O le vaiaso na tea nei sa toe faaauau ai le isi foi solo tetee a i latou sa faigaluega i le falemai o tagata matutua o le Blue Dove, ao le isi igoa e pei ona iloa ai, o le Pacificare i Massey Rd i Magele, lea foi sa faaigoaina o le Culverdent i tausaga ua te’a.
O le tetee sa faataunuuina ma agai tonu i le tuatusi o le tasi o kamupani, e talitonu o latou tonu ia, sa tatau ona faia totogi o tagata faigaluega, ao lei tapunia aloaia lea nofoaga i le tolu vaiaso talu ai.
O le au faigaluega o loo finauina o latou totogi, e aofia ai fomai tausi mai pasi, o Care Givers, poo i latou sa vaaia ma tausia gasegase, aemaise isi galuega i totonu o le ofisa.
O le vaiaso mulimuli ao lei tapunia lea nofoaga, o le piliota tonu lea o loo finauina e le au faigaluega, e lei maua ai o latou totogi.
E le gata i lea, sa faamaonia mai foi, o loo iai ni aso malolo o nisi, sa tatau ona totogi ane, peitai ua faafuasei ona moloau atu, ae lei totogia, atoa ai ma le leai o se faamatalaga sa tuuina ane mo i latou.
O le isi foi vaega, e tusa ai ma aiaiga o konekarate ma maliliega sa sainia i le va o le kamupani ma tagata galulue, o loo aiaia ai ni vaega tupe e tatau ona totogi, mo le faamutaina faafuasei o galuega.
Kamupani o loo aafia i le faafitauli o loo tulai mai
O le Guardian Trust, o se faalapotopotoga tele, ma e lauiloa foi ona o ana galuega faagasolo o loo fesoasoani ai mo tagata lautele o Niu Sila, ma o i latou tonu ia sa tulai mai ma foia se faafitauli sa tupu mai i le nofoaga lava lea muamua, ina ua faasalalauina lona toe faatau ese.
O le Primero Trust, o le tasi foi lea o faalapotopotoga sa oso mai i totonu, ma le faamoemoe lava lea e tasi, o le fia laveaiina o lea nofoaga, ina ia aua nei tapunia, ae ia faaauau pea ona tatala, ona o le taua o lana tautua mo tagata lautele.
O le tulai mai o faalapotopotoga ia e lua, mo le ofoina o le galuega laveai o lea nofoaga, sa amata galulue faatasi mai ai, seia oo mai le aso lulu aso tolu o Mati 2010.
MET, Mangere East Medical Care Services, o le tasi foi lea o vaega sa tuu foi lona isu i totonu o faiga faapolokiki, sa faataamilo ai le faagaioia o le nofoaga lava lea.
O le suesuega sa faia lava e le tatou nusi pepa, ina ia tau vavala mai ai se ata o le faafitauli o loo aafia ai le toatele o tagata o le atunuu.
O le ata manino sa maua ma iloa ina ua maea ona talanoa i le toatele o kamupani sa fesootai iai, ua iloa ai, e iai foi isi taamilosaga, ma isi maliliega sa toe faia i lalo ifo o le faamalumaluga a isi vaega e pei ona taua i luga.
O le Pacificare Trust, o i latou ia sa fai ma vae ma lima, pe sa faafaigaluegaina e le Pacific Rest Home & Hospital.
O le Pacificare Trust, sa sainia le maliliega ma le MET, poo le Magere East Medical Care Services, e uiga i le faafaigaluegaina o tagata. Ma o le vaega tonu lea sa latou sainia ma ofoina galuega, pe sa latou faafaigaluegaina tagata o loo tau sailia nei o latou totogi.
O le faalapotopotoga a le Pacific Rest Home and Hostpital, o i latou lea sa tofiaina le Pacificare Trust, latou te faagaioia le nofoaga i Magele, lea na faaigoa ai lea o le Blue Dove-Pacificare.
