O le latalata mai o aso fiafia o le Kerisimasi, o le taimi foi lea e vevesi ai mātua mo le sailia o meataalo mo le fanau auā o le mafaufau lea o le tamaititi, o le aso Kerisimasi o le aso lena e maua ai le meataalo.
Peitai e lē o toe faigofie le mauaina o meaalofa ma meataalo mo le fanau, ona ua suia le tulaga o mea aemaise le taugata o le soifuaga.
Ui i lea, e lei nofoai ai nisi o faalapotopotoga ma asosi i totonu o Manukau, ona o le naunau ia faamautinoa e lē o misia e nisi o fanau a le itumalo ni meataalo e faafiafia ai i lea vaitaimi.
I ni masina ua tuanai atu, sa galulue soosootauau ai le ofisa o leoleo i Counties/Manukau, ma le vaega a le PORSE In-Home Childcare and Educator Training, i le faaoo atu o la latou faatalauula le Toy Appeal, i soo se tasi, aemaise i kamupani ma ofisa eseese i totonu o le itumalo, ina ia foai mai ni meataalo, auā le tufatufaina atu nai fanau i le taimi o le Kerisimasi, e tauala atu i auaunaga a le Mercy Mission, Children’s Homes ma le Women’s Refuge Centres. Sa tufa solo fasi pepa i soo se tagata, i faleoloa, o falekofe, o kamupani ma faalapotopotoga eseese a le komiuniti, ma faia foi ni faasilasilaga i nusipepa. Ta‘ua e le faaululuga o le vaega a le PORSE i Pukekohe, Cherie Wilson, le maofa i le tali lelei mai o tagata i nei faaitu i Manukau ma Pukekohe i lenei faatalauula atu.
E lē gata ina fiafia tagata e foai ane le tele o meataalo mananaia ua latou lē toe faaaogāina, ae o nisi foi na matuā faatau lava nisi meataalo fou e foai mai.
O se tulaga faagaeetia le vaaia o nisi, e ui i le tulaga tau faasoasoa o loo iai foi o latou aiga, ae lei tuua ai le naunau e fia foai mo lenei fuafuaga tāua.
E faafetaia ai foi e le tamaitai o Ms Wilson le fesoasoani tele a le matagaluega o Leoleo, i lo latou taulamua i le faafoeina o lenei polokalame mo le fesoasoani atu i nai fanau o le a latou moomia nei meaalofa.
Ma e foliga mai ona o le tulaga sologa lelei ua tulai mai ai lenei polokalame e pei ona amata mai le tausaga talu ai, ua faamatuu atu ai nei e Leoleo lenei polokalame i le vaega a le PORSE e latou te faatautaia atoa i isi tausaga o lumanai.
I le faaitu a le Counties/Manukau, e tusa e 180 i latou o loo galulue o ni faiaoga (educators) a le PORSE, ma e 380 aiga o loo latou faaaogāina auaunaga a le PORSE.
