Faaalia e se molimau ua faaitiitia le lagolagoina o Misa e lona itumalo, ona ua iai lape o ona tiute i totonu o le itumalo faafaipule.
Ua faateaina nei e le Falefitu o le faaaloaloga a le aiga Tauaana lo latou sui faipule le afioga Misa Telefoni ma o se faaiuga na faia i le faaiuga o le vaiaso.
O le tuuina atu o se tusi faamavae a le afioga i le Laau na Fausia i le faaaloaloga a le aiga Tauaana i le lua vaiaso ua mavae, sa faaalia ai se finagalo o Misa e faamavae ma le tofi faipule, e lē toe tauva mai le itumalo faafaipule o Falelatai ma Samatau, o le mafuaaga lea o le finagalo o le Falefitu e faatulai pe faatea.
O loo faaalia e se molimau ua faaitiitia le tulaga lagolagoina o Misa e lona itumalo, e mafua ona ua iai lape o ona tiute i totonu o le itumalo faafaipule.
E pei ona lipotia i le lomiga o le vaiaso ua mavae o le tatou nusipepa o le Samoa Times, le faamavae o le Laau na Fausia e lē toe tauva mai Falelatai ma Samatau, o loo ia ta‘ua ai e lē mafai ona aumai sona finagalo seia vagana ua faailoa atu e le tusitala a le Samoa Times ma le Radio Samoa, le tagata na ia faailoaina atu lana faamavaega.
Sa taumafai pea sailiga i se finagalo o le Sui Palemia i le vaiaso ua mavae, peitai e tumau lava le finagalo o Misa, ua na o se isi o le Falefitu e mafai ona saunoa i tusitala, ae sei vagana ua mafai ona faamatuu ane i le Sui Palemia e le aiga Tauaana le tusi faamavae na ave i ai, ona faato‘ā iai lea o sona finagalo e talanoa faalauaitele mai i le mataupu.
O le umi o gūgū ma lē gagana mai le Sui Palemia poo le faipule o Falelatai ma Samatau, ua salalau ai le tele o tala salatua i mafuaaga o lona manao e lē toe tauva mai i le itumalo ua tele tausaga o avea ai o ia ma sui i le Palemene.
Fai mai nisi faamatalaga, o le a tauva le Sui Palemia i lona suafa Tugaga mai le itumalo o loo seei ai nei le afioga i le tamaitai faipule o Safuneituuga Paaga Neri o loo avea ma minisita o Faasalalauga ma Fesootaiga Faatekonolosi.
Afai e moni lena masalosaloga, ona tuufesili ai lea o le au mate mate, poo le a faapefea ona sauni le Sui Palemia e tauva mai lena tofi, ae semanu o loo tulai mai ai le tamaitai minisita, ma umia ai foi e le latou vaega faaupufai, le HRPP lena nofoa o le Palemene?
Fai mai foi nisi faamatalaga o Misa o le a tauva mo nofoa e lua o le au palota taitoatasi auā ua mafai ona tauva ai i lona suafa matai o loo ia umia, e pei ona teuteu ai le tulafono o faigapalota. Peitai ua ta‘ua e nisi molimau ma tala o loo salalau solo e faapea, e iai se tofiga maualuga i fafo o le a tauaveina e le Laau na Fausia, o le mafuaaga lea o lona faamoemoe e lē toe tauva i le tofi faipule. E leai ma se faamatalaga o nei tala salalau uma o mafai ona faamaonia ona o loo tapunia pea le faitotoa e ulufale ai tusitala i le ofisa o le Sui Palemia.
O loo tulimatai pea e le au tusitala aemaise le mamalu o Samoa uma le auga tonu o lenei mataupu, ma atonu i nisi
a tatou lomiga i le lumanai, o le a maua lelei atu ai le mafuaaga moni ma faamautinoa ai poo fea o nei masalosaloga o loo feaveai solo i le agi a le matagi, ona faamaonia
lona moni.