O se isi faaliliuina e faapea o le Pacificare Trust, o le tagata ogatotonu, (middle man) a le MET, ma le Pacific Rest Home and Hospital. O le Korda Mentha, o le faalapotopotoga lenei sa toe tofia e le Pacificare Trust, ma o le taimi tonu lea sa amata mai ai ona tulai le faaletonu i le va o tagata faigaluega, ma le mau kamupani ma faalapotopotoga e pei ona silasila ane iai i le faagasologa o loo lomia. O se isi foi ona faaliliuina, o le ata lea ua aliali mai ai, o le iai o Korda Mentha i totonu o le lio lea, ona ua faaogaina foi e tu i le va o Pacificare Trust, ma le MET, le Mangere East Medical Trust.
O le fesili, O ai sa tatau ona totogia le au faigaluega?
E tusa ai ma se pepa o faamatalaga ua taulimaina e le tatou nusipepa, ina ua tapa mo se faamaoniga o talanoaga uma sa fai i luga o le telefoni, sa tuuina mai e le Primero Trust, o loo taua ai le leai o se toe aiaina e le Guardian Trust ma le Primero Trust, o le mataupu e uiga i le le totogia o tagata faigaluega o le Blue Dove- Pacificare Rest Home & Hospital.
O le isi itu sa taua i talanoaga uma sa faatalanoa ai ele Samoa Times kamupani e lua pei ona taua i luga, ma o loo faamauina foi i le pepa o faamatalga sa tuuina mai, o loo latou tuuaia ai le MET, ona sa latou polokaina le teuga tupe i le faletupe, sa masani ona aveese mai ai totogi o i latou faigaluega.
O loo ua tuuina mai foi ma se faamatalaga maumaututu a lea vaega, ma taua ai tagata, atoa ai ma faalapotopotoga e faasino tonu iai le faafitauli. O Ian Anderson mai le Mangere East Medical Trust, ma Grant Graham mai le kamupani fou sa toe tofia mulimuli, le Korda Mentha, o i laua tonu ia e tatau ona tulituliloa mo le totogiina o tagata faigaluega.
E tele taimi sa taumafai ai e faafesootai i laua o loo taua, ona sa manatu lava e fesiligia poo le a tonu le mafuaaga ua le mafai ai ona tali ane i le manaoga o tagata o loo mafatia i le le maua o totogi.
O taimi uma lava e vili ai i telefoni e pei ona tuuina mai, e tasi lava le tali e faafeiloai mai ai, o le faamalie mai ona o loo feagai i laua ia ma fonotaga, ae tuu atu pea le telefoni e toe valaau mai ai pe a maea fonotaga.
E ui ina o loo talia pea se faamatalaga mai ia i laua e toalua, o loo taua igoa i aafiaga o le le faataunuuina o feagaiga ma tagata faigaluega, ae peitai o se ata lea sa mafai ona tusia e faavae i faamaumauga ma faamatalaga, sa tuuina mai.
Afai ae sa’o ma faamaonia le pepa o faamatalga sa tuuina mai, o lona uiga o loo manino lava, o le MET le Mangere East Trust, o o loo iai Ian Anderson, sa ofoina galuega mo tagata, o i latou foi sa faafaigaluegaina tagata, e le tatau la ona faafitia le faafitauli aua o latou tonu ia sa tatau ona faia totogi o le au galulue.
O le isi vaega e tatau foi ona toe silasila iai, o le taimi tonu sa tulai mai ai le faafitauli, atoa ma le piliota sa tatau ona totogi ai le au faigaluega, poo talafeagai ma le taimi tonu sa tuu ane ai le nofoaga atoa ma aia mo le vaaia o tagata faigaluega i le kamupani fou a le alii o Grant Graham, o le Korda Mentha.
O le mau gaioiga uma ma le faagasologa o faiga sa faataamilo i le va o le mau faalapotopotoga o loo taua o latou igoa, ua avea ma auala ua tulai mai o le faafitauli oloo tau sailia se fofo.
O le mea mautinoa lava e le fesiligia, o loo faia uma gaioiga i luga oni tupe se tele, ae paga lea, ua le vaai i le afu pau, ma le gapatia o tagata sa tigaina e tauave ma tilivaina le mamafa o galuega ma le tautuaina o tagata lautele, aemaise ai o le tauleleia o igoa o latou kamupani ma pisinisi.
