausilafia i Niu Sila nei, sa oo i le Chief Coroner o Niu Sila sa fai la‘u talosaga e lē tatau ona ia faia le faamasinoga (Inquest) e sue ai poo le ā le mea na mafua ai ona maliu Folole.
Sa ou finau e lē tatau ona tu ia e faia le Inquest ona o lona sootaga sa ou mauaina, ma le kamupani eletise. Sa malie i ai le Faamasino Sili, e nofo ia, ae ave ane le isi faamasino sa faia le Inquest.
Aisea la o le a ou lē finau ai i se tasi alo o Samoa ua maliu e lei faia lana faamasinoga i le fale faamasino o Samoa talu ai le leai o ni tulafono (policy) e tusitusia e faaaogā i le fale faamasino i Samoa e tusia i lalo e fai ma taiala i galuega a loia uma lava pe o atu i Niu Sila, poo loia i Samoa.
Aisea e finau atu ai i Samoa, ae fai mai o le lē mafaufau o le loia, ae faafefea le tagata lea ua maliu e lei faia e se faamasino lana case ona o le lē sa‘o o galuega a i latou i totonu o le fale faamasino?
Aisea ua maliu ai Kerry Stanley, o se alo o Samoa, e lei faia lana faamasinoga i lana tagi ua tuli sese ai e le Polynesian Airlines?
E faafefea na iloa e loia pe sa‘o le tala a le tagata la e faigaluega i le fale faamasino pe leai, pea ana ia tetee maia se tagi e lē failaina?
O fea se atunuu e faasā ona fesili se loia ma tausisi ia faila le tagi a le tagata lea e iai lana mataupu ma lana aiā tatau i le Faavae o Samoa e ave ai lana tagi i luma o se faamasino e fai; aemaise lava pe afai o se tagata faato‘ā tea mai i tua ma le falemai?
Ua maliu Kerry Stanley o se tasi o clients sa ou fesoasoani i ai.
Ua maliu e lei faia lana faamasinoga i luma o le fale faamasino i Samoa.
Aisea le mea e anamaia ai e Niu Sila le aiā a Folole Muliaga, ma tuumuli le Faamasino Sili ina ua ou finau i ai e tu i lalo, ae alu ane se isi faamasino e faia le Inquest; ae e lē o amanaia e Samoa le maliu o Kerry Stanley, e lei faia lana faamasinoga talu ai le leai o ni policy a le fale faamasino a Samoa e faatonu ai i tagata faigaluega a le fale faamasino ma loia uma e faaaogāina e le fale faamasino tulafono o loo faaaogā ia manino tagata uma.
O lo‘u tiute o le loia i lana galuega (1) O lona tiute i le fale faamasino, e fesoasoani ma fai le mea sa‘o i luma o le fale faamasino. (2) O lona tiute i le tagata lea na sulu mai i se fesoasoani (client).
E leai la se loia e faia se galuega faamaoni pe afai e fai fefe e fesili pe a faalogo atu e lē sa‘o le mea la e fai mai ai le tagata la e musu e talia pepa a le client i le fale faamasino, e faila.
E lē gata i le aiā tatau a la‘u client o Kerry Stanley ua soli, ae o la‘u aiā tatau, ua soli.
E faaauau e a‘u le faia o le mea sa‘o, poo ā lava faaiuga e fai mai, ou te tu i le mea e sa‘o leaga ua maliu se alo o Samoa, e lei faia e se faamasino se faaiuga o lana tagi, talu ai le ave atu o le tagi a Stanley ina ua tea mai i le falemai, ae tetee mai i tua e le aufaigaluega a le fale faamasino i Samoa.
Ou te fesili atu e faasino mai le policy la e latou te faaaogāina ae fai mai e leai se policy.
O tulafono ia e faaaogā e fale faamasino, e pasia e le Palemene, ae o le tiute o Faamasino o le latou iloiloina ma faaaogā le tulafono i mea e tutupu mai.
E iai tulafono e faatapulaa ai le pasia o tulafono e le Kapeneta.
E iai foi tulafono e faatapulaa ai galuega a faamasino.
E iai foi tulafono e faatapulaa ai tiute ma galuega a loia.
E iai foi tulafono e faatupulaa ai le faiga o galuega a tagata faigaluega i totonu o fale faamasino.
E lē pule lava se isi o le aufaigaluega i totonu o le fale faamasino ma fai le mea e manao ai ma fai mai e lē talia le failaina o se tagi a se tagata ona e lē o sa‘o le pepa na ave atu ai luga le tagi.
Ae fesili atu le loia, e faasino mai le tulafono (policy) lea ua lē talia ai le tagi na ave atu, ae fai mai e leai se policy.
Talofa e, pe fia ni tagata Samoa ua maliliu, pe falepuipui sese pe faasala sese talu ai le pule lava o le tagata faigaluega i totonu o le fale faamasino i lana ia tulafono e fai e manao ai?
O ola o tagata ia e feagai ma loia. Ou te lē fefe e fesili ma fai le mea sa‘o leaga o lo‘u tiute lea i le tulafono, ma lo‘u tiute lea i lo‘u talitonuga faakerisiano (ethics).
Poo ā la mea o loo tutupu mai, ou te lē foi e fai le mea e sa‘o mo le ola o le tagata o loo sulu mai ia te a‘u mo le fesoasoni.
