Numera silia tagata Samoa i Niu Sila i asiasiga i Samoa

O le lipoti aupito lata mai ua faalauiloa a le Pulega o Tagata Tafafao mai ua faamautu ai pea le mau o o tatou lava tagata o loo i Niu Sila o loo numera silia i asiasiga i Samoa.

O lea numera ua toe faamautu mai i le lipoti o tagata asiasi mai i Samoa i le masina o Aperila lea faato‘ā faalauiloa mai i le vaiaso na tea nei.

O le 43 pasene o le aofai o tagata na faamauina le asiasi mai i Samoa o tagata Samoa o loo aumau ai i Niu Sila, ma o le toatele o nei tagata e faamautu lava i nofoaga e pei o maota o aiga.

O le isi vaega o loo sosoo ai o i latou mai i Amerika Samoa ma e mautinoa le siitaga o le a faamauina i lenei masina ona ua toatele fanau aoga aemaise o asosi a faiaoga mai i le motu i Sasa‘e ua vaaia le malaga mai ona o le vaitau tonu lenei o tuuaga o a‘oga a fanau i Amerika Samoa ma ua malaga mai i Upolu ma Savaii auā tafaoga o le isi tolu masina.

O Ausetalia o loo numera tolu i le aofai o tagata na asia Samoa ia Aperila lava ia.
Ua manino le aafiaga o le atina‘e o tagata tafafao mai i le faaletonu pea o le tamaoaiga o le lalolagi o loo iai nei, ma o loo unai lava le Pulega o Tagata Tafafao mai i le vaitau lenei o le tausaga ina ia faaauau le malaga mai o tagata tafafao i le atunuu.

O taumafaiga faalauiloa ua taulai i ai i Niu Sila ma Ausetalia ae manino foi e toatele tagata asiasi mai i Niu Sila ma Ausetalia i le masina o Me ona o fono tetele a Ekalesia ia na faatino ai i ia masina, aemaise autaaalo na malaga mai i fiafia o le Tutoatasi i le masina lenei o Iuni, ma o lea foi e talimalo le Iuni Lakapi a Samoa i vaiaso e fa i au taaalo o le Lakapi taitoa 15 ua tausinio i Samoa nei i le sailia o le siamupini o le Ipu o le Pasefika i lea faagatama.
Ae o Aperila lava ia o le tulaga lena na iai tagata asiasi mai.

O kamupani vaalele e lua ia o loo tele ina feaveaia mai tagata tafafao o le Ea Niu Sila ma le PolyBlue.
O isi kamupani vaalele o loo feoai i le va o Samoa ma isi atumotu o le Pasefika lea e aofia ai le Ea Pasefika a Fiti faapea le Polenisia a Samoa nei, lea ua feoai pea ona vaalele laiti i le va o Samoa ma Amerika Samoa aemaise le va o Upolu ma Savaii.

O le Inter-Island a Amerika Samoa o loo fealuai foi i le va o motu o Tutuila ma Upolu.

O loo iai faigamalaga ua mae‘a ona faamautu e faletalimalo e pei o Aggie Grey’s ma le Sinalei aemaise le aumalaga o papalagi o loo faamautu mo lenei tausaga atoa i apitaga tumatafaga e pei o le Taufua, ae o le mae‘a ai ona ao o fuainumera a le Pulega o Tagata Tafafao mai ua mautinoa ai, e 13 pasene ua pa‘ū ai le aofai atoa o tagata asiasi mai i Samoa ia Aperila o lenei tausaga pe a faatusatusa atu ia Aperila o le tausaga na tea nei.