Naunau le Malo ia toatele tagata e teu faafaigaluega tupe

Ua 884 le aofaiga o tagata o le tatou atunuu ua lesitala ma faamauina a latou teugatupe o maega tausi i le faalapotopotoga o le UTOS poo le teugatupe o mavaega tausi, o se faalapotopotoga a le Malo ua savalia nei le tolu tausaga talu ona faatuina.
O le masina o Me na amata ai se faiga paaga a le UTOS ma le Pacific Ezy Money Transfer ae ua oo atu nei i le 80 afe se vaegatupe ua teuina mai nisi o tagata o le atunuu ua aumau ma faamautu i Niu Sila.
O se mitamitaga lea o le minisita o tupe e fitoitonu i ai le vaaiga o le faalapotopotoga, le afioga Faumuina Faaolatane Tiatia Liuga. O lana saunoaga i le faalauiloaina o faamanuiaga faaopoopo poo se dividend ua totogi atu e le faalapotopotoga i le au fai iunite o le UTOS, na ia faailoa ai e faapea, o le faanaunauga lea o le Malo i le faatuina o le UTOS ia iai se isi faaputugatupe e teu faafaigaluega ai seleni a tagata ma toe maua ai nisi faamanuiaga faaopoopo tau tupe mo latou.
E lua ituaiga o teugatupe o mavaega tausi o loo autu i ai galuega a le faalapotopotoga, o tagata lautele ma pisinisi e aofia ai ekalesia ma faalapotopotoga tuma‘oti e fia teu ni seleni o ni mavaega tausi.
O faamaumauga lata mai a le UTOS ua faaalia ai e le minisita, e tusa ma le 60 miliona ua umia nei e le faalapotopotoga mai seleni teu faapisinisi mo long term investments mai kamupani ma pisinisi i le atunuu, e aofia ai ma ni ekalesia.
O le tufatufaga o le dividend i lenei tausaga ua faalua ai ona maua ia faamanuiaga e le au fai iunite ma o le tausaga ua mavae na totogi atu ai le 7 sene faaopoopo ae o le tausaga nei e 8 sene ona maua ai lea o le 15 sene ua toe totogi atu i luga o tupe faafaigaluega a tagata lautele, ma e fua le tele o ta‘i valu sene e maua, i le tele o le seleni o loo teu.
E tusa ma le $765,000 le vaegatupe ua totogi atu i le tausaga nei mo ia faamanuiaga faaopoopo. O le lelei o le faiga paaga a le UTOS ma le Pacific Ezy Money Transfer ua silasila ai le faalapotopotoga e faalautele atu lenei fuafuaga i le mamalu o tagata Samoa o alala i Ausetalia i se taimi i le lumanai.
O le tele o seleni ua maua mai Niu Sila ae faatoa lua masina o le faiga paaga, ua manatu ai le minisita o le a lē toe lafoina mai i soo se taimi tupe a tagata i Niu Sila o loo fia teu, ae o le a faaputu lava i Niu Sila i se teugatupe.
O le taimi lava e maualuga ai le aofaiga poo le volume o seleni, ona faatoa lafo mai lea i Samoa e faaaogā ai se totogi faapitoa poo se special rate a faletupe i lea atunuu.