E pei ona tauva ‘au e lua i le tausaga na tea nei i se finauga o lauga (debate), o le ‘au a faiaoga ma tamaiti aoga a le AUT na fetaui ma le ‘au mai sui o le komuiniti.
O se tasi lea o se faatasiga faapitoa o loo sauni ma tapena e le susuga ia Polofesa Tagaloa Peggy Dunlop, ma le aufaigaluega a le Iunivesite a le AUT – le Auckland University of Technology.
I se saunoaga a le tamaitai polofesa i le Samoa Times na ia faailoa ai, o le mafuaaga o le tauvaga, o se avanoa e faasoa ai ma faatāua ai le Gagana Samoa, e pei ona faamanatuina i tausaga taitasi, i totonu o Niu Sila i le masina o Me o le vaiaso a sau nei, ua faaigoaina o le ‘Vaiaso o le Gagana Samoa’.
I le tausaga 2012, sa amata aloaia ai lenei tauvaga faapitoa a le AUT, i le latou lala i Manukau, sa toatele i latou na auai ai e maimoa ma tapuai sui o latou ‘au, lea na fetaui ma finau, i le fetufaaiga ma le faasoaina o manatu ma le tomai, i lauga i le tatou Gagana Samoa.
O i latou na auai i le ‘au manumalo a le komuiniti, sa taitai e le afioga ia Tuiataga Faafua Tautolo, faatasi ai ma Tauanuu Perenise Tapu, o le sui o faiaoga, o le susuga faafeagaiga Rev Dr Featunai Ben Liuaana, faapea ma Ane Ponifasio o le sui o le aufaasalalau.
Na toilalo le ‘au a le AUT, lea sa taitai e le Afioga Salā Faasaulala Tagoilelagi-Leota, ma lana ‘au o sui aooga, ma nisi o le aufaigaluega a le AUT, o Gary Tautalafua, Salainaoloa Wilson ma Rev Faleu Joe Futi.
O le aufaamasino i le po lea, o le afioga Fonoti Dr Iupati Fuatai, Faimai Tuimauga, ma Pito Faalogo.
Sa auai foi i lea po le afioga le faipule o Magele, Su‘a W Sio, sa faia ai foi sana saunoaga faapitoa. Sa faafetaia e le sui o faamasino, ia ‘au e lua, e lē gata o le tausaafia, ma le mālie o faamatalaga, ae o le maualuga o le tulaga o tapenaga mo le finauga, o le mataupu, e faapea: ‘O le Matafaioi a mātua, le aoaoina o le Gagana Samoa i le fanau’.
O le Aso Lua 28 o Me i le 5.30 i le afiafi (i le potu MB210), ua sauni atu ai foi le AUT mo le taamilosaga o lenei tausaga. O le mataupu o le a finauina, “O loo ola ma mauaa le tautua i Niu Sila”. O le ‘au a le AUT o le a latou finau i le leai (negative), a o le ‘au a le komuiniti o le a finau i le ioe (affirmative).
“O le autū o le finauga o le 2013, ia mafai ona auiliili mai le loloto ma le uiga moni, o upu aemaise le aogā o le tatou aganuu. Ia aofia ai mataupu tau le vafealoai o tagata, i le va o aiga, lotu, nuu, aemaise le tulaga o le tatou Faa-Samoa i totonu o Niu Sila i le taimi nei”, o se faamatalaga lea mai le afioga Tagaloa.
O le a valaaulia aoga eseese mo lea faamoemoe, ma o le a maoae foi nisi sui foi o le a sauni mai mo le tauvaga. O le faamoemoe a sui aooga a le ‘au a le AUT, o le a latou seia le talita, mai le ‘au a le komiuiniti.
O se avanoa lelei tele lenei, e lē gata e faatāua ai le tatou gagana, ae faapea foi le faatāuaina o le olaga aoaoina. O le afioga Tagaloa, o lona tofiga maualuga i le Iunivesite, o le Foundation Professor of Pacific Studies.
