O nisi taimi ina ua matua le tama ma ua aoga i se tasi o kolisi i le taulaga, ua iai foi nisi suiga fou ua vaaia e le fafine i lana tama, i le faiga o ana teuga, le seluina o lona lauulu ma sikaili o ona lavalava.
O le isi suiga na vaaia e Tina i lana tama, ua tauau ina le toe tele ni taimi avanoa e faifaimea ai le tama ma isi ona tei, ona ua matele lava i lana telefoni feaveai lea ua leua ane lava ma omiomi. Peitai e tusa pe le o fia tautala le tamaitiiti, ae le umi lava ona fesuisuiai fesili a le fafine, ae faamatala uma foi e le tama mea ia e masalosalo ai lona tina.
O le faaiuga o aoaoga a Tapeni i le kolisi, na ia maua ai se avanoa e faigaluega ai i se tasi o kamupani telefoni i totonu lava o Samoa. Peitai e lei atoa lelei le lua tausaga talu ona faigaluega ai Tapeni, ae faalogo e iai se isi avanoa faigaluega i Amerika Samoa, e ono mafai ona agavaa e talosaga i ai.
Sa fiafia foi le tama i le totogi na faalogo e maua ai lea galuega, ae na pau lava le itu o loo faalotolotolua ai le tama, o le le manao e nofo mamao ese mai lona aiga, aemaise lava i si ona tina.
I le taimi foi e tasi ua mafaufau Tapeni e apalai i le avanoa faigaluega i Amerika Samoa, na amata ai ona faamasani le tama ma se tasi o tamaitai e la te faigaluega faatasi, ae eseese a la matagaluega.
Ua amata foi ona mafanafana lagona o Tapeni i lea tamaitai, ma o le isi la lea mea ua faalavelave ane i lona mafaufau i le galuega i Tutuila, ona o lea e le o manao lana uo e alu ese atu Tapeni, ae ia la faigaluega ai pea i le kamupani telefoni, ma taumafai ia faasolosolo i luga ni o la tulaga i totonu o le kamupani.
E moni lava ua alofa Tapeni i le tamaitai lea, ae le o tau le manatu o le tama i se fuafuaga vave e faatopetope nisi suiga i lona olaga, ma atonu foi o le pogai lea o le manatu e manaia pe a alu ese atu e galue i Tutuila, e lelei foi e vavamamao ai mai lea tamaitai, ae sei lava se taimi e tapena lelei ai foi lea suiga o le a ono tulai mai le olaga, aemaise lava le mafaufau o le tama, e manao lava ia ona maua muamua se manatu o si ona tina i lea vaega o lona olaga, a o lei faamautuina sana filifiliga.
