I le tausaga e 1988, sa tusi ai e se alii saienitisi se tusi e faaulutalaina, “88 mafuaaga e mautinoa ai e afio mai Iesu i le 1988.”
Sa faaaogā e lenei alii se computer tele i le ofisa o le NASA i Amerika mo ana suesuega. E silia ma le 4 miliona kopi o lenei tusi sa taulia i se taimi puupuu na faatauina ai le tusi.
Ma sa faaatuatuvaleina ai le toatele, e oo lava i le aufailotu ma ekalesia kerisiano, ua popole ma talitonu i suesuega a lea alii, o le masina o Oketopa o le 1988 e uma ai le lalolagi. Toatele sa faamavae mai galuega, faatau ese o latou fale ae agai i mauga e nonofo ma faatali ai le toe afio mai o Iesu. E lei taunuu lea masalosaloga.
E lei mamao atu nei foi na vavalo se isi tagata o le a faaumatia le lalolagi i le tausaga na tea nei. Tele valoaga le taunuu, e le uma lava foi masalosaloga ma taumatega i le aso e taunuu ai nei mea.
Ou te talitonu atoatoa i le toe afio mai o Iesu, peitai o le aso ma le itula e lē iloa. Toatele ua faaseseina, ma ekalesia ua manatu o le anitekeriso o se taitai o isi ekalesia, poo se taitai o se malo.
O nisi foi ua manatu, o loo iai se computer tele i Brussels i Europa o loo faamaumauina ai faamatalaga o tagata uma, e iai le taimi e faanumera uma ai tagata ma faamaufaailoga ai lima ma muaulu e pei ona ta‘ua e le tusi a Faaaliga.
Samoa, ia tatou faaeteete ma mataala i aoaoga taufaafefe, pe fia faaalialia ai ni atamai. Pau le mea tatou te fai e sauniuni ai mo lona afio mai, o le usiusitai i ana poloaiga ma ana afioga, ia mulimuli atu ia te ia.
Tatou mulimuli i lona finagalo i aso uma, poo a mea e tutupu i le lalolagi, poo vevesi ma le tau faamatau mai a tagata le taupulea ma tagata faatupu faalavelave ua lamatia ai lo tatou saolotoga faatagata soifua, ia fifilemu, tatalo ma faatuatua pea i le Atua, na te le tuua i tatou.
E le tatau na faapopoleina i tatou ma saisaitia lo tatou saolotoga i mea e le mafai na oo i ai lo tatou malosi, o loo soifua le Atua na te taofia i tatou i ona aao.
Mo le saunia o i tatou mo lona toe afio mai, ia savavali ma le faatuatua i aso uma, tatalo ma talitonu i lana Pule Aoao. Tatou te le popole ai poo afea, poo le a le taimi, aua ua tuu atoatoa atu o tatou ola i ona aao.
Ua tatou faatuatua i lona alofa ma lana Pule Tutasi e le agaia e se tagata, pe fesiligia e se malo. O ia o le mataisau o le atulaulau, o lona finagalo na fanaua ai i tatou.
Ina ua saunoa le Atua ia Noa e fau le vaa e faaolaina ai o ia ma lona aiga, e lei ta‘uina poo afea e taunuu ai.
E lē iloa le aso e pa‘ū ai se matāua ma tatafe ai lologa, pau le faatonuga ia fau le vaa, usiusitai ma faatuatua, e oo mai le lolo. Sa galulue ma faatalitali, sa amusia ma ulagia e tagata mo le 120 tausaga, ae sa galulue pea. Fai mai tagata o le toeaina ua leaga le ulu.
Sa alalaga ane e maualuluga mauga e sosola i ai. Sa talitonu le tamā, talitonu le tina, talitonu ai ma le fanau e iai le aso e faaumatia ai mea uma. E ui e lei faigofie, ae sa taofi le upu o le folafolaga, o le a oo mai le lolo.
Ua mae‘a ona fau le vaa, 120 tausaga o faia le galuega, aumai ma le faatonuga mo le faaauvaaina, o manu ma tagata, ae toe sau le isi faatonuga e toe faatali mo le fitu aso. Ua faaee, ai se vaaiga malie i tagata o le nuu lea vaaiga.
E 120 tausaga o fau le vaa, a o lea ua toe nonofo e aunoa ma se mea o tupu. Uma le aso muamua, na o le nonofo. Uma le aso lona lua ma le tolu, leai lava se mea o tupu, lē timu, lē lolo.
Masalo ua atili ai ona faaamuamu ane tagata, aua o se vaaiga fou se vaa i se pa‘u matutu i le togavao, ma ni tagata ma nei manu ua feei solo.
Ua amata foi ona iai le manogi lē manuia, ae nonofo lava. Sau le aso lona fa ma le lima, e leai lava se mea o tupu, ae lei suia lava le faatuatua o Noa ma le aiga i le upu na folafolaina.
Uma le aso ono, amata le aso fitu, ae maligi loa timuga. Ua tatala e le Atua punavai o le moana sausau, ma faaavanoa pupuni o le lagi, ae faamaligi timuga, ua fotu mai le iuga o le uluai lalolagi.
Samoa le atunuu pele, ua uma ona faatapulaa ma faapolokalame e le Atua le taimi o le iuga, o le aso ma le ituaso e taunuu ai, tatou te lē iloa. Pau le faatonuga ua aumai e Iesu mo tatou, ia mulimuli atu ia te ia. Soifua.
