Ae paga lea, ua faateia tagata uma ina ia logotala, ua sauni Simaika e faaipoipo ma se tamaitai mai le motu i Sasae. O Simaika ua leva ona maliu si ona tama i se gasegase faaumiumi, ma toe o ia ma lona tina, ma isi ona uso ma tuafafine o loo aooga pea, ae o le latou aiga, o se tasi o puiaiga toatele i totonu o le alalafaga.
Na tele lava tala o lagona le fiafia o tagata na saua i le faalogo e uiga i lenei faaipoipoga ua faafuasei ona tau, ma e iai lava nisi uo a Simaika na taumafai e toe talatalanoa ma faamautinoa i le alii pe ua sao lana filifiliga ua fai, aemaise e lei fevaaiai lava le toalua lea, e na o telefoni lava ia e masani ona talatalanoa ai, lea e mailei atu e le ulugalii o Sola ma Malia i lo la faleoloa, ona faafesootai loa lea o le mafine mai Tutuila e vili ane, ae ua taunuu atu foi ma Simaika ma fai loa le evaevaga i luga o laina o fesootaiga.
Na matauina foi e tagata o le nuu aemaise lava le tupulaga a le alii o Simaika, ua matua alu lava le ulu o le alii i lana teine Tutuila, ma ua uma foi le toaga e suesue ma faitau lana Tusi Paia i le tele o afiafi, ae ua leua ane lava ma mou i le faleoloa o le ulugalii taufaapipii.
E ui lava i loto mafatia o tagata uma, ae na oo lava le faamoemoe o Simaika ma lana manamea mai Tutuila. E oo foi i le aiga o Simaika, e fai lava le faaipoipoga ae o loo popole le aiga, i le vave tele o le faiga o le faaiuga a le latou tama. Na taunuu le tamaitai faaipoipo i le isi vaiaso, ae o le vaiaso na sosoo ai le faamoemoe, ma sa faamautu atu lava i le aiga o le ulugalii lea na mafua ai lenei masaniga.
Oka se mimita o le alii o Simaika ina ua amata ona aliali le tino o lana manamea i totonu o le nuu, aua o se tamaitai e lalelei ma ona foliga momosi, ai ona o le teine e sau i le motu e taugofie uma ai mea faaaulelei foliga.
O le aso lava o le faaipoipoga na amata ai ona atagia mai i tagata le vaavaa o le tamaitai faaipoipo, aua na oo loa ina tatala le taimi o faafiafiaga, oka e matautia le malosi o le sou a le tamaitai faaipoipo. Na amata lava ona faanoanoa mai lena aso le alii faaipoipo ina ua ia vaaia le malosi tele o lana manamea i le uaina, ma le matagofie o lana saasaa lea ua amata ai nei ona faaata i le mafaufau o si alii o Simaika le foliga o se siomaga na ola ae ai lana paaga.
