E lē saili gata ona sue ni paga e fia fetaui ma fia taaalo ia Sonny Bill Williams i le taimi nei, ona talu ai o le tulaga amata o lona taumafai.
O nisi o faamatalaga sa faamatuuina e nisi e maitauina, ma sa taalo foi i lea taloga, sa latou valoia ai e le o tele ni metotia ma e lei tele foi se silafia o le alo o le atunuu i le taaloga faipele, pe a faatusatusa i nisi iloga o le taaloga ma le maualuga ua ia ausia nei.
O le televave tele ona ausia ma umia e SBW o le siamupini o Niu Sila i le paga mamafa, ae lei tele nisi o ana taaloga, atoa ai ma le feiloai i nisi o tama fusu tautaua ma tele le agavaa, o le isi lea faavae mautu o le tele o talanoaga ma manatu o le au maitau.
O se tasi o faamatalaga na faamatuuina e le alii o Lance Revill o Niu Sila, sa ia manatu ai, o Shane Cameron poo Montie Barrett, le isi paga lelei ma talafeagai mo SBW, pe a manao e fia agai pea i luma, ma laasia nisi o faamoemoega autū o le taaloga.
O le manatu o Revill, o se laasaga tāua tele mo SBW pe afai e sao ma manumalo i se isi o le toalua sa ia ta‘ua. E lē gata e lelei mo ia i le faaauau ai o lona tulaga maualuga, ae o se isi faleaoga tele foi mo ia, e saga koleni ma atina‘e ai lona silafia ma gaioiga i le tuaga faapolofesa o le taaloga.
O le tausaga nei i le masina o Iuni, o loo valoia ma o loo iai foi se naunautaiga e tatau ai ona faia se isi taaloga a SBW, ma se isi o Shane poo Barrett. Peitai e ui i lea manatu o le alii o Revill, ae sa lei matuā faamaonia mai e le sui o le asosi fusu a Niu Sila, vaega e pei ona lipotia.
E leai se vaega ua faamaonia o ia lafoga, na ta‘ua foi e le sui o le asosi fusu a Niu Sila, e mafai lava ona faaleo finagalo ma manatu o soo se tagata e uiga i le taaloga.
O Revill foi, o le isi tagata fusu lauiloa a Niu Sila i tausaga ua mavae, e malamalama lelei i le gasologa ma le faatulagaina o le taaloga.
Atonu e ono sa‘o ma faamaonia foi se faamatalaga ua faamatuuina e Revill, pe a tusa ai ma fuafuaga ma manaoga a alii taaalo ma a latou pulega, o latou tonu ia e faasoasoaina taaloga ma manaoga taitasi.
Ae o se isi foi vaega sa agai i ai manatu o le toatele, e faapea pe mata e mafai e SBW, ona faatumauina lona fiafia, ma lona naunau e taalo i le fusuaga.
Ona e pei ona silafia, o le lakapi ma le liki, e matuā leai se fesiligia o agavaa ma tomai o le alii taalo.
E fai si eseese tele ma vava mamao le fusu ma le lakapi poo le liki. I le ma le isi foi tulaga, e ao ina taulai ma tuutasi le mafaufau, ma le malosi e sauniuni ma tapena ai le fusuaga.
O le lakapi o le taaloga fai toatele, peitai o le fusu, o se taaloga e lē alofia, ma e le faamoemoe foi i se tasi, ae o le taaloga e faitoatasi lava, ma tauvi le tama taalo lava ia, i ona tiga.
O le isi lea feteenaiga i le alii taalo o SBW, ona talu ai ua manaomia se isi taaloga fusu, ae o loo iai i le ogatotonu o le taamilosaga lakapi e pei ona faagasoloina. Peitai o le faamatalaga a SBW, o loo iai lava le avanoa e fetuunai ai ana taaloga fusu ma le lakapi.
O le isi tulaga lelei lea ma le tāua, i le maliliega sa sainia ma le Iuni lakapi a Niu Sila, o loo tatala pea le faitotoa mo ia e faataunuu ai ana fusuaga, e aunoa ma se aafiaga o lena konekarate ma le Iuni lakapi.
O le masina o Mati, e ao ona oo atu i ai ua faamautu ma maua mai se faamatalaga maoti i le isi taaloga a le susuga ia SBW.
O loo faailoga fesili foi, le faamoemoe o le alii o Montie Barrett, talu mai se faafitauli e pei ona sa faalauiloaina, i lona faaaogāina o fualaau faasāina, i le la taaloga mulimuli ma Toailetai Davd Tua i le tausaga na tea nei.
E lē o iai se popolega o SBW, poo ai e aumai, poo Montie Barrett poo Shane Cameron, ia poo ai lava, o le mea tāua, o le taalo ma faaaogā le taleni.