Ua mae‘a ona iloilo le malosi o le tino ma le sailia o le lelei saunia o aao, a o lea ua sauni e fetaui ma iloilo i luma o le Faamasinoga Maualuga mo le sailia o le Faamaoni.
Ua i lima nei o le Faamasinoga Maualuga i Sini Ausetalia le mataupu i le sailia o le pule ma le lesitala faamaoni o le ekalesia LMS Toefuataina. Ua mafua lea tulaga talu mai lava ona vaeluaina le ekalesia aoao, ma ua tofu ai le itu ma lona taitai.
O le mae‘a ona vaeluaina, ona toe vavae ese foi lea o le isi vaega. E oo mai i le taimi nei ua tolu ni vaega tumaoti ua iai talu ona fofoa mai le ekalesia i le amataga.
O le itu na toe vavae ese mulimuli poo le itu lona tolu lea, ua lē afaina nei i le mataupu, talu ai ua mae‘a lava ona lesitalaina faaletulafono si a latou foi taumafaiga. Ua faaigoaina o le LMS Pasefika, ma o loo taitai ai le susuga i le toeaina ia Alapati Tuuga.
O le faafitauli la ua tulai mai, e toalua o loo faaaogāina pea le igoa LMS Toefuataina, ae toatasi lea ua motu ese ina ua faavaeina lona igoa fou, ma ua faagasolo lava foi ana fuafuaga e lē o toe faatalia.
A o le toalua o loo faaaogāina pea le igoa faavae o le ekalesia, lea la o loo ua agai nei i le faamasinoga mo le sailia o se filemu ma le moni, poo ai tonu e lē tatau ona toe faaauauina le igoa o le lotu.
Ona talu ai ua i lima o loia ma le tulafono le mataupu, ma ua manatu ai o le a lē mafai ai foi ona talatala pipi, ma oo i le loloto le galuega a le tusitala, ona e iai mafuaaga e ao foi ina seu le manu ae tagai i le galu. Peitai o faamaumauga uma ma tusi a le loia o le a finauina le mataupu lenei, o loo ua i lima foi o le Samoa Times, e fai ma taiala o lana tusitusiga.
O itu e lua o le a iloilo i luma o le faamasinoga, o le itu lea o loo taitai ai le susuga i le toeaina ia Manusina Taulagi, ma le itu a le susuga ia Lui Tupai o loo taitai ai.
O le susuga ia Tele Tausaga, o ia o le toeaina sa iai foi i le taimi sa faavaeina mai ai le ekalesia. O ia tonu lea sa tuu i ai le faatuatuaga o le toeaina ia Tepa Faletoese, ma tofia na te lesitalaina faaletulafono le LMS Toefuataina mo le taimi muamua.
Mafuaaga o le finauga (Faamasinoga)
Na faia le faaiuga a le taitaifono susuga ia Manusina Taulagi ma lana komiti, ina ia aveesea faamalosi aiā tatau o loo iai i le isi itu, lea o loo taitai ai le susuga ia Rev Lui Tupai, ae sui taitai ai Tele Tausaga.
O tusi sa tuuina ane ma taofia ai i latou mo le toe faaaogāina o le igoa LMS Toefuataina. O ia lava foi tusi sa faailoa ai ma le pule a Manusina ma lana itu i le igoa ma le lesitala o le lotu.
E manino le Samoa Times i le afuafua mai o lenei mataupu, auā sa feiloai faafesagai lelei ma susuga i faafeagaiga e toalua o sui mai le itu a Manusina. Sa fofola ai e sui ia e toalua le tusi ma le pepa lesitala, faapea ai ma le isi pepa o loo saini ai susuga i faafeagaiga o ekalesia a le itu a Manusina lava, ma faapea mai o le tusi faamaonia lea e lē toe taliaina ai se isi lava lotu i lalo o le ekalesia aoao.
O le ala ma le pogai lea na lomia ai e le Samoa Times i lana lomiga o le masina o Me o le tausaga nei lava lea mataupu.
E fai si malosi o faamatalaga ma mau sa tuuina mai i lea vaitaimi, e sui poo susuga i faifeau o le itu a Manusina.
O loo taumafai e faaaogāina pea suafa o faafeagaiga o itu e lua ina ia faigofie ona manino le tatou aufaitau.
