O faiaoga, e lē o ni Babysitter, o Polofesa a‘oa‘oina
E lē o se faafitauli e fou i Aoga Amata, ma Aoga Faataitai, le mataupu o le lē totogia o pili o alo ma fanau laiti o loo aoaoina i nofoaga e pei ona faatulagaina mo i latou. O se tasi o Aoga Amata i Aukilani i Saute, sa toe fafaguina mai lea faafitauli ina ua feiloai ma le Samoa Times, i nai vaiaso ua mavae.
O lipoti ma tala o le tupe a lea aoga, sa faailoa ai e tusa ma le $16,000 se vaega tupe o pili o le fanau e lei totogiina ane i le tausaga talu ai 2013. O le tausaga nei, ua toe ausia foi se fuainumera e tusa ma le $14,000.00, a o lea faatoa ‘afa le tausaga. O se tulaga ua faapopoleina ai tele faiaoga ma le komiti faafoe, ona o le afaina ai o le lumanai o le aoga, pe afai e faaauau pea lea tulaga.
Sa faailoa foi e se tasi o faiaoga o lea lava aoga e faapea o le $16,000 e pei ona ta‘ua sa lei totogia i le tausaga talu ai, ua mae‘a ona faia i ai se faaiuga a le komiti faafoe o le aoga. O lea faaiuga, ua faamagaloina ai lea vaega tupe tele.
O le $14,000 e pei ona ua nofo ai nei le aoga, e lei faia i ai se faaiuga, ma e lē o manino foi i le taimi nei, pe o le ā se faaiuga talafeagai o le a faia i ai. Ae o se faanoanoaga tele o le pulega o le aoga, ona o le faataligatuli pea o mātua i lea mataupu, pe a talanoa atu i ai. O nisi foi mātua e pei lava e leai se mea o tupu, ma ua atagia ai le agaga o le lē kea, ma le lē popole.
E faapefea ona oo atu i se tupe tele pili e lei totogia?
O le tali mai a le faiaoga i lea fesili sa ia ta‘ua ai e faapea, o le mafuaaga ona o le toatele o fanau laiti, sa amata mai lava ona ulufale mai mo le taimi muamua, e lē fiafia lava e totogi pili. E oo lava ina mae‘a le lima tausaga poo le ova atu foi, ma ua siitia mo aoga maualalalo, ma tuua foi le aoga amata, ua leai lava se faamoemoe e manatu ane i aitalafu mo ia tausaga e tele. O nisi mātua sa faamaoni i le amataga, peitai ane o tausaga mulimuli ane, ua aafia atu ai lava i lea faama‘i ma o atu ai lava ua lē toe manatu mai.
Aisea na lē tutuli pe faamalolo ai ia fanau, ina ua tele aitalafu o pili le totogia?
E faigata tele ona faia lea tulaga, ona o le matou naunautaiga, ia aoaoina pea le fanau, ma o le faatinoina foi o le galuega, e faia i le alofa faamātua i fanau. O le ala lea, o le faigata tele ona faia se faaiuga e tutuli pe faamalolo lē tumau foi i latou.
Ae sa maualuga pea lo matou talitonuga, a alofa moni mātua i fanau e pei ona auau i ai, o le lē taofia foi lo latou fesoasoani mai i le galuega, ma o le a lē teena foi lo matou faatauanau atu i ai. E faia pea la matou pitolaau, o le faamanatu ma talosaga i ai, ia ae pagā lea, e pule lava le matua ia, e pule foi le tama a le loomatua ia i ana tupe.
E tele ni aafiaga o Aoga Amata pe afai o le a faatuputeleina lea tulaga lē manuia. E ono aafia le totogiina o faiaoga, o le a lē sologa manuia foi fuafuaga ma polokalame faataatitia a le aoga.
Aemaise ai, o se aoga o le a mativa i alaga‘oa, ma mea faitino e fesoasoani ai mo le faaleleia ma le agai i luma o aoga a tamaiti. A o se isi aafiaga tele, e ono toe palasi ane, ma le faamanuiaina ai o le taumafai o fanau, i nisi o laasaga mo le lumanai, ona o le lē faamaoni i le amataga.
E lē sese upu a le Tusi, ‘O fua e te lulu, e te toe selesele foi i ai.’ A lulu le lē faamaoni, o le a selesele foi le lē faamaoni. Oi talofa i fanau, o le a latou amoina lava lea avega mamafa, talu ai le faatamala o mātua.
Afai foi ua lē totogia pili, ona o le lima vaivai i le tamaoaiga, e tele avanoa ma auala e talanoa ai ma osifeagaiga lelei ma faiaoga ma le aoga, ae lē o le taumafai e sola ese mai le faafitauli.
I suesuega lava ia a le Samoa Times sa faia i le tulai mai o lea mataupu, sa fesiligia ai le tele o isi Aoga Amata i totonu o Aukilani. Na maua i le tele o aoga sa talanoa iai, e lē o ‘asa se aoga ma lea faafitauli.
Peitai, e lē tetele ni vaega tupe o aitalafu ai mātua, ma e lē o afaina tele ai foi fuafuaga a aoga, ma ua faamagalo foi i ai i mātua ma fanau sa feagai ma ia vaivaiga.
Ua mautinoa o le 60% o Aoga Amata i Aukilani, o loo aafia i lea lava faafitauli, 30% e lē o afaina tele ma o loo manu‘a mitimiti, ae 10% e lē o afaina lea.
O le toatele o faiaoga o Aoga Amata i lenei vaitaimi, ua mae‘a ona faauuina mai iunivesete, ma ua tauaaoina foi tusipasi taualoa mai le Matagaluega o Aoga. E lē o toe tutusa ma le sefulu tausaga talu ai, sa iai lava faiaoga sa feagai ma le galuega, ae lei tauaaoina tusi faamaonia.
O lona uiga ua matuā siitia le pitolaau a faiaoga i le tulaga ua lava tapenaina mo le aoaoina o fanau, peitai o loo faatauagavale pea i ai le toatele o mātua i la latou galuegafai. E lē o ni tausitama, e lē o ni tuugapalai, a o ni Polofesa mo aoaoga, ma le faatinoina o galuega faafaiaoga.
O le isi faafitauli maoae ma o loo faatupulaia foi, o le lē auai lea o mātua i fonotaga faatulagaina a aoga taitasi. O fonotaga a mātua ma faiaoga o aoga, o se auala lelei tele lea, e fesootai ai, ma mafana le sootaga e soalaupule ai mataupu mo le atinae o aoga ma fanau.
Afai e lē tausisi ma naunau e auai i fonotaga, o le lē mafai foi lea ona maua uma, ma malamalama lelei i le fagasologa o polokalame, ma o le a lē manino foi mātua, poo faafefea le taumafai o alo i totonu o aoga. O le pogai lea o le lē kea, ma le lē naunau e faia se mea lelei, ona o le oge i faamatalaga ma manaoga o faiaoga.
E tatau ona galulue faatasi mātua ma faiaoga, o le aogā silisili lea o fonotaga ma le mafutaga a mātua e pei ona faatulagaina i totonu o aoga uma lava. E lē gata foi i Aoga Amata, ae faapea foi i totonu o aoga maualalalo, ma aoga maualuluga.
E lē taumate foi, o le manuia lea ma le fua mai o galuega lelei mo le fanau, ae faapea foi faiaoga ma le aoga. O le lē totogia o pili o fanau, e ono tapunia ai ia nofoaga, ma aafia tele ai aiga mo le lumanai.
