“O le sini o fuafuaga a le matagaluega mo le lima tausaga o lumanai nei, ia lava taumafa ma ia lava foi tupe mai fua tau faatoaga e fesoasoani i le GDP (Gross Domestic Product) o le tamaoaiga o le atunuu”.
O le Minisita o Faatoaga ma Faigafaiva o se tasi o toe ulutaia o upufai o le atunuu ua tele tausaga o seei i le tofi faipule o lona itumalo o Lefaga ma Faleaseela.
O se tamalii ua lava lona silafia i le faagaioia o atiina’e eseese a le Malo, mai lava i tausaga amata o lona tofi faipule sa seei ai i le tofi Minisita mo nisi o matagaluega a le malo seia oo ina avea ma faipule e agaia le Malo mo le tele o tausaga lea na taunuu lava ina avea ma taitai o le Itu agai i se vaitaimi o le paeaiga a le Palemene mai le 2001 i le 2006.
O lona toe pale mai i le tofi faipule o lona itumalo na filifilia ai e le afioga i le Palemia i lana kapeneta o iai nei e pei ona ia tauaveina le vaaiga o le Matagaluega o Faatoaga ma Faigafaiva.
O le molimau a le minisita ua faasolo i lalo le tulaga tau faatoaga i le atunuu aemaise lava i le itu i tupe maua mai le auina atu i fafo o fua tau faatoaga. O lea tulaga na amata molimauina i tausaga ua tuanai atu e oo mai i le tausaga na tea nei.
O ia vaaiga faaletonu ua agai ai le matagaluega e toe unaia malosi le toe totoina o nisi o laau e pei o le koko, le niu, kofe ma nisi o laau tau faatoaga e pei o laau fua suamalie poo fruits faapea fualaau faisua poo vegetables.
O le molimau a le minisita ua sili ona maualuga le aofaiga o oloa tau taumafa e aumai mai fafo ua faalagolago i ai le atunuu, auā ua itiiti ona taumamafa i laau tau faatoaga e totoina lava i le atunuu. “O se itu faigata lena i le vaai a le Malo, ma o le pine faamau lena o la’u tala i le agai i lalo o le atina’e o faatoaga”.
O le taimi nei o loo faasolo le polokalame a le matagaluega o le unaia o fai faatoaga i le atunuu e fia auai i le polokalame o le toe totoina o le koko, niu, ma le kofe.
O loo unaia ai fai faatoaga e mafai ona faato’a le lua eka o o latou fanua i ia laau, ae tuu asiasi i ai le matagaluega e vaai, ma ave i ai le fesoasoani tau tupe e saga faaleleia ma faateleina ai ia laau tau faatoaga.
Talo ma maketi i fafo
E lima ituaiga o talo ua pasia e le matagaluega e mafai ona faatau i maketi i fafo. Peitai na faaalia e le afioga i le minisita ua toe silasila nei le matagaluega i le tulaga lelei atili o le aano o ia talo, ona o le faaeteetega ina ne’i iai se faaletonu e aafia ai, ona toe afaina lea o le maketi ua toe tatala mai e Niu Sila.
“O le faaeteetega lava lena i taumafaiga, auā a iai se faaletonu e toe aafia ai le tatou talo, ona motusia foi lea o lea alagatupe aemaise lava o se tasi lea o laau tau faatoaga sa sili ona tele a tatou tupe sa maua ai i tausaga ua tuanai a o lei afaina le tatou talo Samoa i le leaga”.
Faaalia e Le Mamea Ropati. E iai ni ituaiga o talo se lua o loo silasila i ai le matagaluega ia latou taumafaiga o loo faagasolo, ona e lelei le aano i nisi nuu o loo toto ai, ae a ave tiapula ua toto i isi nuu e lē tutusa le tofo i ai i le aano ma e susu foi nisi vaega.
O itu ia na faaalia e le minisita o loo mafua ai ona faatelegese laitiiti le unaia o le ave o le talo i fafo i le taimi nei, peitai e lē o taofia ai le au faifaatoaga o loo maua le avanoa e ave ai a latou talo i fafo.
Lelei tupe maua i vaa fagota mai Taiwan
O se fiafiaga lea o le minisita ina ua osia se feagaiga ma le kamupani o le Yuk Yow Fisheries Company mai Taiwan ua latou faaaogāina le uafu i Apia e taunuu i ai o latou vaa fagota, ona la’u ese ai lea o uta i’a i se vaa tele mai Saina o loo malaga faapitoa mai mo le aveina o le i’a.
O le solosolo lelei foi o lea faiga faapaaga a le kamupani ma le Malo e ala i le matagaluega o faatoaga ma faigafaiva, ua feiloai ai le minisita ma faauluuluga o le kamupani, ma talosaga ane ai e fia fausia se fale e teu ai le i’a i Samoa poo se Storage Facility.
“O lea ua taoto mai le talosaga a le kamupani mo se finagalo o le tatou Malo, ae o loo naunau le kamupani e fia fausia se fale faapea ia vave ona toe o ese ai o latou vaa mo le fagotaina o ogasami”.
O le isi lea sao o faigafaiva i le tamaoaiga o le atunuu e pei ona saunoa le minisita pe a tino mai i se tulaga manuia taumafaiga o loo faia ma lea kamupani. Faaalia e le minisita e ui e lē o se tupe tele o loo maua mai ai, ae o se isi lea sitepu i le agai atu o lana matagaluega e siitia tupe mai faatoaga ma faigafaiva mo le tamaoaiga o le atunuu.