Lui Tupai ma Tele Tausaga
E lei taugamalie i finagalo o lea foi itu le taunuu ane o tusi ma le faaiuga sa faia e Manusina ma lana itu, ona e iai foi mau maumaututu e talitonu Tupai ma Tausaga, e matuā sese ai le faaiuga ua faia e isi uso a auauna.
O le vaiaso na tea nei sa toe fesootai ai le Samoa Times ma le susuga i le sui taitaifono o le itu o loo taitai ai le susuga ia Lui Tupai, le susuga i le toeaina ia Tele Tausaga.
O lea feiloaiga sa faapea foi ona auai ma le susuga i le failautusi, Tuivaiti Siutu Samoala ma le susuga ia Apolimatai.
Na faailoa e Tele Tausaga lona toafilemu pea ma le lava papale e tali malu ai le faaiuga sa tuuina ane, e ui ina ia silafia le sese ma le lē sa‘o.
E ui i lea sa tatalo pea ma faatauanau foi i uso auauna ina ia to‘a pea le tai ma aua lava ne‘i gāsē se mea e tasi. Sa toe atili ona vevela toto o le aufaigaluega ina ua lē gata i tusi sa tuuina ane, ae ua toe silasila foi i le Samoa Times, ua faasalalau faalauaitele ai lea lava faaiuga soonafai.
O le ala lea na filifili ai loa, o le tulafono lava e tatau ona maua ai se tali filemu ma le sa‘o o le mataupu. Na faamaonia e Tele Tausaga e faapea o le tusi faavae ma le api o faamaumauga uma o le ekalesia talu ona amata mai e le toeaina ia Tepa Faletoese, o loo ia te ia lava seia oo mai i le taimi nei.
O le tulaga foi o le lesitala ma tusi faamaonia, o loo ia umia lava foi ia faamaoniga poo kopi moni uma talu lava lona faavae mai o le ekalesia (original documents).
E matuā lē talitonuina la e lona sui poo fea e toe oso mai ai tusi faatea a Manusina ma lana pule lea e faapea mai, o loo latou umia le tusi lesitala o le lotu, atoa ai ma le pule e faatea ai sui moni ma sui faavae o le LMS Toefuataina.
E iai le isi mau maumaututu sa agai i ai le saunoaga a Tele Tausaga, ma o se tasi lea o vaega tāua tele e manatu foi o le isi lea aano moni, ma o se auupega malosi o le a faaaogāina e le faamasinoga e fua agai i ai lana faaiuga o le a faia.
O le ala lea o le a lē mafai ai ona faailoaina ma lomia mo lenei taimi, ona o popolega o lea ua lupe le faamoemoe ma le sailiga malo a itu e lua, mo se taimi lata mai.
O le saunoaga a Tele na atagia ai lona lē popole, peitai o loo tumau pea lona alofa ona o le taitaiseseina ma le avaga gofie o le tofa faale-Atua o loo i uso a auauna o le isi itu.
O le aso lava foi lea a o faia lea feiloaiga i Aukilani lava, na maua ai ma le tala lata mai o le mataupu, mai le loia ua atofaina e tulai mo Tupai ma Tele ma le latou itu.
O le tusi a le loia sa tuuina mai, o se kopi o lana tusi ua mae‘a ona ave ia Manusina ma lana itu, ma tapa ai le tuuina ane ma faamatuu ane uma le lesitala ma iugafono sa faia talu ona faia le faaiuga e faatea ese ai Tele ma isi.
O le tusi lava lea a le loia o loo ta‘ua ai foi isi vaega ua oo i ai le mataupu, ma ua faamaonia ai foi le sauni ma le tapenaina o le faamasinoga o le a finauina ai le mea moni ma le faamaoni.
E lē gata i lea o loo faamalosia ai foi i le tusi lava lea le valaauina o Manusina ma lana itu ina ia auai ane uma i le aso ua atofaina, aemaise ai le tuuina ane uma o faamaumauga ma le lesitala o loo ia i latou.
O loo ta‘ua foi e le loia i le tusi lava lea, sa fesiligia le ofisa sa latou lolomia ma faaulufaleina le lesitala lona lua lea sa faia e Manusina ma lana vaega. Peitai ua tautino lea foi faalapotopotoga i Ausetalia lava i le tulaga sa mafua ai ona latou faia le pepa lesitala mulimuli, o loo fai ma malosiaga o Manusina ma lana itu.
