E tagi lava alisi o le afiafi, ma ua faasolo foi ina pogisa le nuu, ae o loo saofai lava le tama o Tapeni i luga o le tuugamau o si ona tina, ma mafaufau ai lava i le tele o mea sa manao e talanoa atu ai i si ona tina, ae o lenei ua faafuasei ona motusia le la mafutaga, ae lei uma ona faaleo ona lagona i lona tina.
E faalua ona tuli ane e le toeaina o Suaesi le isi ona atalii laititi e saili atu Tapeni ua latalata i taimi o le latou afiafi faaleaiga, ae na o le saofai lava o le tama e leai ma se tala o faia. ‘Alu i le fale sei uma ou alu atu,’ pau lava lea o le tala a Tapeni i lona tei ma toe punou ifo i lalo, o loo mafatia pea ona foliga.
O Tapeni o le tama tama a le fafine o Tina mai lana faaipoipoga muamua, peitai na maliu lava le tama o si tamaitiiti a o faatoa lua tausaga o Tapeni, ma na toe faaipoipo atu Tina i le tamaloa o Suaesi, ma amata ai lona ona la tausi faatasi mai le tamaititi o Tapeni. Lona uiga, e sili atu ona latalata lagona o le tamaitiiti o Tapeni i le tamaloa o Suaesi, lea ua pei lava o lona tama moni, nai lo si ona tama lea e na o le igoa o loo ia iloa, ae matua leai lava sona manatua o ni foliga.
‘Mama, aisea ua e sola ai ae na ou fai atu lava ta te talanoa ae ou te lei alu i Niu Sila,’ o si tautalatala lemu lava lea a si tama o Tapeni e ui lava na te iloa e le o toe lagona ae e si ona tina nei tala, ae pau lava o ona lagona, e pei lava a talanoa faapea, ona tau feololo atu ai lea o le mafatia o lona faalogona.
O le maliu faafuasei o le fafine o Tina, ua pei o se puao ua pau faafuasei mai ma punitia atoa ai le lalolagi o le tama o Tapeni, ma ua fiu e tau toe faasagatonu lona mafaufau ae ua faigata lava ona toe faagasolo lelei lona mafaufau e pei ona sa masani ai.
E moni lava sa fai ma mai si fafine, ona o le tausaga e 1997 na maua ai i suesuega a le falemai, ua aafia le fafine i le mai o le suka, ae sa lei faapea na mai taoto e pei o le toatele o isi gasegase suka.
