O ai na palauvale i le Fofoga Fetalai?

Sa iai le fuafuaga o taualumaga a le Palemene i le masina nei o Ianuari e faailoa ai se taunuuga o suesuega a le Komiti o tulaga mamalu ma le taualoa a le Palemene i le fia iloa poo ai tonu le faipule na ia lafo ni upu masoā i le Fofoga Fetalai a o faagasolo taualumaga a le fono aoao i le masina na tea nei o Tesema a o lumanai aso malolo o le Kerisimasi ma le Tausaga Fou.
Na lafo ia upu agai i le Fofoga Fetalai ina ua fiu le sui faipule e tulai mo le fia maua o sona avanoa e saunoa ai, ae sa faia le faatonuga a le nofoa ua faamuta le taimi e toe saunoa ai se sui faipule.
O le faaiuga lea na lagonaina ai loa le faapea o upu a le sui “Se ua fiu lava e tu atu lou fuamiti”. Na lagona ia upu i luga o le leitio o le 2AP o loo faasalalauina taualumaga a le fono aoao ae sa manatu le toatele o faipule sa motusia faasalalauga mai le palemene i le taimi lea ona na uma loa le faaiuga a le fofoga o le fono faia loa ma le malologa masani o le taeao.
O le foi ane o le malologa na tulai ai le Palemia ma ia faatu se lafo i le maota fono ina ia suesueina upu masoā na lafo ona ua valaau atu se tagata ia te ia i le telefoni ma faailoa atu ia upu lē migao na faalogoina i luga o le leitio.
Ua maea nei taualumaga amata o le tausaga fou a le fono aoao e aunoa ma se upu ua toe afea ai lea mataupu, peitai ina ua fesiligia le Fofoga Fetalai le Tofa Tolofuaivalelei Falemoe Leiataua, na ia faaalia ai o loo faaauau pea le suesuega a le komiti o loo taitaifono ai le sui faipule o Lefaga ma Faleaseela le Afioga Le Mamea Ropati.
Ua faaalia e le Fofoga Fetalai, o loo iai molimau o loo valaauina e pei o sui o le aufaigaluega a le fono na latou silafia ma faafofoga i le faipule tonu na ia lafoina ia upu faatasi ai ma se lipine na pueina e le TV1 o loo maua ai le siufofoga o le faipule.
Na tupu lea tulaga ina ua tau fai tutulai ane nisi o sui faipule tutu toatasi e pei o le afioga Palusalue Faapo II, Levaopolo Talatonu, faapea le faipule o Sagaga Le Usoga le Afioga Muagututagata Peter Ah Him e fia maua ni avanoa e saunoa ai. Peitai o loo tau fai teena uma e ia faipule o se isi o latou na lafo ia upu masoā i le nofoa (Fofoga Fetalai).
Ua faaalia e Tolofuaivalelei Falemoe Leiataua, ua iloa le faipule na lafoina upu ae o le a ia le faailoa i le taimi nei, sei maea suesuega a le komiti o tulaga mamalu o le palemene ma amioga taualoa a sui faipule.
O le taunuuga o ia suesuega o le a tuuina atu ai i se lipoti i le fono aoao se fautuaga a le komiti i se latou faaiuga, ma o le a faailoa ai foi ma le suafa o le faipule na ia lafoina ia upu taufaifai ma upu masoā.