Na ou inuina, ua ou le moe, le ai, na o le vaivai

O se tamaitai mai Aukilani sa ia inuina le apa e taua o le red bull i le valu masina, ua aafia nei o ia i ni mai eseese ona o lana lea masani. Fai mai sana faamatalaga a o ia maitaga i lona atalii lea ua fa ona tausaga, na matuai iloga ona oso lona lapoa ma na ia inuina ai loa lea apa inu ma lona le iloaina o le a avea ma alamai mo ia.
Pau lea o le vaai atu ua lusi ai lona lapoa mai le 105 kilo i le 60 ua iai nei. Fai mai Brooke Robertson, sa ia nanaina foi lea masani mai lona aiga ma ana uo ae faatoa iloa ane ina ua tea mai le falemai i le lua vaiaso ina ua oso faafuasei lona fatu. Tusa ma le 14 apa na te inuina i le aso ma sina cereal Honey Puffs. O le taimi nei o loo iai pea faalogona o lona aafiaga e pei o le gatete o lona tino, afu lona tino ma le niniva ma isi lava uiga le manuia ua ia maua ai. O le taimi nei ua fai ana faamalositino ma tausi lana taumafa paleni ina ia tumau ai lona mamafa ua iai nei.
O le apa inu lenei e selau fa sefuluvalu nuu o loo maua ai aua ua suesueina e leai sona afaina ma e lelei mo le taumafa. O le faamatalaga lea a le sooupu o le Red Bull. O lea apa inu ua faasa ona faatauina i Norway, Denmark ma Uruguay ona o le puipui lava i le soifua maloloina o tagata lautele.