O se tina e galue mamafa ma e le taitai ona faatuutuu i lona gasegase, ae sa ia faia atoa le fatu aiga aua o se tina e oa ma tamaoaiga ona aao, i le tele o tomai eseese sa iai i lenei tina. O le ala foi lea o le sologa lelei o meafai i totonu o le aiga, aua e le taitai ona manao le fafine e ola falōlō lana fanau, ae ia mautinoa lava e iai i o la lima ma lona toalua se mea i taimi uma e tagi mai ai tamaiti.
O si tamaloa o Suaesi, e le o se tagata sa matua malosi tele ni ana aoaoga, ae o le agaga lava lea e tasi talu mai ona nonofo ma le fafine o Tina, ma o uiga sogasogā nei o le fafine na amata ai lava ona maua isi tomai o le tamaloa, aua na ave foi lava e Tina si ona toalua ma totogi se tupe e fai ai ni ana aoaoga i le vaega o galuega a le malo lea sa fai ai nisi o toleniga mo nai tagata ua matutua ae o loo iai pea le lagona e fia manao e aoaoina ni tomai faapitoa.
Na iu ai lava ina maua le galuega a Suaesi i le vaega a le Ofisa o Galuega a le malo i na vaitaimi, lea sa tufa solo e faia galuega toe faaleleia i fale o loo nofo totogi ai tagata faigaluega a le Malo.
O le toesea faafuasei o le tina o le aiga, e ui i le mafatia ai o si tamā o Suaesi ma lana fanau, aemaise le tama o Tapeni lea e iai ni mataupu sa ia fia maua ai lava se lagona o si ona tina, ae i le itu lava ia i le tulaga faaletino o le aiga, o loo ua matua lava saunia tapenapenaga na faia e lenei tina, lea ua tuu ai le faamuli a si toeaina ma si ana fanau.
Peitai mo le tama lava ia o Tapeni, e ese mai lona fiafia i lona olaga i le latou aiga ma nai ona matua ma nai ona uso ma tuafafine laiti, ae i le itu lava ia i le olaga tau faalogona o le tama, e pei lava o lona tina sa matele i ai.
O le mafutaga a Tapeni ma lona tina e pei o se mafutaga a se tinā ma sana tama teine, aua mai lava i taimi a o laititi le tamaititi, soo se mea e tupu i lona olaga i le aoga poo fea lava e tafao ai ma ni ana uo ma ia aoaoina mai ai se mea fou, e iloa uma lava e le fafine o Tina.
