Na iloa i le faagasologa o suesuega o molimau a leoleo i le moliaga fasioti tagata o le alii o Jonthan Patrick Crichton o Malifa, le lē sosolo lelei o molimau a leoleo na tuuina atu i le faamasinoga i ni mau faavae e lagolago malosi ai le tuua‘iga e faamautu ai se finagalo o le faamasinoga, o lē na molia lea ua lē faamaonia lona moliaga, na faia se gaioiga solitulafono na mafua ai le maliu o le alii Niu Sila o Hans Dalton a o taofia i le vaaiga a leoleo i le falepuipui i Tafaigata e mafua ona o ni aafiaga o lea alii i le gasegase o le mafaufau (mentally ill person).
O le taunuuga o le moliaga na faamaonia e le laulau o faatonu e toafā, peitai o le malosiaga faaletulafono o le faamasinoga na faaaogā e le afioga i le faamasino sinia o Lesatele Rapi Vaai e teena ai lea faaiuga a le aufaatonu ae suia i le lē faamaonia o le moliaga o le fasioti tagata faamoemoeina.
O le taimi na tupu ai le faalavelave i le aso 26 o le masina o Tesema i le tausaga e 2012 sa faaalia e leoleo i lena taimi na pule Hans i lona ola. E faavae lea taunuuga i le maua atu o le alii o loo maliu i totonu o le kalone vai. Peitai e lei mafai e leoleo ona faailoa i lena taimi pe na faapefea ona maliu.
O le malosi o suesuega a le autusitala faaopoopo i ai ma le talitonuga o le tina o Hans ma lona aiga e lei pule o ia i lona ola, na toe sailiili ai e leoleo le faalavelave ma aumai ai loa le taunuuga ua tuua‘ia Jonathan, sa loka i se tasi o potu poo sela o le pasima a o suesueina i se isi solitulafono tau fasioti tagata lea na maliu ai se alii avetaxi i Vaitele i le nofoaga sa faatau ai iunite o le eletise e totogi muamua le cashpower.
O le lua o faamatalaga a Jonathan na tuuina atu i leoleo ma ia tautino ai lona faia o le solitulafono, na agiga i le faamasinoga le lē lava o molimau e lagolago ai.
O lea ua saga faamaonia lea tulaga ina ua lē faamaonia le moliaga ma ua talia lelei e le aiga o lē na maliu ona o lo latou talitonuga, e leai se gaioiga na faia e Jonathan, ae agai so latou lagona i le lē lelei ona faatino o le tiute o leoleo o le falepuipui e fesootai i le maliu o Hans. Peitai o le fesili o loo fia iloa pea sona tali, pe na faapefea la ona maliu lē na aafia.
O lea ua faaulu i le faamasinoga se tagi a le aiga o loo taulamua ai le tamaitai loia i Niu Sila le Afioga Leulua‘ialii Olinda Woodrooffe.
O Oketopa o le tausaga ua mavae na faaulu ai lea tagi ma o loo faatūtū i le Matagaluega o le soifua maloloina na taunuu muamua i ai Hans mo se togafitiga o lona gasegase o le mafaufau, lea na latou faia ai le faaiuga e ave i leoleo e taofia i le falepuipui ona ua tulaga faaletonu uiga faaalia o lea alii.
O loo iai le talitonuga o le a tuuina atu foi le mataupu lenei i le faamsinoga e saili tonu ai le mafuaaga o le maliu poo le cause of death, pe a fua i le molimau mai le falemai sa fofogaina a o suesue molimau faasaga i le alii o Jonathan.
Na ta‘ua ai ni manu‘a i lona tino peitai o le molimau a le fomai e lē mafai e ia manu‘a na vaaia i le tino o Hans ona taunuu i se faaiuga o le mafuaaga lea o le maliu.
