Ou te manatua le lavea o lou tamā i lana galuega sa galuea ai i le EPC i Samoa. Sa alu e faigaluega, ae lavea ai lona mata ma ave i le falemai. E iai tulafono e puipuia ai le saogalemu o tagata faigaluega, ae o lea ua afaina lo’u tamā. O ai e tuu’aia? A o fea tulafono o le saogalemu mo tagata faigaluega?
O le soifuaga e faapena, tatou te faatuatuaina isi, e pei o aiga ma faigamalo. Ua ave le faatuatuaga, e manuia tatou ia latou galuegafai. Faatuatuaina vaalele ma taavale pe a femalagaai, faapea Leoleo ma le militeri. Peitai, e afaina lo tatou faatuatuaga, ona o le lē faamaoni o tagata i le faatinoina o o latou tiute. E pei o le muagagana, ua le ogatasi le futia ma le umele. Ua manunu le soifua faatuatua, ma fesiligia le talitonuina o tagata, ona o mea ua tutupu ma afaina ai loto ma finagalo. Sa faigofie le feoai i vaalele, leai se gaogaosa, ae talu mai le faalavelave i Amerika (9/11), ua suia mea uma. Ua le toe faatuatuaina tagata femalagaai ona ua faateteleina le masalosalo ma le fefe, ma ola ai pea i tatou i se soifuaga taumatemate. O le faanoanoaga, ua oo lava i faigalotu, ua aafia ai. Ua le talitonuina taitai. O tagatalotu ua le talitonuina faifeau, o failotu foi ua taumate aulotu. O fanau ua le faatuatuaina matua, o matua foi ua faapena. Ua aoaoina fanau, aua nei talanoa i tagata e le masani ai. Aisea? Mo le puipuiga ona ua le toe soona faatuatuaina isi tagata.
Afai o lea, o ai ea e tatau na faatuatuaina?
1. Fai mai le Atua, o Ia
Ua silafia e Iesu ua faaiuiu lana misiona, ona saunoa lea i le ausoo, ‘aua le atuatuvale o outou loto, ia faatuatua i le Atua, ia faatuatua mai foi iā te au.’ Faaauau pea le tala a Iesu seia oo ina ta’u atu le mea e alu i ai, ae fesili Toma, “Le Alii e, matou te le iloa le mea e te maliu atu iai. Matou te mafaia faapefea ona iloa le ala?”
O le fesili a le soo moni, loto maualalo, faamaoni ma fia iloa se mea. E tatau na fesili, ina ia mautinoa e sao mea o loo fai, ma tonu taiala. O le vaivaiga faaletagata, e musu e fesili nei faapea e vaivai. E musu e faatalanoa se mataupu nei mapuna ane ni sese. O le tagata poto e fetala’i, a o le vale e taofiofi mamau. O le poto e iloilo, fefulisai, ma tuufesili. E manao ia mautinoa e sao ma ogatasi ma le finagalo o le Atua. O le vale, e taofi mau, a sese, alu sese ai pea.
E finagalo le Atua ia faasagatonu lo tatou faatuatua. O le tele o taimi, tatou te faatuatua i isi ma mea tatou te mafaia. Ina ua savali Peteru i luga o le vai, sa lelei lava, ae na aveese loa ona mata mai ia Iesu ona o matagi, māgoto loa. O tatou, e fesouaina pea i matagivale o le olaga nei, ae mafai e le Atua ona taitai la tatou malaga i totonu o faigata. E faapefea ona maua le filemu ma se toomaga, pe a faatuatua pea i tagata? O nisi o loo fetaia’i foi latou ma faafitauli. A faatietie atu ou faafitauli i ona faafitauli, ua pāpāioa lena tagata.
2. Faatuatua ua mausalī
O le talitonuga ua tuuina atu i se isi e aunoa ma le masalo. E le maluelue pe luluina ina ua fotuai mai mala, ui ina le malamalama i le tele o mea e tutupu. O le mea moni, e iai taimi tatou te masalosalo ai i le Atua ona o faafitauli. E oo lava ia Ioane le Papatiso, na saunoa; “Faauta i le tamai mamoe a le Atua na te aveese agasala a le lalolagi.” Ae ina ua falepuipui, sa toe fai atu i ona soo, sei o lava e toe fesili, poo ia lea pe tatou te faatali i se tasi? E iai taimi e faigata ai ona faatuatua atoatoa ia Iesu ona o natura faatagata. Ae o le finagalo o le Atua, ia talitonu pea.
Talitonu ia Iesu, i mea e le vaaia ma mea e le atoatoa i ai so tatou iloa. Talitonu ia Iesu, tusa lava poo a lagona faaletagata e oo mai. Talitonu ia Iesu, aua tatou te le mafaia se mea.
3. Faapefea ona faatuatua?
Faapei ona faatuatua Mose, sa usitai i le Atua ma ia vaeluaina ai le sami ulaula. Faapei o Iosefa, tiga na ta’u pepeloina ma agaleagaina, e lei aveesea lona talitonuga, o ia o le tagata filifilia. Faatuatua e pei o Tavita, ina ua faafesagai ma le sauai. Lalafi uma Isaraelu ma ona taitai, ae valaau leotele, o le aso nei, ou te tuuina atu ai lou tino e fafaga ai manulele. Ae a Iona? E ui ina loloto le moana i le manava o le i’a, e lei taofia ai lana tatalo. Ma le lototetele o le au aposetolo, tiga mata o pelu ma sauaga matuia, e lei foi le faatuatua i le Atua.
E faamanuia e le Atua le tagata faatuatua. O faafitauli ogaoga tatou te tuufesili ai i nisi taimi, pe aisea? O taimi ia e finagalo ai le Atua ia faalagolago atu ai pea ia te ia. E leai se faafitauli e lē mafaia e le Atua. O le Atua pule aoao, e le malulelueina lana pule. E tatau ai na tatou faalagolago ia te ia, ae lē o tagata.
4. Na te le tuua oe
Sa asiasi i le falemai se tasi faifeau i se tamā matua o lana aulotu. Fai atu le faifeau, “Tamā, ua loa ona e lotu, e le taumate ua e sauni e feiloai ma lou Alii.” Sa tali ane le toeaina i si ona leo vaivai, “E le o au lea ua sauni e feiloai ma le Atua, o le Atua ua sauni e faafeiloai a’u.” Samoa, ua uma ona tauto le Atua ia te ia lava, e na te le tuua oe. Soifua.
