Poo le ā le maualuga o le tofi e umia e se tagata ola, e tatau ona fai ma le faamaoni i luga o le tulafono galuega uma. E leai se eseesega o le tulafono a Niu Sila ma le tulafono a Samoa.
Sa tulai i se fale faamasino i Aukilani i le vaiaso na tea nei se alii papalagi o Roger McClay, sa i le Palemene a Niu Sila mo le 15 tausaga. O ia o se alii lauiloa. O ia foi sa ia umia tofi maualuga o le sosaiete o le ‘World Vision’. Sa tu i le faamasinoga i le vaiaso nei i ni moliaga matuia. Ua molia Roger McClay ona ua ova i le 2 tausaga o ona faaaogā le tupe e tusa ma le $6339.30 mai tupe a le World Vision, e totogi ia ana malaga i lana taavale ma vaalele, fai mai o ana galuega mo le World Vision. Ae maua ane, o malaga a Roger McClay sa malaga fua i vaalele ma taavale ona e maua mai e ia i le malo o Niu Sila, malaga fua (travel perks). Ona o McClay ua leva ona i totonu o le Palemene a Niu Sila, o loo maua lava ana fealuai fua mai i le malo. Ae lē gata i lea, na amata i le 2005 ona galue lenei alii mo le World Vision ma o lona totogi i le tausaga e $66,000 tala. E maua foi le isi ona totogi e $25,000 i le tausaga mai le isi foi faalapotopotoga, “Keep NZ Beautiful” o loo fesoasoani i ai. O lona uiga o lea ua maua nei faiga lē manuia, e totogi faafia lea alii mo galuega e tasi (double dipping).
Poo le ā le maualuga o le tulaga o le tagata, e faasā i le tulafono ona faia ni mea lē sa‘o ma solitulafono pei ona ta‘ua i luga.
E leai se eseesega o le mea lea ua molia ai lea alii maualuga i tulaga uma i Niu Sila ma le mataupu sa ou ta‘ua ai faifeau ia e maua totogi mai i Ekalesia, ae a o e fai maliu, ma faigalotu faamafanafana i se aiga, ma toe totogi i tupe i totonu o teutusi (double dipping).
Soo se galuega e tau i tiute faalelotu, afai e maua se totogi poo se peleti poo se stipend, o totogi o le faifeau, e lē tatau i le tulafono ona toe totogiina faifeau, i ni tupe e tuu i teutusi, e pei ona ta‘ua talu ai. Afai e alu le faifeau i luga o lana galuega, ae totogi e le Ekalesia le pasese e alu ai, a maua e le faifeau soo se tupe lava, o le tiute o le faifeau i le tulafono, le ave o le tupe i le teutusi, i le failautusi o le Ekalesia. E solitulafono le faifeau pe a ona umia se tupe maua, i tulaga ia ua ou ta‘ua.
E mafai ona molia soo se faifeau lava i le tulafono, pei o Roger McClay lea e ta‘ua i le totogi faalua (double dipping). E lē malaia se isi pe a lipoti se tagata e faia se mea sese, e āfaina ai isi. Ia tatou mataala uma ia faasa‘o le faiga o le galuega o loo ta‘u ai le suafa o le Atua.
E faapea foi galuega a loia. E iai le aiā tatau a le loia pe totogi galuega fai faaloia. E iai le aiā a le tagata o loo fia maua se fesoasoani i le tulafono e fesiligia ai le loia i le amataga o le mataupu pe fia le totogi o le mataupu. E iai pepa e saini o le feagaiga tusitusia lena a le loia ma oe lea na e talosagaina le fesoasoani faaloia.
E lē tutusa totogi o loia. E iai lou tiute e te fesili muamua ai ia e malamalma a o lei osia le feagaiga tusitusia ma le loia. A e lē fiafia ai ona sue lea o se isi loia. O lau aiā tatau lena i le tulafono o lou fesili muamua, ona e alu lea e sue se isi loia e te gafatia le totogi. E osia loa le fegaiga ma amata galuega faaloia, o le tiute o oe lea e fai e le loia lau galuega, o le totogi o pili a le loia mo galuega fai. E iai tulafono e faatapulaa ai galuega a loia, o tulafono na e tusia i le feagaiga lea e saini e oe ma le loia.
E eseese matafaioi a loia, eseese le totogi. E eseese le iloa ma le umi ona feagai ma le galuega loia (experience). O se faataitaiga, o se loia ua leva ona galue ma ua lautele lona silafia ma lona experience e faaaogā i le mataupu, e maualuga atu le totogi i se loia faato‘ā uma mai lana aoga. O loia e iai nisi faailoga o loo faaaogā mo le galuega fai, e maualuga atu le totogi i le loia, e na o le faailoga loia o loo faaaogā. O le loia ua iloga ni faamasinoga e n ate faia ma manumalo, e sili atu lona experience i se loia faato‘ā faataitai, e maualuga lona totogi.. O lou tiute o lou fesili i le loia i le taimi lua te feiloai ai, ae lei amataina le galuega.
E leai se tiute lautele o se loia e faia fua ai ni galuega.
O tagata mautofi uma e iai faifeau ma loia, e leai se isi e sili a‘e i le tulafono (No one is above the law).
O tagata uma lava, e sili le fesili ma malamalama auā e lē avane lou lē malamalama i le tulafono ma mea e laveai ai oe i sau solitulafono (Ignorance of the law is no excuse).
A e lē malamalama e sili lou fesili, ae aua le ave le upu faalele e faaleaga ai le igoa o le isi tagata ola, i luga o lou lē malamalama, auā e te lavea ai i le tulafono a Niu Sila faapea Samoa pe a su oe e le tagata lea ua e faaleagaina le igoa.
O tatou uma e iai a tatou aiā tatau e puipuia i le tulafono. O tatou uma e iai o tatou tiute i le tulafono (We have rights, we have duties in law).
