Na maua le avanoa e faatalanoa ai le alo o Samoa ia Feterika Sao mai le vasega o Creative Writing i Whitireia i le Aso Faraile na tea nei 22 o Mati, ina ua iu manuia lona taumafai i le faailoga o le Bachelor of Creative Writing.
Sa ta‘ua e Feterika lona lē fiafia sa tupu a‘e ma ia i lona itiiti, pe afai e faatasi ma ona tei ae e matuā lē lelei lana faitautusi faapea ma lana tusitusi. O isi taimi e lagona lona masiasi pe afai e faatasi ma isi tamaiti ma talanoa i mea aoga ona o ia sa lē mafai ona faasoa atu ona manatu ona o lona vaivai i le faitautusi ma le tusitusi.
O lea na tonu ai i lona loto o le a tuu ese lona masiasi ae taumafai e saili sona lelei i le ulufale atu lea i le aoga tusitusi i le Ako Literacy i Ueligitone, ma sa a‘oa‘oina ai loa iina mo le 2 tausaga. Na uma lena manatu loa e fia saili lona faailoga i le tusitala.
O lea na ulufale ai loa i le Aoga a Whitireia New Zealand ma aoga ai mo le faailoga o le Creative Writing i le 3 tausaga.
O se molimau a se tasi o ona faiaoga Mary-Jane Duffy na ta‘ua ai le fiafia e fesoasoani i le taumafai o Feterika, ona sa iloa lelei e Feterika mea e lē o manino ia te ia ma fesili loa mo se fesoasoani. O le molimau foi a Mary-Jane Duffy o ia sa aoaoina Feterika i le tusiga o solo (poetry) ma sa vaaia le matuā manaia o le tusisolo a Feterika.
Na vaaia le naunau o Feterika i le aoga ma lona filigā e sailiili i ana mataupu uma na aoaoina ai. O se tama e fia maua le malamalama i soo se itu i totonu o le vasega.
Fai mai Feterika, e mamao le pitonuu o Ueligitone e tausavali mai ai i Whitireia, peitai e lē manao ina ia misi se aso o lana vasega. O le lu‘i tele lea ia te ia o le fia faataunuuina o lana aoga i se iuga lelei, ina ia mafai ona ia faatino isi tulaga o lona agai i luma i le itu tau galuega.
Na moomoo lona loto i le tulaga o isi tama ma teine o loo ua manaia le gasologa o a latou aoga ona o le faitautusi ma le tusitusi ua pei ai o se mea faigofie lea ia i latou i mataupu uma, peitai o si ona taumafai sa musu e iloa mai o ia e isi tama ma teine aoga o mafatia lona loto. Ua ia tuu atu lona vaivai i ana tatalo i le Atua ma ua faapea ona alofagia o ia ma ua solosolo lelei ai lana aoga i tausaga e 5 na aoga ai ma maua ai lona faailoga.
Na talanoa fiafia mai Feterika i le lelei o le fesoasoani na ia maua mai ona faiaoga. E toatasi lava le Samoa i le vasega ua na o ia, ae o palagi uma isi tagata. O le tulaga foi la i lona feagai ai ma mataupu sa maua lava lona lototele e faatino ai ana galuega ona o le lelei o faiaoga ua latou malamalama i ona vaivaiga ma ona manaoga.
Sa fesiligia poo auai mai ona mātua i lona faauuga ae tali Feterika, o ia e lei vaai i lona tamā talu ona ola mai. Na o lona tina ma nai ona aiga o loo iai i le faauuga.
O le itu lea na lagona ai le vaivai o le loto o le faalogo atu i le talanoa mai a Feterika, o ia o loo ia tauaveina le igoa o lona tamā ae talu ona ola mai e lei vaai i ai. E lei avea lena ma mea e faavaivai ai lona finau atu i le aoga ia tau lona faamoemoe. Na ia lototele pea e asa le faigata ina ia iu lelei. E faafetaia e Feterika le galuega tele a nai ona faiaoga aemaise lava o si ona tina o Uputaua Laumatia mai le afioaga o Lalomanu, e tusa o lona onosai ma lana tapuaiga i lona agai atu i lana aoga seia oo ina faamanuiaina i se faailoga o le atamai.
Fai mai Feterika ua lē gata i le matuā fiafia o si ona tina ma nai ona aiga ae ua sili ona ia lagona le matuā fiafia tele ina ua ia mafaia ona talia le lu‘i lea ma ua manumalo ai.
Ua iai nei le faamoemoe o Feterika e avea o ia ma tusitala i soo se matata, aemaise le itu tau i tusitala o ata tifaga.
O se miti e matuā tāua tele pe a faataunuuina i le lumanai. E lē toatele ni tagata Pasefika ua latou ausia lea matata o le tusitala mo ni ata tifaga, ae amuia lenei alo o Samoa pe afai e taunuu lea miti mo le tauleleia ai foi o si ona tina ma lona aiga, o le nuu aemaise lava o le atunuu pele o Samoa.
Ia manuia tele au taumafaiga uma Feterika!