E toalima tamafanau a Samoa sa maua ni faailoga faapitoa mai le kamupani o loo galulue ma tautua ai. E tele ma anoanoai, ma eseese foi vaega sa faatulagaina e le kamupani, e faatatau i ai le tausinioga, a o se fafagu foi ma se faiga e faailoa ai le tinou ma le finau mo soo se tagata faigaluega lava e faatinoina galuega i le lotoifale ma fafo o le kamupani.
O faiga masani a le kamupani gaosi taumafa o le Sanitarium i Niu Sila atoa, e masani ona tapenaina ma tauia ana tagata faigaluega i ni taui e tusa ai ma vaega faapitoa sa galulue agai i ai i tausaga taitasi. O le faiga o se tulaga e fai faatauvaga, ae alilai ai le tulaga maualuga ma le tagata moni lava e ala i ana aga ma tu e faatino ai ona tiute ma galuega i totonu o le kamupani.
E lē gata i lea ae o se avanoa foi e faatupu manatu, ma faafiafiaina ai le tagata galue, e saga faaiila pea ma fiafia e faia le galuega ma le faamaoni. Na matuā faatumulia le nofoaga o le kamupani i Royal Oak i le Aso Faraile na tea nei, i sui mai vaega eseese o le atunuu atoa, i le molimauina o i latou sa faamanuiaina mo faailoga faapitoa o lenei foi tausaga.
Sa auai foi le tatou nusipepa i lea aso tāua ma le faamanatuina i tala faasolopito o lea foi kamupani. Talu ai o se faamatalaga sa tuuina mai i le pulega o le kamupani, sa faailoa mai ai le numera silia o Samoa e mauaina faailoga faapitoa mo le 2010. Sa faamaonia lea tulaga ina ua auai ma molimauina le taimi na tolaulauina ai faailoga.
O lagona o le fia Falealili fua ina ua toalulauina suafa Samoa i luma o le faitau selau ma selau o malo faaaloalogia, atoa ai ma tagata faigaluega a le kamupani. O le tasi foi alo tautaua o le atunuu i tulaga o taaloga afeleti a Niu Sila le tamaitai o Beatrice Faumuina, sa avea ma malo faaaloalogia a le kamupani, ma o ia foi sa tauaaoina ma foaia faailoga tāua sa lautogia ai tamafanau a le atunuu, atoa ai ma isi atunuu.
O le tuufaatasiga o lala e tolu a le kamupani ia Niu Sila atoa, sa agiagia ai lava le fu‘a o tamafanau a Samoa, ona o le toatele ma le numrea silia i faailoga mo lenei tausaga. O se tasi o vaaiga matautia ma le faagaeetia, ona o le faailoga e auautetele i ai faailoga uma sa fuafuaina mo lenei tausaga, sa toe sola foi ma le isi tina Samoa. O le faailoga lona lua i le faailoga aupito maualuga lona tulaga sa faatulagaina ai, sa faapea foi ona toe sola ma le isi foi tamalii Samoa.
E lei maua se taimi e talanoa ai ma feiloai atu ia i latou sa lautogia, ma mau faailoga mo le 2010, ona o le tumu ma le toatele o tagata sa auai, aemaise ai o le pisi i le faatinoina o isi polokalame o le aso. Peitai sa mautinoa ma molimauina ma le toto‘a le maualuga o taumafaiga a tamafanau a le atunuu o loo galulue ai i totonu o lea foi kamupani tele i Niu Sila.
Atonu o se luitau foi lea mo i tatou uma poo fea lava le kamupani, a o le a foi le ituaiga galuega o loo tautua ai, ua toe faamanatu mai le tāua o le galue malosi ma le finau ae tauluga i le faamaoni, e maua i le taui aemaise ai o le ata moni lea o le taufetuliga o loo tatou faatinoina i lea aso ma le aso mo le faamoemoe i le ola atali.
O Kerina Timoteo mai Kalaisetete sa mauaina le faailoga o le tagata e fiafia e matala pea lona mafaufau e faasoa ma talanoa ai i lana Staff poo i latou o loo i lalo o lana vaavaaiga i totonu o le galuega. O Lagatasi Swann ma Val Roache, sa mauaina le faailoga o le amio lelei, pulea, ma le fesoasoani mo isi, aemaise ai o le faatinoina o auala talafeagai o loo manaomia e le kamupani mo le faagasoloina o pisinisi.
O Fiailoa Tipoai o se tasi ua silia ma le 35 tausaga o loo galue pea i le kamupani, sa faamanuiaina i le lelei ma le faamaoni i le faatinoina o galuega mo se taimi umi o lana auaunaga. O Vio Euta, sa maua le faailoga aupito tāua o le faaeteete, leai se faafiatauli e tele mo ia ma le va ma soo se tasi, ma le tulaga o le va fealoaloai ma le faaaloalo i soo se tasi, aemaise lava o le pulega a le kamupani.
O se isi o tulaga sa fiafia tele ai ona o le atagia ai o tu ma aga a Samoa i le faamatalaina o le faailoga tāua, sa tauaaoina mo lenei tina. Malo faafetai mo le faaeaea ma le lē tuuina i lalo o a‘oa‘oga mai i totonu o aiga, ae ua faaali lava i nofoaga faitele ma galuega.
