“O le matou faaaliga faavaomalo o loo loma o loo tagi lava i lima”…Peresitene
O loo aofia i le polokalame o le Tutoatasi le faaaliga faavaomalo o le measina o le tatau a Samoa lea e fā aso e faagasolo ai e amata i le Aso Gafua 4 o Iuni 2012 ae mae‘a i le aso 7 o Iuni.
“E oo mai i le taimi nei e lei oo mai se faamatalaga mai le komiti pe iai se fesoasoani tau tupe mo le matou tapenaga”.
O le finagalo lea o se tasi o sui o le Malofie o loo nafa ma le sailia o ni seleni e faatupe ai le faamoemoe. Faaalia foi e lea sui, e oo i le tulaga i le faaaogaina o fale Samoa o loo i tua ane o le maota Samoa o le pulega o tagata tafafao mo le faaaliga e lei maoti atu se faamatalaga mai le pulega o tagata tafafao.
O atugaluga o le asosi ona o loo faaaoga e le asosi taulasea fale Samoa e lua mo a latou fofo ma isi vaega, ae o loo fia faaaoga uma fale i le taimi o le faaaliga. “E toatele tagata mai fafo e tāua ia i latou le faaaliga ma e manaomia le faaaogā uma e le asosi o fale samoa”.
O loo iai se talosaga a le malofie i le pulega o tagata tafafao ina ia siitia le galuega a taulasea Samoa i se isi nofoaga ae faaaogā fale i le faaaliga ma e lei faia se faaiuga o lea talosaga.
Ua lua tausaga talu ona faatino le galuega a le susuga Su‘a Suluape Petelo, ma nisi o tufuga ta tatau i le nofoaga i le eleele fou, peitai na ta‘ua e se sui o le Malofie a Samoa e lei maoti atu foi se faamatalaga mai le pulega o tagata tafafao pe o le a tonu le tulaga o latou i le itu i se tupe e totogia i nisi o loo faia le galuega ma fesoasoani i tufuga.
“O latou na talosaga atu e aumai le galuega i tua o fale Samoa i le eleelefou ona o se taumafaiga e faatosina ai tagata tafafao poo turisi, ae o le mea lea ua iai ua leiloa poo le a tonu le uiga o le matou iai ii, ona e leai se seleni o maua ai.”
O le nofoaga lea mo le silafia o loo ta ai nisi o tatau ma malu ma o loo tuusa‘o le totogi o le galuega i le aao o le tufuga ma lana au galulue.
Sa taumafai atu mo se finagalo o le pule o le pulega ae e lei maua, ma o le a tuliloaina pea mo se finagalo o le tamaitai Pule Sili.
