Na ola le laau i totonu o ona māmā

E 5 senitimita le umi o le laau na tau aveese mai totonu o le māmā (lung)
E matautia ma lei taitonuina gofie e fomai se mea na latou vaaia ina ua sasalu atu le taotoga o se alii Rusia ma le manatu o se fula o le kanesa o loo tupu i totonu o le manava, ae na faateia i le fai atu o le taotoga, ae aliali ae se laau tai pei se tamai paina, o loo amata ona tuputupu ae i totonu o se tasi o ona māmā.
O le alii lenei, o Artyom Sidorkin, e 28 tausaga le matua, lea na maua i ai lenei tamai laau, ina ua sesele sei tulou, e fomai tipitipi lona manava ma le faamoemoe e aveese mai fafo se fula lea na masalosalo fomai o se kanesa. E iai le talitonuga, atonu pe na mānavaina i totonu e lenei alii se fatu o lenei laau, lea na amata ai loa ona tuputupu ae i totonu o lona māmā.
Na agai atu Mr Sidorkin i fomai ma faamatala se tiga tutui o loo ia lagonaina i lona fatafata ma o nisi taimi e sau le toto i lona gutu pe a tale. Na faia suesuega a le fomai, Surgeon Vladimir Kamashev, ma ia manatu ai, atonu ua aafia Sidorkin i le gasegase o le kanesa.
Na faia se faata ma iloa atu ai se mea lea na manatu uma ai loa, o se fula e pei ona masani ai ona latou vaaia i gasegase faapea. O lea na sauni ai loa e fomai se taotoga ina ia taumafai e aveese mai fafo lenei fula.
Ae o se vaaiga lava ina a uigaese, ina ua sesele atu ma iloa ai lenei laau ua amata ona iai ona tamai lālā e tau felefele solo mai. Fai mai le fomai na faia le taotoga, Dr Kamashev, sa manatu o sana miti lea e vaai i ai. Sa moeiini ma toe pupula ina ia faamautinoa le vaaiga ua ia vaaia, ma faamautinoa ai, o le mea moni lava lea ua iloa atu, o se laau i totonu o se tasi o māmā o si nei alii.