A fua atu i ai, e na o le fa lava ni masina atoatoa ma iloa ai o loo autasi se ulugalii a Simaika ma le tamaitai mai le motu i Sasae lea ua la faaipoipo nei, le tamaitai o Diana. Ae o le isi uma taimi atoa o le la mafutaga, e na o vevesi ma luitau ua fesagai nei ma si alii amio tausaafia o Simaika.
O le isi avega tele lea ua iai nei, ua fanau mai si a la tama, o le teine, ma sa iai le mafaufau o Simaika, ai nei a tau fai ifo le fiafia o lona toalua e tafao, ona o lea ua iai le teineititi e tausi, peitai e lei faavaivai ai iina le fafine. Na ona toe malosi lava o le failele, amata foi ona toe tui le ofuvae fufusi latou ma fai solo faamolemolega e alu solo ai, ae tiai lava lenei pepe ia Simaika.
E lei atoa se lua tausaga o le teineititi, ae fiu loa Simaika e toe sue lona faletua, ua ese foi le isi nuu la ua tafaofao solo mai ai, seia oo lava ina logotala, ua toe oo i Tutuila, ae o lea ua tiai laua ma si ona afafine i Upolu. Na fiu si alii e taumafai e toe faamalie le fafine e foi mai, ae na o le pelopelo lava ma fai mai o loo mai, pe o loo mamai foi ona matua.
Na mafaufau Simaika, afai o lona faasalaga lea mai le Atua ona ua le faamaoni e faaauau lana tautoga na fai o le alu e fai le finagalo o le Atua, ia ua malie lava i ai, ae o le a nofo faamaoni e tausi si ona afafine, ae sili ai loa pe a toe taai fala o le fafine mai Tutuila. Ma o le iuga lava lena na oo i ai le aiga o si alii o Simaika, lea e lei fia ni tausaga ae toe taape.
Na tele tala a tagata o le nuu i le ulugalii na fafauina lenei mea atoa, peitai na taumafai Simaika e faamalie i loto o tagata ma ia tautino ai, o ia lava e sese. Sa tatau ona fai lava e ia lana filifiliga, nai lo le tuu fua i mafaufauga o isi tagata, aemaise pe afai e mafua nei uunaiga e fai, pe afai o loo manuia ai muamua latou, ae mafatia ai le isi tagata. Ioe, na matua toe salamo lava si alii o Simaika, i le faalogo fua i isi ae le faalogo tasi i le musumusuga a le agaga paia.
