O le a ou seu ia i falemua, ae ia seu silasila maia i faletapuai i lau silasila ma lau faafofogaaga Samoa, i le paia o tupu ma e‘e o le atunuu. I le amata maia i le tai Samasama seia oo atu i le tai Ulaula o le Tui Manu‘a na tauilo ai malo, tulouna Samoa, o oe o le Aomamala.
Faatulou atu foi i le aufaigaluega paia a le Atua, o loo talafaauto i itu e fia o Aotearoa nei, ona o le Atua ma lona finagalo i le tau asuina o le vai o le ola. Tulou, tulou, tulouna ia.
Avea ia lenei avanoa i lenei nusipepa e momoli atu ai se lagona ia te au o le auauna ia te outou uma o le paia o le Atunuu o loo i Niu Sila nei auā le tatou taunuu faatasi mai i lenei Tausaga Fou.
Ou te muamua lava momoli le faafetai i le Atua o i le lagi. E ui lava i le tele o peau lagavale o faafitauli sa feagai ai ma i tatou, ae ua faamalo pule le tatou Tapaau Silisiliese i lana alofa tunoa ma lona agalelei ua mafai ai ona tatou aulia mai ma le manuia lenei Tausaga Fou 2011, a o tatou
maua pea le saogalemu ma le toafilemu ona o lana puipuiga ma lana tausiga mai lea aso i lea aso.
E momoli atu foi le faamalo ma le faafetai i lo tatou Atunuu, tupu ma e‘e o Samoa, tumua ma pule ma aiga.
Faamalo le onosai. Faafetai i le tauaveina o tiute ma galuega fita, aemaise tiute faaleaiga, tiute faalegaluega, tiute faaleekalesia, tiute faaleatunuu, auā le sailiga o se manuia mo tupulaga lalovaoa.
Faafetai le tautua i soo se tiute. Faamalo le galulue i soo se galuega, i soo se matata. E tāua tele lenei faataitaiga lelei. E o tutusa le tatou galulue ma le poloaiga a le Atua, “ia ai au mea ‘ai i le
afu o lou muaulu.”
O le tatou galulue punouai i tiute eseese o lenei olaga, o se faataitaiga lelei tele lea mo le tatou atunuu aemaise tupulaga faia‘e, o latou nei o le a avea ma taitai o le lumanai.
Faafetai tele Samoa mo lau tapuaiga. Faafetai mo la outou lagolagoina i soo se tulaga ou te tu ai mo le lelei o le atunuu lautele, e lē gata o Samoa, a o le loaloa o le Pasefika i Aotearoa nei.
Faafetai foi i lo‘u aiga atoa uma lava i la outou lagolago ma fautuaga lelei e fesoasoani i lo‘u mafaufau vaivai.
Faafetai foi i le Atua, e ui ua toesea le toatasi o le matou aiga i le vaitaimi o le Kerisimasi, ae o loo soifua mai lava le toatele.
Atonu e talafeagai le fai atu o sa‘u tala puupuu e faatatau i lo‘u aiga.
Ua avea le maliu i Samoa o se tasi o poutu o le matou aiga, o lē sa nofo mai Samoa ma tausi le aiga, ua toe laga ai ni fesili e faatatau i le lumanai o le matou aiga.
O le mea ua tupu, ua saili poo ai e mafai ona foi i Samoa e nofo ma tausi le aiga.
Ua maitau atu, e moni ua ola le aiga, ae o le toatele ua ola i atunuu o i fafo. Ua maitau foi ua toaitiiti le fuainumera o latou o loo malamalama i le faavae o le aiga ma le mafuaaga na tuua ai Samoa mo Niu Sila. O le toatele foi ua lē malamalama i le gagana faapea foi gafa ma fesootaiga o lea tagata i lea tagata.
Ua foliga nei afai o le ā se finagalo o le Atua, ae amia tagata matutua o loo totoe i lo matou aiga, ona tulai mai lea o le fesili, e faapefea nei ona tumau le malosi o le aiga mo le agai i luma?
Faapefea ona faamaopoopo mai tupulaga na fananau i Niu Sila ma isi atunuu o i fafo e tauave o latou tofi o suli o le aiga? Faapefea ona faatosina mai tupulaga ina ia faatāuaina o latou tiute o i latou o tagata Samoa – ia tautua mo le aiga, nuu ma le ekalesia?
Afai o le tali o le faataunuu pea o mafutaga faaleaiga, o le Fesili o talafeagai na o le mafuta lava pe a oo mai faalavelave? E talafeagai na o le faatasi o le aiga i taimi e fai saogatupe mo lea faalavelave?
O talafeagai le fai o mafutaga faaleaiga ma faamasani tupulaga i le ‘avamalosi ma taaloga faitupe?
E faapefea ona tatou fesoasoani atu i tupulaga ua faamuamua ia i latou le tafao ma ana uo ma le taumafa ‘avamalosi, ae ua lē toe faatāuaina le auai i mafutaga faaleaiga ma mafutaga faalelotu?
E faapefea ona tatou fesoasoani atu i tupulaga ua amata ona aloese mai le aiga ona ua talitonu faapea – ‘too much faalavelave means no money for me?’ E faapefea ona tatou fesoasoani atu i tupulaga ua faapea mai o ia o le tagata Niu Sila ma e lē malamalama i Samoa?
Ua mafua lenei mau fesili, ona ua tele suiga ua iai i le matou aiga, ma ua ese foi foliga ua iai – o se aiga Samoa ua leva ona aumau i Niu Sila.
I lo‘u lava taofi, e telē le tāua o la‘u gagana Samoa ma la‘u aganuu, ma a‘oa‘oga o le faa-Samoa na maua mai i o‘u mātua, ma o loo aogā ia te au i le tauaveina o a‘u galuega ma tiute faafaipule i Niu Sila nei.
Ou te lē mimita pe ou te faamaualuga ai ae na o le naunaugataiga ia ou auauna ma le faamaoni i luma o le Atua soifua, aemaise le mamalu o le tatou Atunuu, ma faasoa atu i ni o‘u mafaufauga vaivai, atonu e iai se aogā e faatupu manatu ai i tupulaga i Niu Sila nei.
Faaiu atu sa‘u faamatalaga, ia alofa le Atua tumau pea le soifua laulelei ma ana faamanuiaga i tupu ma e‘e o Samoa, faapea le aufaigaluega paia a le Atua, ae faapitoa ni faamanuiaga mo tupulaga talavou mo le lumanai.
