Ne‘i misi lou avanoa mo le Samoa Quota

O le aso lua (2) e oo atu i le aso tolusefulu (30) o le masina nei o Aperila, ua faamaonia mai e le Matagaluega o Femalagaiga, le tatalaina ai o le avanoa mo le lesitalaina o suafa o tagata Samoa, i lalo o faiga paaga a Niu Sila ma Samoa, poo le Samoa Quota.

E lē gata ina tatala i le lesitalaina ma avanoa mo tagata Samoa, ae faapea foi ma isi atunuu o le Pasefika, ina ia maua ai vaega tonu o le tulafono o Femalagaiga, e ofi atu ai ma faaulufaleina talosaga mo le ulufale i Niu Sila, e pei ona masani ai i tausaga taitasi.

O le avanoa lea, o loo eseese ai Samoa ma isi atunuu o le Pasefika ona e fai si tele o le faitau aofai, poo le fuainumera o loo faamatuuina mo Samoa, ae itiiti ma laitiiti foi le aofai o tagata ulufale mai o loo faamatuuina mo isi atunuu e pei o Tonga, Fiti, Tuvalu ma isi.

E tasi le afe ma le selau (1100) avanoa o loo faatulagaina mo tagata Samoa i le Samoa Quota. E na o le faselau (400) avanoa o loo faamatuuina mo isi atunuu uma o le Pasefika, e pei o Tonga, Tuvalu ma Kilipati.

O se pepa o faamatalaga, o loo faataoto mai ai e lē o loo sui tulaga i le faauluuluga o le Matagaluega o Femalagaiga a Niu Sila, Steve Stuart vaega tupito ma le tāua e ao ina faamanatu ma manatua e tagata uma, mo le lesitalaina ma le talosagaina o ia avanoa.

 

O vaega tāua nei:

• E leai se totogi mo le lesitalaina o suafa i le polokalame lenei mo na o tagata Samoa. A o isi atunuu o le Pasefika e pei ona ta‘ua i luga sa totogi le $60 i tausaga ua mavae, peitai ua toe faapa‘ū ifo lea totogi, i le na o le $25 ua iai nei. O le $25 tala foi o loo totogi e atunuu e pei ona silafia, e lē toe maua tusa lava pe lē talia le talosaga.

• O talosaga uma foi, e lē mafai ona avanoa mo i latou o loo nonofo solitulafono poo ua ova aso i Niu Sila.

• E tatau i tagata uma e talosagaina avanoa, ona tautino ma faailoa tagata uma o le aiga, tusa lava pe lei faaipoipo faaletulafono. Ina ia mafai ona maua foi e i latou le avanoa i taimi mulimuli mai, pe afai e faamanuiaina mulimuli ane.

• E na o le tasi le pepa faatumu e avanoa mo le tagata, poo le aiga ma e tatau ona faatumu uma ma tali fesili, ma ia tusia le telefoni, ma le tuatusi ma sainia lelei. Ia manatua kopi o pepa fanau o tagata uma o loo ta‘ua i le talosaga.

• O i latou uma o le a faamanuiaina i talosaga, e mafai ona toe faaulufale o latou suafa mo le isi taimi e sosoo ane ai, poo le isi tausaga.

 

E latalata i le 7,200 na lesitala i le tausaga talu ai i le tuufaatasiga o Samoa ma le Pasefika, ma na oo atu i le 19,000 i latou mai talosaga e 7,200 e pei ona ta‘ua.

E 236 talosaga na faamanuiaina, ma sa oo atu le aofai o tagata mai ia talosaga i le 642, mo na o Samoa lava ia.

E 59 talosaga ma isi atunuu o le Pasefika, ae 205 le aofai o i latou mai talosaga e 59 e pei ona ta‘ua, sa faamanuiaina i le tausaga lava e 2011.

O talosaga uma e maua i tua atu o le aso 30 o Aperila, o le a leai se avanoa e taliaina ai, ae o le a toe faafoi uma, atoa ai ma tupe i tuatusi ma i latou sa tuai ona faaulufaleina a latou talosaga.

O pepa lesitala mo talosaga uma, ua mafai nei ona maua i soo se Ofisa o Femalagaiga o latalata ane, pe o le a mafai foi ona kopiina mai i luga o le tuatusi lenei www.immigration.govt.nz.