Ou te manatu e maua mulimuli ane tala o lenei nusipepa, a ua mautinoa le taitai fou a le vaega faaupufai a le Leipa, auā o le Aso Lua, le aso 13 o Tesema e palotaina ai e faipule uma a le Leipa le taitai, faatasi ma le sui taitai.
Ua uma ona ou feiloai ma ou talanoa ia David Cunliffe ma David Shearer ina ua mae‘a le faigapalota ma fai i ai la‘u lava faamasinoga. Ae ou te lei faamatalaina atu le tagata o le a ou palota i ai, e lelei ona ou faamatala atu mafuaaga ua mafua ai ona faia la‘u filifiliga.
E muamua lava ona ou faapea atu, a o avea le tamaitai o Helen Clark ma palemia, sa ou galue ma tautuaina o ia i le mea lava e gata ai lo‘u malosi.
Ina ua tulai mai foi le alii o Lilomaiava Phil Goff, sa faapena foi ona ave i ai le malosi o la‘u tautua mo ia. E mafua ona ou galue faapea ona o a‘u o le Samoa, ma e faavae o‘u lava talitonuga i le faavae o Samoa – o le ala i le pule o le tautua.
Poo ai lava foi le Tavita o loo tauva mo le tofi o le taitai o le vaega a le Leipa e tulai mai e avea ma taitai, o le a faapena foi ona ou sauni e tautua ma le malosi ia te ia.
O le vaega muamua, e manaomia se taitai a le Leipa e mafai ona tautala malosi i totonu o le maota fono i Ueligitone. E manaomia se isi e mafai ona finau atu ma faalauiloa uiga faa‘au‘au ma uiga faatupito a Key ma English ma le vaega a le National.
E ui sa faigaluega le tama o David Shearer i atunuu mamao o loo tulai mai ai ni taua ma ni vevesi, ae e lē tutusa ma le taua o mafaufauga i totonu o le Palemene o Niu Sila.
Ou te talitonu e iai se taimi e aogā ai lona agavaa na maua mai i ia atunuu mamao, ae ou te talitonu e lē o le taimi lenei, atonu e iai se isi taimi.
O le tama lea o David Cunliffe ua masani lelei i feuiaiga ma ala o tulafono i le Palemene o Niu Sila, a o le tama o David Shearer o loo tau faamasani pea auā e fou o ia i totonu o le Palemene.
O le tama o David Cunliffe na muamua ulufale i le Palemene o Niu Sila i le tausaga 1999, ma avea o ia ma Minisita i le tausaga 2002 seia oo lava i le tausaga 2008.
O le tama o David Shearer sa taumafai muamua e avea ma faipule i le tausaga 1999 ma le tausaga 2002 ma e lei faamanuiaina o ia i ia tausaga. Faato‘ā avea lava ma faipule i le tausaga 2009 ina ua faamavae Helen Clark mai le itumalo o Mt Albert ma manumalo ai loa o ia i le palota laitiiti sa fai.
E manaomia se taitai e silafia lelei ala o feuiaiga o faaiuga faapolokiki i totonu o le vaega faaupufai a le Leipa. O le tama o David Cunliffe ua masani i nei feuiaiga, aemaise le filifiliga o sui tauva a le Leipa, ma o loo manino mai lona finagalo i auala e mafai ona sui ai ia feuiaiga mo le lelei o sui auai ma Niu Sila atoa.
Talu ai e lē o atoatoa le silafia e David Shearer i ia feuiaiga o lona uiga e faamoemoe tele i isi tagata e fautuaina o ia.
O le isi itu tāua, o taitai matutua o le faafaletui o le Leipa o faipule o loo iai nei, o latou nei o loo fautuaina David Shearer ma unai ia i le tofi taitai. E lē faapea o se tulaga leaga lea tulaga, auā soo se faipule lava e manaomia fautuaga lelei.
E pau lava atugaluga o loo ia te au, o faipule matutua nei, o latou nei sa taulamua i le kemupeni lea faato‘ā uma atu nei, ma o lea na matuā matou malolo ai.
O le fesili faalemafaufau ia te au – afai o lea ua matou malolo ona o faaiuga na faia e faipule matutua ua pulapula la goto o latou taimi tautua i le Palemene, o ā ni a latou fautuaga tāua o loo ave nei mo David Shearer? E manuia ai le Atunuu i nei fautuaga poo le taumafai e taui ma sui?
Fai mai nisi o le au matutua e lei lelei le gaioi a le alii o David Cunliffe i le faatinoga o galuega o le kemupeni ua tea atu nei. Ina ua matou feiloai muamua lava i le mae‘a o le faiga palota, sa ou talosagaina le matou faafaletui, o taimi faapenei e tāua tele le tatou taumafai e tutu faatasi.
E leai lava se galuega e lē tulai mai ni masei ma ni faaletonu. A o le mea tāua o le maua o le agaga faamagalo ma tatou vaai loa i luma i le lumanai mo le tausaga 2014.
O le toatele o nusipepa o loo latou lagolagoina le tama o David Shearer. Ona ou manatu lea o ai e ana nei nusipepa? O le aufaipisinisi o loo lagolagoina le faigamalo a le National ma John Key. O lona uiga e foliga mai o loo naunau i latou o loo lagolagoina le National ina ia tulai atu David Shearer i lo David Cunliffe.
O le fesili faalemafaufau aisea lava? Ou te manatu ona e faigofie ia latou se tagata fou e pei o David Shearer i lo o se isi ua masani i le fusu faalepalemene e pei o David Cunliffe.
E maualuga uma faailoga o aoga o tama uma nei e toalua. O laua foi o ni tagata lelei ma le va o tagata. Peitai e tasi lava le tagata ou te talitonu ua lava atoatoa ana tapenaga mo lenei galuega, o le tama lea o David Cunliffe.
O le isi itu tāua ia te au ua mafua ai ona ou lagolagoina le tama o David Cunliffe, e na o ia lava na matou talanoa ma aumai sa‘o lona finagalo e ioeina la‘u talosaga ina ia amanaia tagata Maori, Pasefika ma tagata Asia mo le agai i luma ia matou manumalo i le faiga palota o le tausaga 2014.
Na o ia foi na ioe e faatu le tamaitai Maori o Nanaia Mahuta e avea ma ana sui taitai i le tauvaga tofi a le Leipa. Na o ia foi ou te iloa o se tagata e lotu, ma o ia o se tagata e talitonu i faavae faa-Kerisiano.
