Na te le o iloa poo fea o tanu ai si ana tama na oti i le galulolo

O loo mafatia lava si tina o Samiafa Tumua Lei‘o o le nuu o Saleapaga i le itumalo faafaipule o Lepa, i le fia maua o se faamatalaga manino mai le Matagaluega o Leoleo ma le Soifua Maloloina, poo ai tonu se aiga o nuu i le Mata Aleipata na aafia i le galulolo, na ave i ai se tasi o ana fanau e toalua na maliliu i le faalavelave faalenatura i le aso 29 o Setema 2009.
“Ua ou lagona le faanoanoa i lenei mea aua ua le maua se tali lelei mai tamaitai fomai i Lalomanu ma le alii leoleo o Latu o loo vaaia le ofisa o latou i Lalomanu”, o le faamatalaga lea a le tina ma maligi ona loimata. “Fa‘ita e aumai ni faamatalaga e tau maua ai se toafilemu o le loto ae na o tala ua atili nunumi ai lo‘u mafaufau”.
O le fanau e toalua a le tina na maliliu e aofia ai le alii o Uili e 4 tausaga ua uma ona teu, lea e faapea mai le tala a le tina na maua lona tino i le Aso Tofi o le vaiaso na tupu ai le galulolo, ae o si ana tama 2 tausaga o Faimea na maua i le Aso Lulu 30 o Setema, le aso na sosoo ma le aso o le galulolo.
“O le tamaitai o lo matou aiga sa faigaluega i le fale tulisi o le Boomerang na ia ave Faimea i le falemai i Lalomanu, ona ia tuu lea i le tamaitai tausi soifua o loo vaaia le falemai, ma sa faailoa i ai o la‘u tama”, na faamatala ai lava le tina o Samiafa.
E fai nei gaioiga uma o loo taoto le tina i le falemai i Motootua e tau togafiti ona manua mai le galulolo. A o taoto i Motootua sa alu atu le asiasiga a le Ao o le Malo i tagata na manunua e aofia ai ma le tina o Samiafa. “Sa ou talosaga i lana Afioga e fia ave si au tama o Faimea e tanu i Tafaigata, ona faapea atu lea o si alii ua lelei”, na talanoa mai ai lava le tina.
Sa talitonu le tina o si ana tama o loo i se tasi o falemaliu i Motootua o le mafuaaga lea o lana talosaga.
Ae ina ua faia tapenaga mo lona manao, na logoina o ia e le falemai ma leoleo e leai se tamaititi faapea o iai. E le o maua foi se suafa faapea i le lisi o tagata na maliliu.
O le tama a le tina e toa sefululua i ai tagata maliliu sa faamoemoe e teu i le fanua tanu o le Malo i Tafaigata. Peitai o le le maua o lona tino sa na o le toa sefulutasi ai tagata maliliu ua lagomau nei i Tafaigata.
O le faaletonu lea na le malolo ai loa le tina i le malaga i Lalomanu e talanoa i tamaitai fomai, lea na taua e Samiafa o le tala ane a le tamaitai fomai, e na o le tamaititi na avatu ae o lona igoa o Faima. Na ia faailoa ane foi na avatu fai i ai galuega a leoleo e pei o isi tagata maliliu ma toe ave atu loa e lagomau.
O le tasi lea o faaletonu o loo feagai ma le tina poo ai na ave i ai, aua e leai se isi o lona aiga na iai i le taimi lea. Sa faailoa e le tina i le tamaitai tausi soifua (nurse) o le sao o le igoa o lana tama o Faimea ae le o Faima, ma o lona talitonuga o si ana tama lea ua ave sese ma teu ese aiga e le o iloa.
Na saili i le falemai tele i Motootua ae o le tala ane e le mafai ona faamaonia lana mataupu ona e leai se igoa o lana tama o Faimea o iai i le lisi o tagata maliliu.
O le tala ane foi lea a leoleo. Pau le faamatalaga a le tina e iai matai e toalua o lo latou nuu na vaai tino i si ana tama o Faimea i le aso na maua ai. O matai foi na sa vaaitino o ave e le tamaitai o Ana le tino maliu o le tamaititi i le falemai i Lalomanu.
O loo tapena e le ofisa o leoleo se iloiloga e faamaonia ai tagata maliliu e tuuina atu i le faamasinoga. O le avanoa lea o le tina o Samiafa e avatu ai ana molimau e faamaonia ai si ana tama.
O le a faatoa mafai ai foi ona faia se pepa maliu ma ave loa i le ofisa o Taui o Faalavelave Faafuasei mo le agavaa ai o le tina e maua se seleni mai le Malo e pei ona maea ona pasia. Afai ae faamaonia lenei mataupu ona oo ai lea o le numera o tagata maliliu i le 144, ae toatolu o loo leiloloa pea, o ni tamaiti mai le afioaga o Saleapaga e pei ona maea ona faia se sauniga e faamavae atu ai i ia fanau.