Ua noatia le alu i le falepuipui o lē sa avea ma Minisita o Faatoaga ma faipule o Aleipata Itupa i luga ina ua faasala tupe i le $2,000 i moliaga e tolu o le faia o faatosina solitulafono na tauanau ai tagata palota e lagolagoina o ia i le palota tele a le atunuu na faia i le masina o Mati o le tausaga ua mavae 2011.
O le susuga Seuala Tauā Kitiona Tavaga Seuala, na ia ioeina moliaga e tolu ma ua aumai le faasalaga a le Faamasinoga Faaitumalo ua faatonuina e totogi le sala tupe poo le tuuina atu i le falepuipui mo le umi e 15 masina.
O Seuala Tauā Kitiona na toe manumalo i le nofoa o Aleipata Itupa i Luga i le palota tele a le atunuu i le tausaga ua mavae, peitai na faaulu ni tuua‘iga o faatosina solitulafono na ia faia e se tasi o sui tauva le Afioga Fuataga Kasimani na ia maua le ‘afa o palota a le sui na manumalo.
O le faamasinoga o faigapalota le Electoral Court na iloilo muamua ai tuua‘iga ma aumai ai le faaiuga ua faamaonia ma soloia ai loa lona filifilia. O le faamasinoga foi lea na faamaonia ai tuua‘iga Seuala faasaga i le sui na tagi faasaga ia te ia.
E tusa ai ma aiaiga o le tulafono o faigapalota o le taimi e faamaonia ai ni tuua‘iga o faatosina i le faamasinoga o palota, e okometi lava le tuuina atu loa o ia tuua‘iga i leoleo mo le suesueina ma faia ni moliaga faasolitulafono lea a faamaonia ai e faasala i le falepuipui poo se salatupe poo faasalaga uma e lua.
O le tasi o sui sa manumalo i le palota tele o le 2011 ae ua faamaonia foi ona moliaga ma ua faasala tupe o le afioga i le Aloalii Vaai Papu Vaelupe sa umia le tofi faipule o Vaisigano numera tasi. E faapena foi le sui na manumalo i le nofoa o le itumalo o Satupaitea lea na soloia foi lona filifilia ina ua faamaonia tuua‘iga o faatosina e lē tusa ai ma aiaiga o le tulafono o faigapalota.
O le faasalaga ua faia e le faamasinoga ia Seuala Tauā Kitiona ma isi sa molia ona o tuua‘iga o le palota ua manino mai ai le ave o le faatāua a le faamasinoga i itu lelei o ia tamalii i le latou tautua i le Malo ma le atunuu, i le lē tuuina sa‘o o se faasalaga faafalepuipui ae ua sala tupe, seia vaganā ua lē ausia le taimi ua tuu i ai e totogi ai lea salatupe ona faato‘ā tuuina atu lea i le toese poo le falepuipui.
O nisi foi o tagata palota o ia itumalo sa molia i le faia o gaioiga e fesootai ma le faia o ia faatosina solitulafono ua mae‘a ona faia foi i ai faasalaga tupe ina ua faamaonia o latou moliaga.
