Sa matuā faateia le faafofogaaga ma le maimoa a le atunuu, i le faalavelave ua maliliu ai nisi o se aiga o si o tatou atunuu. E matuitui ma oona le tiga o le oti, ae sili na faigata, ona o nai fanau ua maliliu. Sa lē mafai na matamata atoa i le polokalame sa faasalalauina ai le faafetai a le tamā ma si ona auaiga, mo i latou sa alolofa ane. Sa maligiligi lemu loimata, ua ou manatunatu i si a‘u fanau, pe ana fai o ita lea e tupu ai, leiloa poo le ā la ta mea e fai. Ana fai foi e toatasi se tagata e maliu, atonu e feololo. Ae talofa, o se mea matuitui ua oo i ai.
O le Luitau mai le tusi a Esekielu, o se faamafanafanaga foi mo Samoa o lagona le tiga alofa mo latou. O mafutaga motusia e le oti e lē faigofie. Aemaise a tatou pele, o ē sa fai ma faamoemoega ma paaga i ni tausaga se tele. O Esekielu, sa fai i ai le faatonuga a le Atua, “o le a ou aveeseina ia te oe, i le mala, lē ua e fiafia iai; ae te lē tagitu’i, e te le tagi, e le maligi foi ou loimata. Ia e oi lemu …”
O ā ia ituaiga poloaiga faapea? E tatau ea i ni taimi o mafatiaga, ona faapea atu; aua ne‘i maligi ni loimata, aua le faanoanoa? Poo le Atua ea e lē malamalama i le matuitui o le oti? Po ua lē manatu ea le Atua ia Esekielu ma lona mafatia i le maliu o lana avā? O le Atua ea, ua paia tele, ua lē iloa ai tiga faaletagata? Leai. O le Atua, o le alofa lava ia, e malamalama foi i o tatou mafatiaga. Ia manatua, o Isaraelu o loo faatāfea ma faaaunuua i Papelonia. E finagalo la le Atua ia matuā a‘oa‘oina se lesona aogā, ae faaaogā le loto faavauvau o Esekielu, e faaata ai se lesona tāua mo lona nuu, aemaise lo latou lumanai.
Tolu ni manatu e faatāua mai tusi-faitau.
1. E oo le oti i tagata uma
O le tagata faatuatua, o lona oti, o se mea suamalie. O lona aso olioli. O le mau a Paulo, ‘o le oti o le manuia.’ (Filipi 1:21) Ae talofa i le tagata lē faatuatua, o le oti o se mea taufaamata‘u. O lona fili. Poo le ā lava la lou taofi, pe e te talitonu i le ola e faavavau pe leai, e oo mai lava le oti ia te oe.
2. Fai pea mea e tatau ona fai
O tatou uma ua iai galuega, valaauina ma tiute e fai, tusa lava pe fetaiai ma faigata, poo le malaga a le oti, e finagalo le Atua, ia alu pea la tatou faigamalaga. Aua le nonofo pe poloka ina ua oo mai faigata. Aua le tuua mea e tatau ona fai ina ua fetaiai ma faafitauli. Aua nei malo mai le faavaivai ina ua matagia le folauga, pe lafoai le soifua talitonu i le Atua ina ua faasalavei mala o le ala.
O le perofeta o Esekielu, sa tofo i le oona o le tui o le oti, ae fetalai i ai le Atua, “aua le faanoanoa, ia e oi lemu.”
O le tele o mea e tutupu i lo tatou soifuaga, tatou te lē iloa pe aisea e mafua ai. Tatou te lē malamalama i le Atua pe aisea na te faataga ai tiga e oo mai pea. A o lona finagalo, ia savavali pea i luma. Ia agai pea i luma ma le faatuatua, na te lē tuulafoaina tatou. Aua o luma o loo taoto ai le filemu ma le manuia.
3. Faanoanoaga o se vaega o lo tatou soifuaga
E lei malamalama Esekielu i le maliu o lona toalua, e lei faamatalaina foi i ai e le Atua pe aisea. Ae tasi le mea ua ou mautinoa, o faanoanoaga o Esekielu, sa faagalemuina ai lona loto. O mafatiaga, na te aumaia i fafo mai le loto o le tagata se isi malosi uigaese e lei iloa o iai, ae faato‘ā aliali i taimi o puapuaga. A lē o le loto tele, o le loto oona (bitterness).
O faanoanoaga e oo i loto o tagata uma. Faapei o matagi malolosi e tosina i tumutumu mauga. E faavaivaia ai lo latou malolosi faalenatura, ae puaina mai ai le sau mālū e faasūsū ai laufanua o siosiomiaina atumauga. O le faanoanoa na te a‘oa‘oina ma faaatamai le loto o le tagata filigā. Letioa fetalai Iesu, ‘amuia e faanoanoa.’
Ua lē avea le maliu o le āva a Esekielu e taofia ai lana miti, e iai le aso e tuua ai Papelonia, ae foi i lo latou tofi mai le Atua. Sa vaavaai ma le faanoanoa i le maliu o lona toalua, toe vaavaai atu i le Atua ma ia iloaina, le loloto o le tofāmamao a le Atua mo ia ma ona tagata. Ua soloi ona loimata, ua ia mautinoa, o loo galue le Atua i tua atu o tiga faaletagata. Se‘i faamanatu ia Isaraelu o nonofo pologa, e iai lo latou nuu moni e fai mo latou tofi. E sili atu lona manuia, o lona matagofie ma lona lelei, e sili atu i lo Papelonia.
Mo Jeremiah Lale ma le aiga faavauvau, e liua lo outou tagi e fai ma pese mālie, e suia lo outou faanoanoa e fai ma faasolo manogi, ina ua mautinoa, e toe feiloai ma latou i le manuia ua saunia e le Atua. Tatou te agai uma lava i le nuu lea, o lo tatou tofi, auā tatou te lē nonofo pea iinei. Tatou te o i le Ierusalema Fou ua saunia e le Atua, a o le tasi o faitotoa tatou e ui atu ai, o le oti. Soifua.
