O Iesu o le Meaalofa Sili

Faatalofa atu Samoa le atunuu pele, ua taunuu manuia mai le tatou faigamalaga i le vaiaso mulimuli lenei o le tatou lomiga mo lenei tausaga 2009. Talitonu tatou te taufai ioe faatasi, pe ana le seanoa le alofa ma le agalelei o le Atua, tatou te le aulia mai lenei aso.
Ua alaga tatau ai lava ona tatou sulaina le alofa ma le agalelei o le Atua ia i tatou lana fanau agasala, ua taitai mai so tou soifua faapea so matou ola, o lenei ua toe o se aga tatou faamavae atu i le 2009 ae sagai ane ai o le tai e faafetaiai le tausaga 2010.
Ou te manatu e ao ona tatou auai faatasi ma Tavita e ala i lana Salamo 103:1-5 “Lou agaga e, ia e faamanu atu i le Alii, o mea uma foi o i totonu ia te au, ia faamanu i lona suafa paia. Lou agaga e, ia e faamanu atu i le Alii, aua foi nei galo se mea e tasi o ana meaalofa.
O lē faamagaloina au amio leaga uma lava, o lē faamaloloina ou mai atoa uma, o lē faaolaina mai lou ola ai le tuugamau, o lē faapaleina oe i le alofa ma alofa mutimuti vale, o lē e malie ai lou manao i mea lelei, o lē faafouina lou taulealea faapei o le aeto.”
Ioe Samoa, e ui lava ona o le vaitaimi lenei o le Kerisimasi, ae ao ona toe taulai i tua ma tagai i lena malaga umi sa savalia mai. E moni e faigofie i le vaai faaletagata, ae paga lea, e moni ai le upu a le atunuu, o le tatou faigamalaga ua tumu i le maatui ma le maagao, o le maa faalavea aao e lamatia ai le folauga i lea aso ma lea aso. Ae iai le talitonuga ua faamalie ou manaoga uma e le Atua, aua ua na o ia lava e malie ai o tatou manao i mea lelei. Viia le Atua!
E le o toe po se lilo ua tatou tuvae malie atu nei i le vaitau o le Kerisimasi, o le taimi o le faaneetaga ma le viiga i mea aupito a luga e pei ona alalaga ai le au agelu, ona o le manuia ua oo mai i le lalolagi, i lona finagalo alofa mo tagata.
O le taimi e feofoofotai ai le tasi ma le tasi. O taimi o le faaleleiga i le tele o nisi foi sa masesei, o le taimi foi mo mafutaga e faatasia ai nisi o aiga. A o se taimi foi e fiafia ai le au faipisinisi ona o se vaitau lelei mo tupe maua i le tele o faatau.
O le mea moni Samoa a tatou toe manatu i le uiga moni o le Kerisimasi, ou te talitonu ua matua mamao lava le faauigaina o lenei aso mai le mea na tatau ona iai.
Ua foliga mai ua ave le faamuamua a tagata ia i latou lava, ae ua galo ai lē e ona le aso. Ua ave solo meaalofa i o ma o ae galo ai lē e ona le aso fanau, o Iesu Keriso le alo o le Atua, e ao ona tatou fai meaalofa i ai.
Manaia le upu faa-Peretania e masani ona tatou faalogo i ai e faapea “Jesus is the reason for the season’. A faaliliuina e faapea – O Iesu o Ia o le pogai poo le mafuaaga o le vaitau lenei. Paga lea, ua matua sala ese le faamanatuina o le vaitau mai le ogatotonugalemu o le faamoemoe.
Fai mai le Ioane 3:16 “Aua ua faapea lava ona alofa mai o le Atua i le lalolagi, ua ia auina mai ai lona atalii pele e toatasi ina ia le fano se tasi e faatuatua ia te ia, a ia maua e ia le ola e faavavau.”
Ioe Samoa, o Iesu, o ia lava o le meaalofa a le Atua mo i tatou le lalolagi agasala. O le meaalofa e sili atu i meaalofa uma, e le mafai e tupe ona faatauina. O meaalofa uma foi e alu alu gata le malosi ma le lelei, a o Iesu, e le mavae lona lelei, e tumau lona alofa, e mai le vavau e oo atu i le faavavau.
A o vevesi le lalolagi i le faamanatuina o le aso Kerisimasi ma le fanau mai o le faaola, o le fesili mo tatou Samoa, O le a sau meaalofa mo Iesu i lenei tausaga? Pei ona ou faailoa atu muamua, e leai se mea e fai meaalofa ai fua i isi tagata, e ao ona fai meaalofa i tatou uma i le e ona le aso fanau, o Iesu Keriso lea.
O le mea e faanoanoa ai le loto, ona ua matua faagaloina lava le e ona le aso fanau, ae ua fai solo faiga meaalofa i isi tagata. Samoa e, le atunuu pele, atonu ua tofu i tatou ma manatu e uiga i lenei mataupu, a o le faamalosi a le Taiala o le vaiaso mo oe, e leai se meaalofa sili i lo le talia o le meaalofa mai le Atua, e ala i lona alo o Iesu Keriso, le pepe o le Kerisimasi i lou loto. Tatou talia le meaalofa foaifua a le Atua mo i tatou tagata agasala.
O ia o le tamai mamoe na fanau mai e aveeseina agasala a le lalolagi. Avea o ia ma uo i lenei Kerisimasi. Talia lana galuega faaola na maliu ai o ia i luga o le satauro ina ia ola oe ma au le tagata agasala.
Ou te talitonu Samoa le atunuu pele, o se meaalofa sili lena e ao ona tatou ofoina atu mo le pepe o le Kerisimasi i lenei tausaga. E uma a tatou tupe e le mafai ona totogiina ai le tau o le meaalofa lea. E le gata o ia o le alo o le Atua soifua, a o ia lava o le Atua. O Ia o le Atua malosi, o le Tama o le Faavavau, o le Alii o le filemu.
Fai mai Paulo ia Korinito, “Faafetai i le Atua i lana mea foai fua e le mafaamatalaina!” 2 Korinito 9:15. Ioe Samoa, e ao ona tatou faafetai i le Atua ona o lana meaalofa foaifua e le mafaamatalaina. Se alofa ina a tele o le Atua mo oe ma au.
O le alofa e maualuga e le mafai ona aeina, e maualalo e le mafai ona mauluina, o le alofa silisiliese o le Atua mo oe ma au Samoa.
O le fesili: Aisea tatou te le talia ai nei le meaalofa a le Atua i lenei Kerisimasi? E leai se aoga o le meaalofa pe a le taliaina. Ioane 1:12, “Ao i latou uma o e na talia o Ia, ma faatuatua i lona suafa, na ia avatu i ai o lea manuia, ia avea i latou ma fanau a le Atua.”
Manuia tele le Kerisimasi Samoa, maua se faigamalologa filemu i le alofa ma le agalelei o le Atua. Maua foi se Tausaga Fou fiafia ma le manuia.