E tele le talitonuga o Tapeni, e leai lava se isi tagata e sili ona atamai ana fautuaga i lea vaega o le olaga, nai lo lona lava tina, aua e na te matua faatuatuaina le alofa moni o lona tina ia te ia, ma o sana upu foi o upu ia o le a sili ona ia faatauaina pe a oo i le olaga faitoalua.
E ui lava sa tau masalosalo foi le fafine e pei lava ua fai se teine a si ana tama, ae lei vavevave Tina e faasufi Tapeni, ona sa iloa lelei e le fafine, e oo mai lava le taimi e folasia ai e lana tama lea mataupu ia te ia, aemaise e le o popole le fafine, leaga ua ia iloa lelei, o loo lelei ma atamai le auala o loo faagasolo ai e Tapeni mea uma i lona olaga.
Peitai na faafuasei ona oso le mai o si fafine, ma ave atu ai lava i le falemai, seia oo ina ua faatetele ma le toe foi ane ai i lo latou aiga. E lei atoa se tolu vaiaso na taoto ai le fafine i le maota gasegase i Motootua, ae to malie ai loa lana mānava ma faamavae atu ai lava i si ona aiga, lea e lei tau so latou mafaufau o le taimi lea e motusia ai le latou mafutaga ma si o latou tina.
O le ala la lea o le nofonofo pea o le tama o Tapeni i luga o le tuugamau o si ona tina ma tagitagi toatasi ai, ona ua tele le toe fia tatala atu o ona mafaufauga i si ona tina, ae o lenei ua la va i le palapala ma le simā.
Ua mafaufau le tama, maimau pe ana maliu si ou tina, ae ua ia iloa le igoa o le tamaitai ua ou filifilia e fai ma a‘u avā. Ua na o le mau “maimau” ae ua leai se mea e mafai. Ua iu lava ina lagona le tagi a le tama i luga o le tuugamau o si ona tina, ua uma le saofai ma tagi, ae na matua taoto ifo lava ma fao ma tagi lotulotu.
O le leotele o le tagi a le tama, na iu lava ina lagona ane e lona tama lea e saofai pea i luma i le pito i luga o le latou fale, ma faatalitali le taimi e potopoto uma ane ai lana fanau mo le latou afiafi faaleaiga. Na vave ona mautinoa e le tamaloa o lona atalii lea e tagi, ona o lea sa alu soo i ai lona uso laititi o Peto e sau i le fale, ae lei alu ane lava.
