“Ua iloa e faipule o le faafaletui, ma ua lagona ai le lē fiafia”
“Ua iloa e faipule o le faafaletui, ma ua lagona ai le lē fiafia”. O le saunoaga mai lea a le Peresitene, susuga Vaaelua Eti Alesana, ina ua fesootai i ai mo se faamatalaga e tusa ai o le $30 afe tala na maua i se suegatupe a le vaega faaupufai na faia i Ausetalia a o loma le palota na faia ia Mati o le tausaga nei.
“E lei oo mai i totonu o le faafaletui se faamatalaga o lena seleni ma le suegatupe. E lei maua se finagalo o le taitai le afioga Palusalue Faapo II, e tusa ai o lea mataupu, ae o le faamatalaga a le Peresitene, o le afioga Palusalue na malaga i Ausetalia ma le tofa Lealailepule Rimoni faapea le susuga Papalii Panoa Tavita Moala mo lea sailigatupe na ta‘u ai le vaega faaupufai.
O se isi molimau a le Peresitene e iai nisi seleni na faameaalofa atu e nisi e lagolago i le pati mo le faia o a latou tapenaga o le palota tele, ae e lei oo atu foi ni seleni ma ni faamatalaga i le komiti sa nafa ma galuegafai.
“Ua oo mai foi ni faamatalaga mai ia i latou na aumai ai na tupe ae e lē o malamalama i ai matou”. O le fesili na tuusao i le Peresitene pe o ā mai le gasologa o le vaega faaupufai talu ona mae‘a le palota ma filifilia lona taitai fou ina ua soloia le tofi faipule o le taitai na tusiaao i ai le faafaletui ina ua mae‘a le palota. O le saunoaga a le Peresitene, e iai faafitauli o loo feagai ma le Tautua Samoa i lona taitaiga, ma e lē o talia lelei e nisi o faipule. E lei ma‘oti mai se faamatalaga a le Peresitene poo tonu vaega o loo mafua ai lea tulaga, ae o lana faamatalaga e foliga i lana matau o le taitaiga o le pati.
E toalua sui ua mautinoa i le taimi nei o le a tauva mo le Tautua Samoa i faiga palota laiti o le a faia i le Aso Faraile 29 o Iulai 2011. O se tamaitai faiaoga, le afioga Alai‘asa Elena mai Falefa o le a tauva mo le itumalo o Anoamaa i Sasae, ma le alii fomai le afioga Lealiifano Dr Iopu Tanielu, o le a tauva mo le itumalo o Vaisigano Numera Tasi.
Ua iai isi sui ua laumanu‘ia o le a tauva mo lea vaega faaupufai i itumalo o Satupaitea ma Aleipata Itupa i Luga, peitai e iai nisi o vaega o loo tau faamautu ona mautinoa lea o ia sui ma faatoa faalauiloa mai ai foi o laua suafa.
Ua faaalia foi e toatolu nisi sui tauva o le Tautua Samoa o loo fia tauva ae ona o moliaga o faiga faatosina ua faamaonia o loo faatali ai se fautuaga a le Loia Sili a le Malo pe mafai ona tauva i isi o latou suafa matai mai itumalo sa tauva ai i le palota tele a le atunuu ia Mati o le tausaga nei.
O le HRPP e toatasi le sui ua faailoa i le taimi nei, o le afioga Seuala Patone mo le itumalo o Aleipata Itupa i Luga. Ua mae‘a ona momoli lea sui tauva i le taitai o le HRPP.